.jpg)
អ្នកស្រីMaria Ressa ស្ថាបនិកសារព័ត៌មានRappler។ AFP
តុលាការឧទ្ធរណ៍ហ្វីលីពីន កាលពីថ្ងៃសុក្រកន្លងទៅបានអនុញ្ញាតឱ្យអ្នកស្រី Maria Ressa ជាស្ថាបនិកសារព័ត៌មាន Rappler ធ្វើដំណើរទៅកាន់ប្រទេសន័រវែសដើម្បីទទួលពានណូបែលសន្តិភាព។
អ្នកស្រីRessaនិងសារព័ត៌មានRapplerបានរងពាក្យបណ្ដឹងពាក់ព័ន្ធរឿងគេចពន្ធនិងបទល្មើសជាច្រើនទៀត ហើយកាលពីឆ្នាំ២០២០ កន្លងទៅ តុលាការបានកាត់ទោសឱ្យអ្នកស្រីជាប់ពន្ធនាគារចំនួន៦ឆ្នាំ ក្រោមបទល្មើសបរិហារកេរ្តិ៍តាមប្រព័ន្ធអនឡាញ។ក្រោយមកអ្នកស្រីត្រូវបានដោះលែងដោយស្ថិតក្រោមការឃ្លាំមើលរបស់តុលាការ។
អ្នកតាមដានស្ថានភាពក្នុងស្រុកហ្វីលីពីនជាច្រើនយល់ឃើញថា អ្នកស្រីRessaជាអ្នករិះគន់យ៉ាងចាស់ដៃចំពោះគោលនយោបាយរបស់លោកប្រធានាធិបតីហ្វីលីពីនរ៉ូឌ្រីហ្គោ ឌូតឺតេ ជាពិសេសគឺគោលនយោបាយសង្គ្រាមប្រឆាំងនឹងគ្រឿងញៀននេះតែម្ដង។
កាលពីខែតុលាកន្លងទៅ អ្នកស្រីបានឈ្នះពានណូបែលសន្តិភាពជាមួយនឹងអ្នកកាសែតជនជាតិរុស្ស៊ីដោយគណៈកម្មការណូបែលន័រវែស បានចាត់ទុកអ្នកកាសែតទាំង២ជាអ្នកការពារសេរីភាពក្នុងការបញ្ចេញមតិពិភពលោក។
ការប្រគល់ពានណូបែលសន្តិភាពក្នុងឆ្នាំ២០២១នេះ នឹងធ្វើឡើងផ្ទាល់នៅឯទីក្រុងអូស្លូប្រទេសន័រវែស នៅថ្ងៃទី១០ខែធ្នូ។
ស្ថិតក្នុងទិដ្ឋភាពនេះដែរតុលាការឧទ្ធរណ៍ហ្វីលីពីនក៏សម្រេចឱ្យអ្នកស្រីRessaចាកចេញពីប្រទេសរយៈពេល៥ថ្ងៃ ដើម្បីទៅទទួលពានណូបែលសន្តិភាព៕
ហ៊ីម រដ្ឋា
