រដ្ឋាភិបាលយោធាមីយ៉ាន់ម៉ា បានដាក់ពាក្យបណ្ដឹងថ្មីប្រឆាំងនឹងលោកស្រី អ៊ុងសាន ស៊ូជី អតីតទីប្រឹក្សារដ្ឋនិងលោក វីន ម្យីន អតីតប្រធានាធិបតីមីយ៉ាន់ម៉ាពីបទល្មើសពុករលួយ។នេះបើតាមការចុះផ្សាយរបស់ទូរទស្សន៍ MRTV ដែលស្ថិតក្រោមការគ្រប់គ្រងរបស់យោធាកាលពីថ្ងៃអង្គារកន្លងទៅ។
ក្នុងបទល្មើសថ្មីនេះ ខាងអាជ្ញាធរយោធាចោទអ្នកនយោបាយស៊ីវិលទាំង ២ រូបនេះថា រំលោភអំណាចរបស់ខ្លួនក្នុងការអនុញ្ញាតឱ្យជួលនិងទិញឧទ្ធម្ភាគចក្រ ដោយមិនសមស្របតាមបទប្បញ្ញត្តិហិរញ្ញវត្ថុរបស់រដ្ឋ។
លោកស្រី អ៊ុងសាន ស៊ូជី រងការប្តឹងជាច្រើនមកហើយក្រោយពីព្រឹត្តិការណ៍រដ្ឋប្រហារខែកុម្ភៈ កន្លងទៅ ដោយបទល្មើសទាំងនោះរាប់ចាប់តាំងពីបទល្មើសនឹងវិន័យជំងឺកូវីដ ១៩ និងការញុះញង់បង្កចលាចលសាធារណៈ។ ទោះជាយ៉ាងណាក៏ដោយ លោកស្រីបានបដិសេធមិនយល់ព្រមទទួលទោសទាំងអស់។
ទាំងខាងយោធា និងខាងមេធាវីរបស់លោកស្រី ស៊ូជី មិនទាន់បកស្រាយអំពីករណីនេះលម្អិតនោះទេ៕
ហ៊ីម រដ្ឋា