.jpg)
លោក TedrosAdhanom Ghebreyesus ប្រធានអង្គការសុខភាពពិភពលោក។ រូបថត AFP
កាលពីថ្ងៃពុធកន្លងទៅ វ៉ារ៉្យង់អូមីក្រុង បានរីករាលដាលទៅដល់សហរដ្ឋអាមេរិកហើយទន្ទឹមនឹងនេះ អង្គការសុខភាពពិភពលោក (WHO) ក៏កំពុងស្តីបន្ទោសប្រទេសអ្នកមានដែលបានដាក់បម្រាម ការធ្វើដំណើរ និងបន្តអនុវត្តយុទ្ធនាការចាក់ដូសជំនួយក្នុងប្រទេស ខណៈមនុស្សរាប់ពាន់លាននាក់នៅក្នុងប្រទេសក្រីក្រ មិនទាន់បានទទួលការចាក់វ៉ាក់សាំងជាលើកដំបូងនៅឡើយ។
ការលើកឡើងរបស់អង្គការសុខភាពពិភពលោក (WHO) សួរសំណួរឡើងវិញអំពីទង្វើមិនស្មើគ្នានៃរបៀបដែលពិភពលោកដោះស្រាយបញ្ហាជំងឺរាតត្បាតទាក់ទិននឹងលទ្ធភាពនៃការទទួលបានវ៉ាក់សាំង រវាងប្រទេសអ្នកមាន និងប្រទេសក្រីក្រកាលពីដើមឆ្នាំនេះ។
ប្រភពដដែលបានឱ្យដឹងថា ស្របពេលមានរលកថ្មី មេដឹកនាំនៅអឺរ៉ុប អាស៊ី និងសហរដ្ឋអាមេរិក ព្យាយាមការពារប្រជាជនរបស់ពួកគេពីវ៉ារ្យ៉ង់មិនស្គាល់ ដោយខំប្រឹងស្រោចវ៉ាក់សាំង ដើម្បីការពារ ប្រជាជនខ្លួន និងបន្ថែមការរឹតបន្តឹងលើការធ្វើដំណើរទៀតផង។
អ្នកធ្វើដំណើរ មានភាពស្រពេចស្រពិល និងការស្រងាកចិត្តចំពោះព័ត៌មានដែលថា សហរដ្ឋអាមេរិកគ្រោងនឹងរឹតបន្តឹងវិធានធ្វើដំណើរ ដោយតម្រូវការធ្វើតេស្ត និងការត្រួតពិនិត្យអ្នកដំណើរដែលចូលមក។ ការសម្រេចចិត្តនោះបានកើតឡើងបន្ទាប់ពី ប្រទេសជប៉ុន អ៊ីស្រាអែល និងម៉ារ៉ុក បានរារាំងអ្នកដំណើរបរទេស ហើយអូស្ត្រាលី បានពន្យារពេលការបើកព្រំដែនរបស់ខ្លួនឡើងវិញរយៈពេល ២ សប្តាហ៍។
អង្គការ WHO ក៏បានបន្ថែមសំឡេងរបស់ខ្លួន ចំពោះការជំទាស់ ដោយហៅការរឹតបន្តឹងការធ្វើដំណើរ សម្រាប់បណ្តាប្រទេសអាហ្វ្រិកខាងត្បូងថា គ្មានប្រសិទ្ធភាព និងអយុត្តិធម៌។
លោក TedrosAdhanom Ghebreyesus អគ្គនាយកអង្គការ WHO បាននិយាយនៅក្នុងសន្និសីទសារព័ត៌មាននៅទីក្រុងហ្សឺងណែវថា៖ «ការហាមឃាត់ការធ្វើដំណើរ នឹងមិនរារាំងការរីករាលដាលនៃវ៉ារ៉្យង់អូមីក្រុនទេ ហើយវិធានការនេះអាចដាក់បន្ទុកយ៉ាងធ្ងន់ធ្ងរដល់ជីវិត និងជីវភាពរស់នៅ»។
