.jpg)
លោកអេម៉ានុយអែល ម៉ាក្រុង ថ្លែងនៅកាន់អ្នកកាសែតនីព្រលានយន្តហោះអន្តរជាតិ King Abdulaziz ក្នុងទីក្រុងជេដដាហ៍កាលពីថ្ងៃទី៤ ធ្នូ។ AFP
ដូហា: ប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron)រៀបរាប់កាលពីថ្ងៃសៅរ៍ថា ប្រទេសមួយចំនួននៅអឺរ៉ុបកំពុងធ្វើការលើការបើកបេសកកម្មការទូតរួមគ្នាជាមួយបារាំងនៅក្នុងប្រទេសអាហ្វហ្គានីស្ថាន ដែលអាចឱ្យឯកអគ្គរដ្ឋទូតរបស់ខ្លួនវិលត្រឡប់មកកាន់ប្រទេសកំណើតវិញ។
លោកMacron ប្រាប់អ្នកយកព័ត៌មាននៅរាជធានីដូហាប្រទេសកាតាមុនពេលធ្វើដំណើរទៅកាន់ទីក្រុងJeddah ប្រទេសអារ៉ាប៊ី សាអ៊ូឌីតថា៖ «យើងកំពុងគិតពីអង្គការមួយរវាងប្រទេសអឺរ៉ុបនានា ពីទីតាំងទូទៅសម្រាប់ជនជាតិអឺរ៉ុបមួយចំនួន ដែលនឹងអនុញ្ញាតឱ្យឯកអគ្គរដ្ឋទូតរបស់យើងមានវត្តមាន»។
បណ្តាប្រទេសលោកខាងលិច កំពុងរិះរកវិធីដើម្បីចូលរួមជាមួយពួកតាលីបង់ បន្ទាប់ពីក្រុមនេះ ចូលកាន់កាប់ប្រទេសអាហ្វហ្គានីស្ថានកាលពីខែសីហា ក្រោយអាមេរិកបញ្ចប់ការដកទ័ពរបស់ខ្លួន។ សហរដ្ឋអាមេរិក និងលោកខាងលិចផ្សេងទៀត បានបិទស្ថានទូត និងដកអ្នកការទូតរបស់ខ្លួនចេញ ពេលដែលតាលីបង់ដណ្តើមបានរដ្ឋធានីកាប៊ុល និងប្រកាសពីរដ្ឋាភិបាលបណ្តោះអាសន្នដែលសមាជិកកំពូលស្ថិតនៅក្រោមទណ្ឌកម្មក្រុងវ៉ាស៊ីនតោន និងអង្គការសហប្រជាជាតិ។
ប្រទេសនានាមានការស្ទាក់ស្ទើរក្នុងការទទួលស្គាល់រដ្ឋាភិបាលរបស់ក្រុមតាលីបង់ដែលគ្រប់គ្រងភាគច្រើនដោយក្រុមជនជាតិPashtun ជាផ្លូវការ ដោយចោទប្រកាន់ពួកគេថាមិនធ្វើតាមការសន្យានៃការរួមបញ្ចូលគ្នាផ្នែកនយោបាយ និងជនជាតិភាគតិចចម្រុះ រួមទាំងការលើកកម្ពស់សិទ្ធិស្ត្រី និងជនជាតិភាគតិច។
លោក Macronលើកឡើងថា៖ «នេះគឺជាការបោះជំហានខុសពីការទទួលស្គាល់នយោបាយ ឬកិច្ចសន្ទនានយោបាយជាមួយពួកតាលីបង់។ យើងនឹងមានការតំណាងភ្លាមៗតាមដែលយើងអាចបើក បាន»។
ក្នុងសេចក្តីថ្លែងការណ៍មួយបន្ទាប់ពីកិច្ចពិភាក្សាជាមួយពួកតាលីបង់កាលពី១សប្តាហ៍មុន សហភាពអឺរ៉ុបស្នើថា ខ្លួនអាចបើកបេសកកម្មក្នុងពេលឆាប់ៗនេះ។កាលពីថ្ងៃសុក្រ រដ្ឋាភិបាលបារាំងប្រកាសដាច់ដោយឡែកពីគ្នាថា ខ្លួនអនុវត្តបេសកកម្មជម្លៀសប្រជាជនពីអាហ្វហ្គានីស្ថាន ដោយមានជំនួយពីកាតា ដោយនាំមនុស្សចេញពីប្រទេសនេះជាង ៣០០ នាក់ដែលភាគច្រើនជាជនជាតិអាហ្វហ្គានីស្ថាន៕
ហួន ឌីណា
