.jpg)
លោកនាយករដ្ឋមន្ត្រីអេត្យូពី លោក Abiy Ahmed។ រូបថត AFP
ប្រទេសអេត្យូពី បានបដិសេធថា ខ្លួនមិនបានវាយប្រហារកាលពីចុងសប្តាហ៍នៅតាមបណ្តោយព្រំដែនរបស់ខ្លួនជាមួយប្រទេសស៊ូដង់ ដោយបានស្តីបន្ទោសភាពចលាចលនៅក្នុងតំបន់មានជម្លោះទៅលើក្រុមឧទ្ទាមមកពីតំបន់ទីហ្គ្រេយ៍ ដែលញាំញីដោយសង្គ្រាមរបស់ខ្លួននោះ។
កងកម្លាំងប្រដាប់អាវុធស៊ូដង់ បាននិយាយក្នុងសេចក្តីថ្លែងការណ៍មួយកាលពីថ្ងៃអាទិត្យថា ទាហាន ៦ នាក់ បានស្លាប់ក្នុងការវាយប្រហាររបស់ក្រុមប្រដាប់អាវុធ និងក្រុមជនសកម្មប្រយុទ្ធមានទំនាក់ទំនងជាមួយយោធាអេត្យូពីនៅក្នុងតំបន់ដីមានជីជាតិដែលត្រូវបានគេស្គាល់ថា Al-Fashaqa។
តំបន់នោះ គឺជាប្រភពមួយនៃភាពតានតឹងរវាងទីក្រុងអាឌីស អាបេបា និងទីក្រុងខារទុម ដោយបង្កឱ្យមានការប៉ះទង្គិចកាលពីឆ្នាំ ២០២០ ដែលបានបណ្តាលឱ្យទាហានស៊ូដង់ ៩០ នាក់ស្លាប់។ នេះបើយោងតាមសេចក្តីថ្លែងការណ៍ កាលពីថ្ងៃអាទិត្យ។
ប៉ុន្តែនៅក្នុងការអធិប្បាយដែលត្រូវបានគេចាក់ផ្សាយនៅលើប្រព័ន្ធផ្សព្វផ្សាយរបស់រដ្ឋកាលពីថ្ងៃអាទិត្យ អ្នកនាំពាក្យរដ្ឋាភិបាលលោក Legesse Tulu បានបដិសេធការអះអាងដែលថា យោធាបានវាយប្រហារទៅលើប្រទេសស៊ូដង់នោះ គ្មានហេតុផល។
ជំនួសមកវិញលោកបានស្តីបន្ទោស អំពើហិង្សានោះទៅលើរណសិរ្សរំដោះប្រជាជនទីហ្គ្រេយ៍ (TPLF) ជាក្រុមបះបោរដែលបានជាប់ទាក់ទិនក្នុងសង្គ្រាមមួយគួរឱ្យភ័យខ្លាចប្រឆាំងរដ្ឋាភិបាលលោកនាយករដ្ឋមន្ត្រី Abiy Ahmed ចាប់តាំងពីខែវិច្ឆិកា ឆ្នាំ ២០២០ និងអះអាងថា កំពុងរំកិលទៅរដ្ឋធានីអាឌីស អាបេបា។
លោក Legesse បាននិយាយនៅក្នុងការអធិប្បាយត្រូវបានចាក់ផ្សាយដោយសាជីវកម្មផ្សព្វផ្សាយអេត្យូពីថា៖ «ក្រុមអ្នកបះបោរចោរព្រៃ និងភេរវករបានចូលមកពីប្រទេសស៊ូដង់» ដោយមិនបានផ្តល់ភ័ស្តុតាងអ្វីឡើយ។
លោកបានបន្ថែមទៀតថា៖ «កងកម្លាំងការពារជាតិអេត្យូពី និងជនសកម្មប្រយុទ្ធក្នុងតំបន់បានកម្ទេចពួកគេ»។
លោក Legesse បាននិយាយទៀតថា TPLF កំពុងហ្វឹកហាត់នៅក្នុងប្រទេសស៊ូដង់ និងទទួលជំនួយពីអ្នកគាំទ្របរទេសមិនបង្ហាញអត្តសញ្ញាណ។
ដីនៅក្នុងតំបន់ Al-Fashaqa ត្រូវបានដាំដុះដោយកសិករអេត្យូពីជាច្រើនឆ្នាំមកហើយ ទោះបីជាស៊ូដង់អះអាងថា ដីនេះ ស្ថិតក្នុងដែនដីរបស់ខ្លួនក្តី។
នៅក្នុងខែវិច្ឆិកា ២០២០ លោក Abiy បានបញ្ជូនកងទ័ពចូលនៅក្នុងតំបន់ទីហ្គ្រេយ៍ ដើម្បីបណ្តេញ TPLF និងកងទ័ពឈរជើងនៅទីក្រុងខាទុំក្នុងតំបន់ Al-Fashaqa ជាវិធានការមួយដែលទីក្រុងអាឌីស អាបេបា បានពិពណ៌នាថា ជាការឈ្លានពាន។
ប៉ុន្តែលោក Legesse បាននិយាយថា អេត្យូពីចង់ដោះស្រាយបញ្ហានេះដោយសន្តិវិធី។
លោកបាននិយាយថា កងការពារជាតិអេត្យូពី មិនមានរបៀបវារៈបើកការ-វាយប្រហារទៅលើប្រទេសអធិបតេយ្យណាមួយឡើយ។
មានដីដែលកងកម្លាំងស៊ូដង់បានឈ្លានពានយក។ រដ្ឋាភិបាលកំពុងដោះស្រាយជម្លោះនេះក្នុងដំណើរការដោយសន្តិវិធី តាមរយៈការពិភាក្សា និងចរចា។
សង្គ្រាមនៅប្រទេសអេត្យូពីភាគខាងជើង បានបណ្តាលឱ្យមនុស្សរាប់ពាន់នាក់ស្លាប់ និងជំរុញឱ្យប្រជាជនរាប់ម៉ឺននាក់ធ្លាក់ក្នុងស្ថានភាពស្រេកឃ្លាន។ នេះបើយោងតាមការប៉ាន់ប្រមាណរបស់ UN៕
វីដេអូ៖
