.jpg)
កាលពីថ្ងៃពុធសប្ដាហ៍នេះ គណៈកម្មការអឺរ៉ុបបានបង្ហាញផែនការវិនិយោគប្រាក់ ៣០០ ពាន់លានអឺរ៉ូ (ប្រមាណ ៣៤០ ពាន់លានដុល្លារ) ក្នុងគម្រោងហេដ្ឋារចនាសម្ព័ន្ធ ឌីជីថល និងអាកាសធាតុនៅជុំវិញពិភពលោក ដើម្បីប្រកួតប្រជែងជាមួយគម្រោងខ្សែក្រវាត់ និងផ្លូវរបស់ចិន។
គម្រោងច្រកទ្វារសកល (Global Gateway) គឺធ្វើឡើងដើម្បីពង្រឹងខ្សែចង្វាក់ផ្គត់ផ្គង់របស់អឺរ៉ុប ជំរុញពាណិជ្ជកម្មសហភាពអឺរ៉ុប ជួយប្រយុទ្ធប្រឆាំងនឹងការប្រែប្រួលអាកាសធាតុដោយផ្ដោតលើផ្នែកឌីជីថល សុខភាព អាកាសធាតុ ថាមពល និងវិស័យដឹកជញ្ជូន ព្រមទាំងវិស័យអប់រំ និងស្រាវជ្រាវ។
ប្រទេសចិន បានចាប់ផ្ដើមគម្រោងខ្សែក្រវាត់ និងផ្លូវរបស់ខ្លួនកាលពីឆ្នាំ ២០១៣ ដើម្បីជំរុញទំនាក់ទំនងពាណិជ្ជកម្មជាមួយពិភពលោក ហើយកំពុងចំណាយយ៉ាងច្រើនលើកិច្ចអភិវឌ្ឍន៍លើហេដ្ឋារចនាសម្ព័ន្ធនៅក្នុងប្រទេសរាប់សិបជុំវិញពិភពលោក។
សហភាពអឺរ៉ុបចាត់ទុកការផ្ដល់ហិរញ្ញប្បទានរបស់ប្រទេសចិនថា មិនមានអំណោយផល មិនមានតម្លាភាព និងធ្វើឱ្យប្រទេសក្រីក្រ ជាពិសេសនៅទ្វីបអាហ្វ្រិកកាន់តែពឹងផ្អែកលើប្រទេសចិន តាមរយៈការជំពាក់បំណុល។
សហភាពអឺរ៉ុបនិយាយថា ពួកគេនឹងធានាថា សហគមន៍មូលដ្ឋានទទួលបានអត្ថប្រយោជន៍ពីគម្រោងហេដ្ឋារចនាសម្ព័ន្ធ ហើយនឹងនាំយកមកជាមួយផងដែរនូវវិស័យឯកជនដែលការចូលរួមរបស់សហភាពអឺរ៉ុបមានន័យថា ការវិនិយោគមិនសូវមានហានិភ័យ។
ថវិការបស់សហភាពអឺរ៉ុបក្នុងទម្រង់ជាជំនួយ កម្ចី និងការធានា នឹងមកពីស្ថាប័ននានារបស់សហភាពអឺរ៉ុប រដ្ឋាភិបាលសមាជិកក៏ដូចជាស្ថាប័នហិរញ្ញវត្ថុសហភាពអឺរ៉ុប និងធនាគារអភិវឌ្ឍន៍របស់សមាជិក។
គណៈកម្មការនេះបាននិយាយថា ប្រាក់ទាំងនោះត្រូវបានផ្តល់ជូន «ក្រោមលក្ខខណ្ឌត្រឹមត្រូវ និងអំណោយផល» ដើម្បីកុំឱ្យរដ្ឋាភិបាលប្រទេសទី៣ មានបញ្ហាបំណុល៕
