.jpg)
ក្មេងស្រីអាហ្វហ្គានីស្ថាន កំពុងអង្គុយរៀនក្នុងថ្នាក់នៅសាលាអនុវិទ្យាល័យ ១ នៅក្នុងភូមិ Nawwabad។ AFP
រដ្ឋមន្ត្រីការបរទេសកាតារំឭកឡើងវិញនូវជំហររបស់ប្រទេសលោកក្នុងការជួយដោះស្រាយបញ្ហានៅប្រទេសអាហ្វហ្គានីស្ថាន ដោយនិយាយថា ទីក្រុងដូហានឹងបន្តធ្វើការឆ្ពោះទៅរកការពង្រឹងកិច្ចខិតខំប្រឹងប្រែងផ្នែកមនុស្សធម៌ និងសេដ្ឋកិច្ចនៅក្នុងប្រទេសដែលហែកហួរដោយសង្គ្រាម។
នៅក្នុងសន្និសីទសារព័ត៌មានកាលពីថ្ងៃចន្ទ នៅរាជធានីដូហា ប្រទេសកាតារដ្ឋមន្ត្រីការបរទេសកាតាសេក ម៉ូហាម៉ាដ ប៊ីន អាប់ឌុលរ៉ាម៉ាន អាល់ថានីបាននិយាយថា កាតានឹងធ្វើការជាមួយសម្ព័ន្ធមិត្តតួកគី និងមន្ត្រីតាលីបង់ដើម្បីធានាថាអាកាសយានដ្ឋានអន្តរជាតិក្រុងកាប៊ុល នៅបន្តដំណើរការ។
រីឯរដ្ឋមន្ត្រីការបរទេសតួកគីលោក មេវលូត កាវូសូលូ បាននិយាយថា តួកគីចង់ធ្វើការសម្រាប់ «សន្តិភាព និងស្ថិរភាព» នៅក្នុងប្រទេសអាហ្វហ្គានីស្ថាន ខណៈពេលដែលលោកបានជំរុញសហគមន៍អន្តរជាតិឱ្យចូលរួមក្នុងកិច្ចសន្ទនាជាមួយតាលីបង់ ហើយបានអំពាវនាវឱ្យពួកគេ «បែងចែក» រវាងផ្នែកនយោបាយ និងផ្នែកមនុស្សធម៌។
«នេះគឺជាអ្វីដែលយើងបានធ្វើ ខណៈពេលដែលជនជាតិអាហ្វហ្គានីស្ថាន កំពុងត្រូវការជំនួយមនុស្សធម៌ជាបន្ទាន់» លោក កាវូសូលូ និយាយបែបនេះហើយបន្តទៀតថា តួកគីកំពុងសហការជាមួយកាតាលើការផ្ដល់ជំនួយមនុស្សធម៌ និងលើការធានាឱ្យអាកាសយានដ្ឋានកាប៊ុលនៅតែដំណើរការ។
បន្ទាប់ពីការដួលរលំរដ្ឋាភិបាលគាំទ្រដោយលោកខាងលិច និងការចូលកាន់អំណាចរបស់ក្រុមតាលីបង់កាលពីខែសីហា ប្រទេសអាហ្វហ្គានីស្ថានបានប្រឈមមុខ នឹងបញ្ហាសេដ្ឋកិច្ច និងវិបត្តិក្រីក្រដ៏ធ្ងន់ធ្ងរ ខណៈលោកខាងលិចបានដកបេសកកម្មការទូត ហើយជាមួយធនាគារពិភពលោក និងមូលនិធិរូបិយវត្ថុអន្តរជាតិបានកាត់ផ្ដាច់ជំនួយមនុស្សធម៌ ទៅកាន់ប្រទេសដែលរំពឹងលើជំនួយខ្លាំងជាងគេក្នុងពិភពលោក។
បញ្ហាសេដ្ឋកិច្ចបានធ្វើឱ្យប្រទេសអាហ្វហ្គានីស្ថាន ប្រឈមមុខនឹងគ្រោះទុរ្ភិក្សដ៏ធ្ងន់ធ្ងរដោយគេប៉ាន់ស្មានថា កុមាររាប់លាននាក់អាចស្លាប់ដោយសារការអត់ឃ្លាននៅរដូវរងានេះ ដែលជាតួលេខមួយធំជាងចំនួនជនស៊ីវិលស្លាប់ក្នុងសង្គ្រាម ២០ ឆ្នាំចុងក្រោយនេះ។
