.jpg)
អ្នកទិញទំនិញខ្លះពាក់ម៉ាស់ដើរតាមបណ្តោយផ្លូវOxford នៅក្នុងទីក្រុងឡុងដ៍ ខណៈការពាក់ម៉ាស់ត្រូវបានណែនាំជាថ្មីដើម្បីទប់ស្កាត់វ៉ារ្យ៉ង់ថ្មីអូមីក្រុង។ AFP
ករណីចំនួនឆ្លងវ៉ារ្យ៉ង់អូមីក្រុងកើនឡើងខ្លាំងនៅក្នុងប្រទេសអង់គ្លេស និងដាណឺម៉ាកកាលពីថ្ងៃអាទិត្យ ខណៈអ្នកវិទ្យាសាស្ត្រ មានភាពភ័យខ្លាច ដោយសារតែវ៉ារ្យ៉ង់នេះ កាន់តែរីករាលដាលទូលំទូលាយរួចទៅហើយ បើទោះបីជាមានការហាមឃាត់ការធ្វើដំណើរហើយក្ដី។
វ៉ារ្យ៉ង់នេះត្រូវបានគេរកឃើញនៅក្នុងប្រទេសយ៉ាងហោចណាស់ចំនួន ៤៥ នៅទូទាំងពិភពលោកដោយសហរដ្ឋអាមេរិក និងប្រទេសនៅទ្វីបអឺរ៉ុបភាគច្រើន បានរាយការណ៍អំពីករណីថ្មីមួយចំនួនក្នុងរយៈពេលប៉ុន្មានថ្ងៃថ្មីៗនេះ។
កាលពីថ្ងៃអាទិត្យកន្លងទៅ ទីភ្នាក់ងារសន្តិសុខសុខភាពរបស់ចក្រភពអង់គ្លេស បានបញ្ជាក់ថាថ្មីៗនេះ ខ្លួនបានរកឃើញករណីឆ្លងវីរុសនេះចំនួន ២៤៦ ករណី ពោលគឺមានចំនួនជិត២ដងនៃចំនួនករណីសរុបដែលបានរាយការណ៍កាលពីថ្ងៃសុក្រសប្ដាហ៍មុន។
ដោយឡែកនៅប្រទេសដាណឺម៉ាក អាជ្ញាធរសុខាភិបាលក្នុងតំបន់ បានបញ្ជាក់ថា អាជ្ញាធរបានរកឃើញករណីឆ្លងចំនួន ១៨៣ ករណី ឬមានច្រើនជាង ៣ ដងនៃចំនួនករណីសរុបដែលបានរាយការណ៍កាលពីថ្ងៃ សុក្រដែលតួលេខនេះ ត្រូវបានគេចាត់ទុកថា ច្រើនខ្លាំងគួរបារម្ភ។
តួលេខនេះ បង្កឱ្យមានការភ្ញាក់ផ្អើល ដោយហេតុតែប្រទេសទាំង ២ ត្រូវបានគេទទួលស្គាល់ទូលំទូលាយថា ជាប្រទេសនាំមុខគេក្នុងការធ្វើចំណាត់ថ្នាក់ហ្សែ៊ន និងការធ្វើតេស្ត។ ក្នុងប្រទេសអង់គ្លេស អ្នកវិទ្យាសាស្ត្រកំពុងផ្តោតលើការចាត់ថ្នាក់ហ្ស៊ែនរបស់ពួកគេលើអ្នកដំណើរអន្តរជាតិ និងទំនាក់ទំនងរបស់អ្នកដែលបានឆ្លងវ៉ារ្យ៉ង់អូមីក្រុងរួចហើយ។
យ៉ាងណាមិញមានការលើកជាមន្ទិលជាច្រើនអំពីវ៉ារ្យ៉ង់ រួមទាំងសំណួរដែលថា តើវ៉ារ្យ៉ង់ឆ្លងបានកម្រិតណា? តើវ៉ាក់សាំងនឹងទប់ទល់ វ៉ារ្យ៉ង់បានល្អប៉ុនណា? និងថាតើវាទំនងជាបង្កជំងឺធ្ងន់ធ្ងរប៉ុនណា? ទោះយ៉ាងណា គេឃើញមានសញ្ញាដំបូងមួយចំនួនដែលថាវ៉ារ្យ៉ង់អូមីក្រុងអាចបណ្តាលឱ្យមានជំងឺស្រាលប៉ុណ្ណោះ ទោះបីជាការសង្កេតនោះផ្អែកលើករណីភាគច្រើននៅអ្រាហ្វិកខាងត្បូងក្នុងចំណោមមនុស្សវ័យក្មេងដែលទំនងជាមិនសូវឈឺធ្ងន់ធ្ងរពីកូវីដក៏ដោយ។
