.jpg)
ទាហានអុីស្រាអែលប៉ះទង្គិចជាមួយអ្នកតវ៉ាប៉ាឡេស្ទីននៅតំបន់វេសបែ៊ង។ AFP
ប្រធានទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន (UNRWA) បាននិយាយថា ខ្លួនមិនអាចបើកប្រាក់ខែខែវិច្ឆិកាជូនបុគ្គលិកចំនួន ២៨ ០០០ នាក់ ឱ្យបានទាន់ពេលទេដោយសារវិបត្តិមូលនិធិដ៏ធំ ដោយបានព្រមានអំពីការកាត់បន្ថយសេវាសំខាន់ៗចំពោះប្រជាជនរាប់លាននាក់ ស្របពេលមានជំងឺរាតត្បាតជាសកល។
UNRWA បានគ្រប់គ្រងកម្មវិធីសាលារៀន គ្លីនិក និងកម្មវិធីចែកស្បៀងសម្រាប់ជនភៀសខ្លួនប៉ាឡេស្ទីនរាប់លាននាក់ដែលមានចុះឈ្មោះនៅទូទាំងមជ្ឈិមបូព៌ា ពោលគឺកូនចៅប៉ាឡេស្ទីនដែលត្រូវបានបង្ខំឱ្យរត់ភៀសខ្លួនពីទីក្រុង និងភូមិរបស់ពួកគេ។
ជនភៀសខ្លួន ៥,៧ លាននាក់ភាគច្រើនរស់នៅក្នុងជំរំនានាដែលត្រូវបានគេផ្ទេរចូលកន្លែងទើបសាងសង់ថ្មីៗ ប៉ុន្តែជារឿយៗតំបន់លំនៅឋានក្រីក្រនៅក្នុងតំបន់វេសបែ៊ងគ្រប់គ្រងដោយអ៊ីស្រាអែល ទីក្រុងហ្សេ៊រុយសាឡិមខាងកើត និងតំបន់ហ្គាហ្សា រួមទាំងប្រទេសហ្ស៊កដានី ស៊ីរី និងលីបង់។
ប្រធាន UNRW លោក Philippe Lazzarini បានប្រាប់អ្នកសារព័ត៌មាននៅហ្ស៊កដានីកាលពីថ្ងៃអង្គារថា ការបន្តគាំទ្ររបស់អាមេរិកដល់ទីភ្នាក់ងារនេះ ដែលត្រូវផ្អាកដោយរដ្ឋការរបស់លោកត្រាំនោះ ត្រូវបានទូទាត់ដោយការកាត់បន្ថយជំនួយដោយក្រុមអ្នកផ្តល់ជំនួយដទៃទៀត។
ទីភ្នាក់ងារនេះ ក៏បានជួបប្រទះវិបត្តិគ្រប់គ្រងនៅក្នុងឆ្នាំ ២០១៩ នៅពេលប្រធានមុនរបស់ខ្លួនបានលាលែងពីតំណែងស្របពេលមានការចោទប្រកាន់ពីបទរំលោភបំពានផ្លូវភេទ បក្ខពួកនិយម និងការរំលោភអំណាចដទៃទៀត នៅក្នុងទីភ្នាក់ងារនេះ។
លោក Lazzarini បាននិយាយថា បុគ្គលិក បានធ្វើកូដកម្មកាលពីថ្ងៃចន្ទ ក្រោយពីត្រូវបានផ្តល់ព័ត៌មានកាលពីសប្តាហ៍មុនថា ប្រាក់ខែនឹងត្រូវពន្យារពេល ប៉ុន្តែបានបញ្ឈប់សកម្មភាពនេះ បន្ទាប់ពីមានការសម្របសម្រួល។
លោកបាននិយាយថា៖ «ប្រសិនបើសេវាសុខភាពរបស់ UNRWA មិនត្រូវបានដោះស្រាយនៅចំពេលមានជំងឺរាតត្បាតសកលនោះ ការផ្តល់វ៉ាក់សាំងកូវីដ ១៩ នឹងចប់។ ការថែទាំមាតា និងទារក នឹងលែងមានតទៅទៀត ក្មេងស្រី និងក្មេងប្រុស កន្លះលាននាក់ មិនដឹងថាតើពួកគេអាចបន្តរៀនសូត្រ បានតទៅទៀតឬយ៉ាងណាទេ? ហើយជនភៀសខ្លួនក្រីក្របំផុតជាង ២ លាននាក់នឹងមិនទទួលបានជំនួយជាសាច់ប្រាក់ ឬស្បៀងអាហារអ្វីឡើយ»។
«តម្រូវការផ្នែកមនុស្សធម៌របស់ជនភៀសខ្លួនប៉ាឡេស្ទីនបន្តកើនឡើង ខណៈដែលជំនួយដល់ទីភ្នាក់ងារនេះ បានធ្លាក់ចុះ ចាប់តាំងពីឆ្នាំ ២០១៣»។
លោក Lazzarini បាននិយាយថា ទីភ្នាក់ងារនេះ បានរៃអង្គាសជំនួយបានគ្រប់គ្រាន់នៅសន្និសីទមួយកាលពីពេលថ្មីៗនៅទីក្រុងប្រ៊ុចសែល ដោយបានឡើងដល់ ៤៨ ភាគរយនៃថវិការបស់ខ្លួននៅក្នុងឆ្នាំ ២០២២ និង ២០២៣។ ទីភ្នាក់ងារនេះក៏បង្កើនថវិកាចំនួន ៦០ លានដុល្លារទៅ ១០០ លានដុល្លារ រហូតដល់ចុងឆ្នាំនេះ ដើម្បីធ្វើឱ្យសេវាផ្សេងៗដំណើរការ។
លោកបាននិយាយថា៖ «ខ្ញុំមិនទាន់អាចនិយាយបានថា ប្រាក់ខែខែវិច្ឆិកានឹងត្រូវបានបើកនៅពេលណានោះទេ»។
ក្រុមអ្នករិះគន់ UNRWA ក្នុងនោះមានអ៊ីស្រាអែលដែរ បានចោទទីភ្នាក់ងារនេះថាបានធ្វើឱ្យវិបត្តិជនភៀសខ្លួន ៧៣ ឆ្នាំនេះអូសបន្លាយតទៅទៀត ហើយនិយាយថា បណ្តាប្រទេសពាក់ព័ន្ធទាំងអស់ គួរទទួលបន្ទុកទទួលយកជនភៀសខ្លួនទាំងនោះ៕