លោកបានសរសើរប្រទេស Botswana និងអាហ្វ្រិកខាងត្បូង ដែលជាប្រទេសរកឃើញករណីអូមីក្រុងដំបូងបំផុតកាលពីខែមុន សម្រាប់ការរាយការណ៍ភ្លាមៗដល់អាជ្ញាធរសុខាភិបាលអន្តរជាតិ។ លោកបានមានប្រសាសន៍ថា៖ «យើងមានការព្រួយបារម្ភយ៉ាងខ្លាំង ចំពោះខ្ញុំដែលប្រទេសទាំងនេះ ត្រូវទទួលរងផលវិបាកពីប្រទេសដទៃ ដែលហាក់ដូចធ្វើបាបប្រទេសនេះ»។
ក្រុមមន្ត្រីផ្សេងទៀតនៃស្ថាប័នដដែល បាននិយាយថា៖«ការហាមប្រាមលើបណ្តាប្រទេសអាហ្វ្រិកខាងត្បូង ដោយសហរដ្ឋអាមេរិក និងបណ្តាប្រទេសនៅអឺរ៉ុបនឹងរារាំងកិច្ចខិតខំប្រឹងប្រែង ដើម្បីប្រយុទ្ធប្រឆាំងនឹងវ៉ារ៉្យង់នេះ ដោយសារគំរូជីវសាស្រ្តមិនអាចដឹកជញ្ជូនចេញពីប្រទេសទាំងនោះបានទេ»។
ក្រុមមន្ត្រី ដដែលបាននិយាយថា មិនទាន់មានភ័ស្តុតាងបញ្ជាក់ថា ដូសជំនួយអាចជួយកាត់បន្ថយការឆ្លង និងការសម្រាកព្យាបាលនៅមន្ទីរពេទ្យ ចំពោះអ្នកដែលឆ្លងមេរោគនេះទេ។ ដូច្នេះ វ៉ាក់សាំងបម្រុង ដែលស្តុកទុក ដោយចក្រភពអង់គ្លេស និងប្រទេសផ្សេងទៀត គួរតែយកមកប្រើប្រាស់លើប្រទេស ដែលមានចំនួនប្រជាជនច្រើន មិនទាន់បានចាក់វ៉ាក់សាំង។
ជាមួយនេះ អង្គការ WHO នឹងបង្កើតស្ថាប័នចរចាមួយ ដើម្បីចាប់ផ្តើមចេញនូវកិច្ចព្រមព្រៀងអន្តរជាតិ ដែលមានបំណងធានាឱ្យបាននូវការឆ្លើយតបកាន់តែស៊ីចង្វាក់គ្នានិងសមភាពវ៉ាក់សាំង ដើម្បីត្រៀមសម្រាប់ការផ្ទុះឡើងករណីថ្មីនាពេលអនាគត។
លោកស្រី Devi Sridhar ប្រធានកម្មវិធីសុខភាពសាធារណៈសាកលនៅសាកលវិទ្យាល័យ Edinburgh បាននិយាយថា៖ «ការរឹតបន្តឹង ការធ្វើដំណើរអាចពន្យារការនាំចូល និងការរីករាលដាលនៃវ៉ារ៉្យង់ ប៉ុន្តែមិនអាចបញ្ឈប់វា បានទាំងស្រុងទេ។ វ៉ារ្យ៉ង់នេះ នឹងត្រូវបានរកឃើញស្ទើរតែគ្រប់ទីកន្លែង ក្នុងប៉ុន្មានថ្ងៃខាងមុខនេះ»។
លោកស្រីបាននិយាយថា៖ «អ្វីដែលសំខាន់គឺអត្រានៃការឆ្លង និងថា តើអូមីក្រុងអាចយកឈ្នះវ៉ារ្យ៉ង់ ដែលតា ដើម្បីបង្កើតខ្លួនវាជាប្រភេទមេរោគលេចធ្លោឬ អត់?»៕
