.jpg)
អ្នកតវ៉ាកាន់ទង់ជាតិសហជីពនិស្សិតក្រុងយុំាងហ្គោនខណៈពួកគេចូលរួមបាតុកម្មប្រឆាំងរដ្ឋប្រហារយោធា។ AFP
កាលពីថ្ងៃអាទិត្យ ទី៥ ធ្នូម នុស្សយ៉ាងតិច ៥នាក់ បានស្លាប់នៅពេលដែលរថយន្តយោធាមួយគ្រឿងបើកទៅបុកក្រុមបាតុករនៅក្រុងយ៉ាំងហ្គោន។ នេះបើតាមការរាយការណ៍ដោយសារព័ត៌មានមីយ៉ាន់ម៉ាដោយផ្អែកទៅលើការលើកឡើងរបស់បាតុករ និងសាក្សី។
បើតាមសេចក្ដីថ្លែងការណ៍មួយរបស់យោធាមីយ៉ាន់ម៉ា បាតុករចំនួន ១១នាក់ ត្រូវបានចាប់ខ្លួននៅកន្លែងកើតហេតុ ដោយរួមមានបាតុកររងរបួសចំនួន៣នាក់ ប៉ុន្តែមិនបានទទួលស្គាល់ការស្លាប់ដែលត្រូវបានរាយការណ៍ ឬការបើកបុកនេះទេ។
បេសកកម្មអង្គការសហប្រជាជាតិនៅមីយ៉ាន់ម៉ាបានចេញសេចក្ដីថ្លែងការណ៍មួយថ្កោលទោស «ការវាយប្រហារលើជនស៊ីវិលដែលគ្មានអាវុធជាច្រើននាក់នៅខណ្ឌគីមយិនដាងទីក្រុងយ៉ាំងហ្គោន ដែលក្នុងនោះរថយន្តរបស់កងកម្លាំងសន្តិសុខបានបើកទៅបុកក្រុមបាតុករ ដែលក្រោយមករងការបាញ់ប្រហារគ្រាប់ពិត បង្កឱ្យមានការស្លាប់ និងរបួសជាច្រើននាក់»។
ស្ថានទូតអាមេរិកក៏បានប្រតិកម្មផងដែរ ដោយបាននិយាយថា ពួកគេមាន «ការរន្ធត់ចិត្តចំពោះរបាយការណ៍ថា កងកម្លាំងសន្តិសុខបានបើកការបាញ់ប្រហារ បើកបុកកិន និងសម្លាប់បាតុករច្រើននាក់នៅព្រឹកនេះនៅទីក្រុងយ៉ាំងហ្គោន»។ ពួកគេបន្តទៀតថា៖ «យើងគាំទ្រសិទ្ធិរបស់ប្រជាជនភូមាក្នុងការតវ៉ាដោយសន្តិវិធី»។
ឧបទ្ទវហេតុនេះកើតឡើង ខណៈពេលដែលប្រទេសមីយ៉ាន់ម៉ា កំពុងរងចាំសាលក្រមនៃការកាត់ក្ដីមេដឹកនាំស៊ីវិលលោកស្រីអ៊ុងសាន ស៊ូជី ដែលប្រឈមមុខនឹងការចោទប្រកាន់ច្រើនរួមមានពីបទការញុះញង់ និងការរំលោភវិធានការកូវីដ១៩។ លោកស្រី បានច្រានចោលការចោទប្រកាន់ទាំងនេះ៕
