លោក បុង ហ្គោ (Bong Go) ដែលជាសមាជិកព្រឹទ្ធសភា និងជំនិតរបស់លោកប្រធានាធិបតីហ្វីលីពីន រ៉ូឌ្រីហ្គោ ឌូតឺតេ កាលពីថ្ងៃអង្គារកន្លងទៅ បានសម្រេចដកខ្លួនចេញពីបេក្ខភាពប្រធានាធិបតីនៃការបោះឆ្នោតជាតិខែឧសភា ឆ្នាំ ២០២២។
លោកបានប្រាប់អ្នកសារព័ត៌មានថា គ្រួសាររបស់លោកមិនយល់ស្របនឹងការឈរឈ្មោះជាប្រធានាធិបតីនេះទេ។
«ក្រុមគ្រួសារខ្ញុំក៏មិនចង់ដូចគ្នាដែរ ដូច្នេះហើយខ្ញុំគិតថា ពេលនេះប្រហែលមិនមែនជាពេលវេលាស័ក្ដិសមសម្រាប់ខ្ញុំនោះទេ។ មានតែព្រះទេដែលដឹងថា ពេលណាជាពេលដ៏ល្អសម្រាប់ខ្ញុំ»។ នេះបើតាមការលើកឡើងរបស់សមាជិកព្រឹទ្ធសភារូបនេះ។
លោកបានបន្ថែមថា៖ «ខ្ញុំក៏មិនចង់ឱ្យលោកប្រធានាធិបតី ឌូតឺតេ ជាប់អន្ទាក់នៅកណ្ដាលនោះទេ ព្រោះតែខ្ញុំស្រឡាញ់គាត់ ហើយចាត់ទុកគាត់ជាឪពុក ១ រូប។ គាត់ចាស់ហើយ ហើយគាត់បានធ្វើច្រើនណាស់សម្រាប់ប្រទេសជាតិ។ ខ្ញុំមិនចង់បន្ថែមបញ្ហាទៅឱ្យគាត់ទេ។ ខ្ញុំនឹងនៅតែស្មោះនឹងគាត់ ហើយនឹងសច្ចាបន្តនៅជាមួយគាត់ជារៀងរហូត»។
បុរសវ័យ ៤៧ ឆ្នាំរូបនេះ ជាជំនិតរបស់លោក ឌូតឺតេ យូរឆ្នាំមកហើយ ពោលគឺតាំងពីឆ្នាំ ១៩៩៨ មកម្ល៉េះ ដោយលោក ឌូតឺតេ កាលពីនៅធ្វើជាចៅហ្វាយក្រុងដាវ៉ាវនៅឡើយ បានចាត់តាំងលោក បុង ហ្គោ ធ្វើជាជំនួយការពិសេស។ នៅពេលដែលលោក ឌូតឺតេ ឡើងជាប្រធានាធិបតីនៅឆ្នាំ ២០១៦ លោក បុង ហ្គោ នៅបន្តតំណែងនេះដដែលរហូតដល់ឆ្នាំ ២០១៨។ ឆ្នាំ ២០១៨ លោកក៏ឈរឈ្មោះធ្វើជាសមាជិកព្រឹទ្ធសភា ប៉ុន្តែទំនាក់ទំនងជិតស្និទ្ធជាមួយលោក ឌូតឺតេ នៅតែរក្សាដដែល។
កាលពីខែកញ្ញា ឆ្នាំ ២០២១ នេះ នៅពេលដែលលោក ឌូតឺតេ ប្រកាសថា លោកនឹងឈរឈ្មោះជាអនុប្រធានាធិបតី លោក បុង ហ្គោ ខ្លួនលោកផ្ទាល់ក៏សម្រេចទទួលយកការចាត់តាំងរបស់គណបក្សកាន់អំណាច PDP-Laban ក្នុងការឈរឈ្មោះជាប្រធានាធិបតីផងដែរ។
នៅពេលដែល លោក ឌូតឺតេ មិនចង់ធ្វើជាអនុប្រធានាធិបតីវិញ លោក បុង ហ្គោ ក៏សម្រេចចិត្តដាក់ពាក្យធ្វើជាអនុប្រធានាធិបតីសម្រាប់គណបក្ស PDP-Laban ដោយមានអតីតមេប៉ូលិស និងជាសម្ព័ន្ធមិត្តរបស់លោក ឌូតឺតេ ឈរឈ្មោះជាប្រធានាធិបតី។