មកដល់ពេលនេះ អ្នកវិទ្យាសាស្ត្រនិយាយថា គេមិនទាន់រកឃើញហេតុផលដើម្បីជឿថា វ៉ារ្យ៉ង់អូមីក្រុងមានឥទ្ធិពលជាងវ៉ាក់សាំងដែលមានស្រាប់នោះទេ ទោះបីជាគេនៅមិនទាន់រកឃើញពីប្រសិទ្ធភាពវ៉ាក់សាំង ទៅលើវ៉ារ្យ៉ង់ ដែលមិនទាន់ស្គាល់ពិតប្រាកដឡើយ។
លោកវេជ្ជបណ្ឌិត Michael Osterholm នាយកមជ្ឈមណ្ឌលស្រាវជ្រាវ និងគោលនយោបាយជំងឺឆ្លងនៅសាកលវិទ្យាល័យ Minnesota បាននិយាយថា៖ «យើងនឹងឃើញករណីឆ្លងក្នុងចំនួនធំក្នុងរយៈពេលប៉ុន្មានសប្តាហ៍ខាងមុខនេះ នៅក្នុងប្រទេសនានាជុំវិញពិភពលោក។ វាមិនមែនជារឿងគួរឱ្យភ្ញាក់ផ្អើលទេ។ មេរោគនេះគ្រាន់តែដើរតួដូចជាមេរោគផ្លូវដង្ហើមដែលអាចចម្លងបានខ្ពស់ប៉ុណ្ណោះ»។
យោងតាមការផ្តោតលើការពិសោធន៍ឡាស៊ែរថ្មីរបស់មន្ត្រីសុខាភិបាលសាធារណៈវ៉ារ្យ៉ង់ ដែលបណ្ដាលឱ្យមានការកើនឡើងចំនួនឆ្លង អាចជាភ័ស្តុតាងដំបូងបង្ហាញថាអាចរីករាលដាលលឿនជាងវ៉ារ្យ៉ង់ ដែលតាដែលជាវ៉ារ្យ៉ង់កាចសាហាវបំផុតកន្លងមក។
លោកវេជ្ជបណ្ឌិត Osterholmបាននិយាយថា៖ «នៅពេលដែលអ្នករកឃើញនរណាម្នាក់ ដែលឆ្លងមេរោគ ហើយអ្នកចាប់ផ្តើមមើលទំនាក់ទំនងរបស់ពួកគេ ឬបរិយាកាសដែលពួកគេកំពុងនៅក្នុងនោះអ្នកនឹងរកឃើញច្រើនទៀត»។
លោកវេជ្ជបណ្ឌិត Peter J. Hotez ព្រឹទ្ធបុរសនៃសាលាជាតិវេជ្ជសាស្ត្រត្រូពិកនៃមហាវិទ្យាល័យវេជ្ជសាស្ត្រ Baylor បាននិយាយថា៖ «ករណីឆ្លងអូមីក្រុងមានតិចតួចណាស់នៅពេលនេះ ដែលវាពិបាកក្នុងការដឹងថា តើកើនឡើងប៉ុន្មានក្នុងប្រទេសអង់គ្លេស និងនៅដាណឺម៉ាក? ២០០-៣០០ ករណី នៅតែជាចំនួនតូចបើប្រៀបនឹងចំនួនករណីឆ្លងប្រហែល ៤៤ ០០០ ករណីជាមធ្យមនៅចក្រភពអង់គ្លេសរៀងរាល់ថ្ងៃ»។
ប៉ុន្តែបើទោះបីជាការរកឃើញ នៃវ៉ារ្យ៉ង់ថ្មីនេះស្ថិតនៅក្នុងភាពមិនប្រាកដប្រជាក្ដី អ្នកជំនាញផ្នែកសុខភាពសាធារណៈមួយចំនួនកំពុងបង្កើនការជូនដំណឹងថា ការរឹតបន្តឹងការធ្វើដំណើរដែលមាននៅក្នុងភាគច្រើននៃទ្វីបអឺរ៉ុប ដើម្បីប្រឆាំងនឹងវ៉ារ្យ៉ង់នេះ នៅតែមិនគ្រប់គ្រាន់ ដើម្បីទប់ស្កាត់ការកើនឡើងនៃករណីឆ្លងមេរោគដែលបានកើតឡើងរួចហើយ។
លោក Jeremy Farrar នាយកនៃវិទ្យាសា្ថន Wellcome Trust និងជាអតីតសមាជិកនៃស្ថាប័នប្រឹក្សាវិទ្យាសាស្ត្ររបស់រដ្ឋាភិបាលអង់គ្លេសបានសរសេរនៅក្នុងគេហទំព័រ The Observer ថា ការកើនឡើងនៃអូមីក្រុង គឺជាសញ្ញាមួយដែលថា អូមីក្រុងកំពុងមានវឌ្ឍនភាពដ៏គួរឱ្យភ្ញាក់ផ្អើល។ យ៉ាងណាមិញ វ៉ារ្យ៉ង់នេះរំឭកយើងទាំងអស់គ្នាថា យើងនៅតែខិតទៅជិតការចាប់ផ្តើមនៃជំងឺរាតត្បាតជាជាងចុងបញ្ចប់»៕
វីដេអូ៖
