កាលពីថ្ងៃអង្គារ ទី ៣០ វិច្ឆិកា ប្រធានាធិបតីរុស្ស៊ី លោក វ៉្លាឌីមៀរ ពូទីន បានព្រមានអង្គការណាតូកុំឱ្យឆ្លង «ខ្សែបន្ទាត់ក្រហម» នៅអ៊ុយក្រែន ដោយសង្កត់ធ្ងន់ថា ប្រទេសរបស់លោកនឹងគ្មានជម្រើសក្រៅពីធ្វើការឆ្លើយតប ខណៈពេលដែលធ្វើការបង្ហាញប្រព័ន្ធមីស៊ីលល្បឿនលឿនជំនាន់ថ្មី។
លោកពូទីននិយាយថាទាហាន ឬប្រព័ន្ធមីស៊ីលទំនើបរបស់ណាតូ ដាក់ពង្រាយនៅដែនដីអ៊ុយក្រែនអាចវាយប្រហារក្រុងម៉ូស្គូក្នុងរយៈពេលប៉ុន្មាននាទីតែប៉ុណ្ណោះ ហើយរុស្ស៊ីចាត់ទុកការធ្វើបែបនេះជាអំពើហួសហេតុ។ អង្គការណាតូមិនទាន់ធ្វើការដាក់ពង្រាយបែបនេះនៅឡើយទេ។
«ប្រសិនបើប្រព័ន្ធវាយប្រហារមួយចំនួនលេចឡើងនៅលើទឹកដីនៃប្រទេសអ៊ុយក្រែន នោះ ពេលវេលាហោះហើរទៅកាន់ទីក្រុងម៉ូស្គូ នឹងមានពី ៧ ទៅ ១០ នាទី និង ៥ នាទីក្នុងករណីអាវុធដែលមានល្បឿនលឿនជាងសំឡេងត្រូវបានដាក់ពង្រាយ។ សាកស្រមៃមើល» លោក ពូទីន និយាយបែបនេះហើយបន្តទៀតថា៖ «តើយើងត្រូវធ្វើអ្វីក្នុងស្ថានភាពបែបនេះ? យើងនឹងត្រូវបង្កើតអ្វីមួយដែលស្រដៀងគ្នានឹងអ្វីដែលគេប្រើប្រាស់គំរាមកំហែងយើង។ ហើយយើងអាចធ្វើវាបានឥឡូវនេះ»។
លោក ពូទីន បាននិយាយបែបនេះក្នុងការបង្ហាញប្រព័ន្ធមីស៊ីលលឿនជាងសំឡេង Zicron ដែលអាចហោះលឿនជាងល្បឿនសំឡេងរហូតទៅដល់ ៩ ដង ហើយនឹងត្រូវបានប្រើប្រាស់ដោយកងទ័ពជើងទឹករុស្ស៊ីចាប់ឆ្នាំ ២០២២ តទៅ។
មីស៊ីលលឿនជាងសំឡេងគឺរចនាឡើងដើម្បីមិនអាចបញ្ឈប់បានដោយប្រព័ន្ធការពារដែនអាកាសបច្ចុប្បន្ន។ ប្រទេសចិន រុស្ស៊ី និងអាមេរិក គឺកំពុងជាប់ក្នុងការប្រកួតប្រណាំងសព្វាវុធ ដើម្បីអភិវឌ្ឍ និងផលិតមីស៊ីលប្រភេទនេះ៕