ក្រោយមក នៅខែវិច្ឆិកានេះលោក បុង ហ្គោ ប្ដូរចិត្តមួយសាទៀតដោយចេញទៅឈរឈ្មោះជាប្រធានាធិបតីនៅគណបក្សតូចមួយ ដែលទើបតែបង្កើតនៅឆ្នាំ ២០១៨។ លោកបាននិយាយនៅពេលនោះថា លោកធ្វើបែបនេះដោយសារតែលោកមិនចង់ប្រជែងនឹងបេក្ខភាពអនុប្រធានាធិបតីអ្នកស្រី សារ៉ា ឌូតឺតេ ដែលជាកូនស្រីប្រធានាធិបតីហ្វីលីពីនបច្ចុប្បន្ននេះឯង។
លុះនៅសប្ដាហ៍នេះ អតីតជំនួយការរបស់លោក ឌូតឺតេ រូបនេះក៏ដកខ្លួនចេញពីការបោះឆ្នោតជ្រើសរើសប្រធានាធិបតីតែម្ដង។
ការដកខ្លួនរបស់លោក បុង ហ្គោ ធ្វើឱ្យអ្នកតាមដាន និងអ្នកជំនាញនយោបាយហ្វីលីពីនយល់ដូចៗគ្នាថាជា ការបើកផ្លូវឱ្យបេក្ខភាពប្រធានាធិបតី លោក ហ្វើឌីណង់ បុង បុង ម៉ាកូស ជូនៀ ដែលជាកូនប្រុសរបស់អតីតមេដឹកនាំផ្ដាច់ការហ្វីលីពីន ហ្វើឌីណង់ ម៉ាកូស។
លោក Antonio La Vina សាស្ត្រាចារ្យច្បាប់ និងនយោបាយនៃសាកលវិទ្យាល័យអាតេនីអូឌឺម៉ានីឡា បានប្រាប់សារព័ត៌មានជប៉ុននីកេថា ការចាកចេញរបស់លោក បុង ហ្គោ នឹងធ្វើឱ្យ «កម្លាំងរបស់ ម៉ាកូស និង ឌូតឺតេ រួបរួមគ្នា»។
កូនស្រីរបស់លោក ឌូតឺតេ សម្រេចឈរឈ្មោះជាអនុប្រធានាធិបតីហ្វីលីពីនកាលពីពាក់កណ្ដាលខែវិច្ឆិកា កន្លងទៅ។ លោកស្រីបានចាប់ដៃគូជាមួយបេក្ខភាពប្រធានាធិបតី លោក ម៉ាកូស។
អតីតសមាជិកព្រឹទ្ធសភាហ្វីលីពីនលោក Antonio Trillanes បានប្រាប់សារព័ត៌មាន South China Morning Post ថា លោក ឌូតឺតេ ទំនងជាត្រូវរ៉ូវគ្នាជាមួយ លោក ម៉ាកូស ហើយទើបលោក បុង ហ្គោ លែងឈរជាប្រធានាធិបតីបន្តទៀត។
«ខ្ញុំជឿជាក់ថា ការដកខ្លួនរបស់លោក ហ្គោ នេះ អាចបង្ហាញពីការផ្ដល់សម្បទានគ្នាទៅវិញទៅមករវាងបក្ខពួកលោក បុងបុង ម៉ាកូស និងលោក ឌូតឺតេ។ សម្បទាននេះ គឺការការពារ [លោក ឌូតឺតេ] ពីការកាត់ទោសនានា ដោយរាប់បញ្ចូលទាំងតុលាការព្រហ្មទណ្ឌ ICC ផងដែរ»។ នេះជាការលើកឡើងរបស់លោក Trillanes។
ក្នុងជំនាន់លោក ឌូតឺតេ មានយុទ្ធនាការបង្ក្រាបគ្រឿងញៀនទ្រង់ទ្រាយធំមួយ ដែលបណ្ដាលឱ្យមនុស្សរាប់ពាន់បានបាត់បង់ជីវិត ដោយមិនឆ្លងកាត់តាមផ្លូវតុលាការ។ ជាមួយនឹងករណីនេះដែរកន្លងមក តុលាការ ICC បានប្រកាសធ្វើការស៊ើបអង្កេតលើរឿងនេះ តែក្រោយមកក៏បានផ្អាកជាបណ្ដោះអាសន្ន៕
ហ៊ីម រដ្ឋា