ខណៈពេលដែលប្រទេសអាហ្វហ្គានីស្ថានបានទទួលរងពីកង្វះអាហារូបត្ថម្ភអស់ជាច្រើនទសវត្សរ៍មកហើយ វិបត្តិភាពអត់ឃ្លានរបស់ប្រទេសនេះបានកាន់តែអាក្រក់ទៅៗក្នុងរយៈពេលប៉ុន្មានខែថ្មីៗនេះ។ រដូវរងានេះ ប្រជាជនប្រមាណ ២២,៨ លាននាក់ ដែលច្រើនជាងពាក់កណ្តាលនៃចំនួនប្រជាជនសរុប ត្រូវបានគេព្យាករថានឹងប្រឈមមុខនឹងអសន្តិសុខស្បៀង ដល់កម្រិតគ្រោះថ្នាក់ដល់អាយុជីវិត។ នេះបើយោងតាមការវិភាគរបស់កម្មវិធីស្បៀងអាហារពិភពលោក (WFP) និងអង្គការ ស្បៀងអាហារ និងកសិកម្ម (FAO) របស់អង្គការសហប្រជាជាតិ។ ក្នុងចំណោមនោះមានមនុស្ស ៨,៧ លាននាក់ជិតជួបគ្រោះទុរ្ភិក្សដែលជាដំណាក់កាលដ៏អាក្រក់បំផុតនៃវិបត្តិអាហារ។
បន្ថែមពីលើនេះទៅទៀត ប្រទេសអាហ្វហ្គានីស្ថាន បានជួបប្រទះនឹងគ្រោះរាំងស្ងួតដ៏អាក្រក់បំផុតក្នុងរយៈពេលជាច្រើនឆ្នាំ ដែលធ្វើឱ្យវាលស្រែស្វិតក្រៀមក្រំ ធ្វើឱ្យសត្វពាហនៈអត់ឃ្លាន និងធ្វើឱ្យប្រព័ន្ធធារាសាស្ត្ររាំងស្ងួត។ យោងតាមអង្គការសហប្រជាជាតិ ការប្រមូលផលស្រូវសាលីរបស់ប្រទេសអាហ្វហ្គានីស្ថាននៅឆ្នាំនេះ ត្រូវបានគេព្យាករថានឹងទាបជាងមធ្យមរហូតទៅដល់ ២៥ ភាគរយ។ នៅតំបន់ជនបទ ដែលជាលំនៅរបស់ប្រហែល ៧០ ភាគរយ កសិករជាច្រើនបានបោះបង់ចោលការដាំដុះលើដីរបស់ពួកគេ។
ចាប់តាំងពីតាលីបង់ចូលកាន់អំណាច អាមេរិក និងលោកខាងលិចបានប្រឈមនឹងសំណួរ ថាតើធ្វើដូចម្ដេចដើម្បីបញ្ចៀសគ្រោះមហន្តរាយនៅអាហ្វហ្គានីស្ថាន? ដោយមិនផ្ដល់ការទទួលស្គាល់ ឬដកទណ្ឌកម្ម ឬផ្ដល់ជំនួយឱ្យក្រុមតាលីបង់។
ប៉ុន្តែខណៈពេលដែលស្ថានភាពកាន់តែលំបាកជាងមុន អង្គការជំនួយមនុស្សធម៌បានដាក់សម្ពាធឱ្យអាមេរិកចាត់វិធានការជួយ។
កាលពីសប្ដាហ៍មុនក្រុមប្រឹក្សាភិបាលធនាគារពិភពលោក ដោយមានអាមេរិកជាសមាជិកបានសម្រេចរំដោះទឹកប្រាក់ចំនួន ២៨០ លានដុល្លារនៅក្នុងមូលនិធិម្ចាស់ជំនួយសម្រាប់កម្មវិធីស្បៀងអាហារពិភពលោក និងអង្គការយូនីសេហ្វ។ បើទោះជាយ៉ាងនេះក៏ដោយ នេះគឺជាបំណែកតូចមួយនៃទឹកប្រាក់ចំនួន ១,៥ ពាន់លានដុល្លារ ដែលត្រូវបានបង្កកដោយធនាគារពិភពលោកក្រោមការទាមទាររបស់អាមេរិក។
គេនៅមិនទាន់ដឹងថា ទឹកប្រាក់ជំនួយសង្គ្រោះនេះនឹងត្រូវបញ្ជូនទៅប្រទេសអាហ្វហ្គានីស្ថានតាមរបៀបណាទេ៕
