.jpg)
លោករដ្ឋមន្ត្រីការពារជាតិអាមេរិក Lloyd Austin (ឆ្វេង) ចូលរួមសន្និសីទអំពីបញ្ហាប្រឈមផ្នែកសន្និសុខនៅមជ្ឈិមបូព៌ា។ AFP
សហរដ្ឋអាមេរិកនឹងពង្រីកមូលដ្ឋានយោធារបស់ខ្លួននៅកោះហ្គាម និងអូស្ត្រាលី ដើម្បីត្រៀមកងកម្លាំងយោធាអាមេរិកក្នុងការទប់ទល់នឹងប្រទេសចិន។ នេះបើតាមការលើកឡើងកាលពីថ្ងៃចន្ទ ទី ២៩ វិច្ឆិកា ដោយមន្ត្រីជាន់ខ្ពស់ ១ រូប នៃក្រសួងការពារជាតិអាមេរិក។
ការធ្វើបែបនេះ គឺជំរុញដោយការពិនិត្យឡើងវិញនូវឥរិយាបថពិភពលោកដោយក្រសួងការពារជាតិអាមេរិក ដែលធ្វើឡើងក្រោមបញ្ជារបស់លោកប្រធានាធិបតី ចូ បៃដិន ភ្លាម បន្ទាប់ពីលោកកាន់អំណាចកាលពីដើមឆ្នាំនេះ។ រដ្ឋមន្ត្រីក្រសួងការពារជាតិអាមេរិកលោក ឡយដ៍ អូស្ទីន បានចាប់ផ្តើមធ្វើការពិនិត្យឡើងវិញកាលពីខែមីនា ហើយថ្មីៗនេះ លោក បៃដិន បានអនុម័តការរកឃើញអនុសាសន៍របស់របាយការណ៍នៃការពិនិត្យនេះ។ ខ្លឹមសារភាគច្រើននៃរបាយការណ៍ត្រូវបានរដ្ឋាភិបាលអាមេរិករក្សាជាការសម្ងាត់ ប៉ុន្តែក្រសួងការពារជាតិអាមេរិក បានបង្ហាញព័ត៌មានលម្អិតមួយចំនួនអំពីការរកឃើញ។
អនុរដ្ឋលេខាធិការក្រសួងការពារជាតិអាមេរិកទទួលបន្ទុកគោលនយោបាយការពារជាតិលោកស្រីម៉ារ៉ា កាលីនបាននិយាយនៅក្នុងសន្និសីទសារព័ត៌មានមួយថា តំបន់ឥណ្ឌូ-ប៉ាស៊ីហ្វិកបានក្លាយជាចំណុចផ្ដោតដ៏សំខាន់បំផុត ស្របតាមការសង្កត់របស់ធ្ងន់លោករដ្ឋមន្ត្រីអូស្ទីនថា «ប្រទេសចិន ជាបញ្ហាចម្បង» សម្រាប់ក្រសួងការពារជាតិ។ របាយការណ៍ ក៏បានណែនាំឱ្យកាត់បន្ថយកងកម្លាំងអាមេរិកនៅតំបន់ដទៃទៀត ដើម្បីមកផ្ដោតលើតំបន់ឥណ្ឌូ-ប៉ាស៊ីហ្វិក។
លោកស្រីកាលីន និយាយថា ការពិនិត្យឡើងវិញបានណែនាំឱ្យក្រសួងធ្វើការពង្រឹងហេដ្ឋារចនាសម្ព័ន្ធយោធានៅប្រទេសអូស្ត្រាលី និងកោះហ្គាម។ លោកស្រីនិយាយថា៖ «នៅប្រទេសអូស្ត្រាលី អ្នកនឹងឃើញការដាក់ពង្រាយវិលជុំនៃកងកម្លាំងយន្តហោះចម្បាំង និងយន្តហោះទម្លាក់គ្រាប់បែក អ្នកនឹងឃើញការហ្វឹកហ្វឺនកងកម្លាំងជើងគោក និងការបង្កើនកិច្ចសហប្រតិបត្តិការផ្នែកដឹកជញ្ជូន ហើយកាន់តែនឹងធ្វើបែបនេះនៅទូទាំងឥណ្ឌូ- ប៉ាស៊ីហ្វិក អ្នកនឹងឃើញការកែលម្អហេដ្ឋារចនាសម្ព័ន្ធជាច្រើននៅក្នុងកោះហ្គាម ប្រជុំកោះម៉ារីអាណាខាងជើង និងប្រទេសអូស្ត្រាលី»៕
