.jpg)
ប្រធានក្រុមប្រឹក្សាភិបាលធនាគារកណ្ដាលអាមេរិកលោកជេរ៉ូម ប៉ូវែល។ AFP
កាលពីថ្ងៃអង្គារ ទី ៣០ វិច្ឆិកា តម្លៃភាគហ៊ុនអាមេរិកបានធ្លាក់ចុះយ៉ាងខ្លាំង ដោយសូចនាករទីផ្សារភាគហ៊ុន Dow Jones Industrial Average បានធ្លាក់ចុះជាង ៦៥០ ពិន្ទុ ខណៈពេលដែលវិនិយោគិន កំពុងថ្លឹងថ្លែងអំពីការអន់ថយនៃសេដ្ឋកិច្ចដែលអាចបង្កដោយការរីករាលដាលនៃវីរុសកូរ៉ូណាបំប្លែងថ្មី «អូមីក្រុង»។
នៅក្នុងសក្ខីកម្មនៅចំពោះមុខគណៈកម្មាធិការធនាគាររបស់ព្រឹទ្ធសភាអាមេរិក ប្រធានក្រុមប្រឹក្សាភិបាលធនាគារកណ្ដាលអាមេរិកលោក ជេរ៉ូម ប៉ូវែល បាននិយាយថា៖ «ការកើនឡើងតម្លៃបានរីករាលដាលកាន់តែទូលំទូលាយក្នុងរយៈពេលប៉ុន្មានខែថ្មីៗនេះនៅទូទាំងសេដ្ឋកិច្ច ហើយខ្ញុំគិតថា ហានិភ័យនៃអតិផរណាខ្ពស់បានកើនឡើង»។
លោក ប៉ូវែល បានព្រមានថា ការព្រួយបារម្ភអំពីការរីករាលដាលនៃវីរុសកូរ៉ូណា រួមទាំងបំប្លែង អូមីក្រុង អាចធ្វើឱ្យមនុស្សមានការប្រុងប្រយ័ត្នចំពោះការត្រឡប់ទៅរកការងារដោយផ្ទាល់វិញ។ នោះអាចពន្យឺតការងើបឡើងវិញនៃទីផ្សារការងារ និងអូសបន្លាយការរាំងស្ទះនៃខ្សែចង្វាក់ផ្គត់ផ្គង់ ដែលបានរួមចំណែកដល់ការកើនអតិផរណាខ្ពស់បំផុតក្នុងរយៈពេលជាង ៣ ទសវត្សរ៍ចុងក្រោយនេះ។ លោកនិយាយថា អត្រាអតិផរណាខ្ពស់ទំនងនឹងបន្តចូលទៅឆ្នាំក្រោយទៀត។
ក្រុមប្រឹក្សាភិបាលធនាគារកណ្ដាលអាមេរិកនឹងជួបប្រជុំនៅរយៈពេល ២ សប្ដាហ៍ខាងមុខ ដើម្បីពិភាក្សាវិធានការបន្ទាប់ដើម្បីជួយកាត់បន្ថយអតិផរណា។ លោក ប៉ូវែល នៅពេលនោះគេអាចមានព័ត៌មានបន្ថែមអំពីផលប៉ះពាល់សុខភាពនៃវីរុសបំប្លែងអូមីក្រុង ហើយថាតើវ៉ាក់សាំងនឹងបន្តប្រសិទ្ធភាពដែរឬទេ៕
