កាលពីថ្ងៃចន្ទ មន្ត្រីសុខាភិបាលបាននិយាយ ប្រទេសថៃ បានរកឃើញករណីដំបូងវ៉ារ្យ៉ង់លើពលរដ្ឋអាមេរិក ដែលបានធ្វើដំណើរពីប្រទេសអេស្ប៉ាញរមកប្រទេសនេះកាលពីចុងខែមុននេះ។
លោក Opas Karnkawinpong អគ្គនាយកនៃអគ្គនាយកដ្ឋានគ្រប់គ្រងជំងឺ បានប្រាប់សន្និសីទសារព័ត៌មានមួយថាបុរសធ្វើតេស្ដវិជ្ជមាននោះ បានមកដល់ប្រទេសថៃកាលពីថ្ងៃទី ២៩ ខែវិច្ឆិកា ធ្វើឱ្យប្រទេសថៃក្លាយជាប្រទេសទី៤៧ ដែលបានរកឃើញវ៉ារ្យ៉ង់ថ្មីនេះ។
លោក Opas បាននិយាយថា៖«ករណីដែលបានបញ្ជាក់ជាលើកដំបូងនៃវ៉ារ្យ៉ង់អូមីក្រុង បុរសអាយុ ៣៥ ឆ្នាំ ដែលជាពលរដ្ឋអាមេរិកដែលបានរស់នៅក្នុងប្រទេសអេស្ប៉ាញអស់រយៈពេល ១ ឆ្នាំ»។
លោក Opas បាននិយាយថា៖«អាជ្ញាធរសុខាភិបាល កំពុងធ្វើតេស្ដបន្ថែមលើមនុស្សដែលបានទាក់ទងជាមួយបុរសនោះ ដោយបុគ្គលទាំងនោះ អាចនឹងប្រឈមនឹងហានិភ័យទាប»។
អ្នកនាំពាក្យរបស់ក្រសួងសុខាភិបាលអេស្ប៉ាញ បានបដិសេធមិនធ្វើអត្ថាធិប្បាយលើករណីនេះទេ ប៉ុន្តែក៏បាននិយាយថា«រហូតមកដល់ពេលនេះ ប្រព័ន្ធសម្រាប់ចាប់ទំនាក់ទំនងអ្នកប៉ះអ្នកជំងឺផ្ទាល់ បានផលិត ជោគជ័យហើយ។ យើងបានរកឃើញករណីចំនួន ៥ នៅក្នុងប្រទេសអេស្ប៉ាញ»។
គួរបញ្ជាក់ផងដែរថា ប្រទេសថៃ បានហាមប្រាមអ្នកធ្វើដំណើរមកពីប្រទេសអាហ្វ្រិកចំនួន៨ រួមមាន បូតស្វាណា អេសវ៉ាទីនី ឡេសូតូ ម៉ាឡាវី ម៉ូសំប៊ិក ណាមីប៊ី អាហ្រ្វិកខាងត្បូង និងហ្ស៊ីមបាវ៉េ នៅដើមខែធ្នូ ចំពេលមានការព្រួយបារម្ភទាក់ទិនវ៉ារ៉្យង់អូមីក្រុង។
លោក Opas បាននិយាយថា អាជ្ញាធរក៏បានកំណត់ការធ្វើដំណើរពីប្រទេសអាហ្រ្វិកផ្សេងទៀត និងកំពុងតាមដានអ្នកដំណើរអន្តរជាតិសម្រាប់ករណីដែលអាចកើតមានបន្ថែមទៀត។
ប្រទេសថៃ បានរាយការណ៍ពីការឆ្លងវីរុសកូវីដ១៩ថ្មីចំនួន ៤ ០០០ ករណី និងការស្លាប់ថ្មីចំនួន ២២ នាក់កាលពីថ្ងៃចន្ទ ដោយធ្វើឱ្យចំនួនអ្នកឆ្លងកើនឡើងសរុបកើនដល់ជាង ២,១ លានករណី និងការស្លាប់ចំនួន ២០ ៩៦៦ នាក់ ចាប់តាំងពីជំងឺរាតត្បាតបានចាប់ផ្តើមកាលពីឆ្នាំមុន។
ទិន្នន័យរបស់ក្រសួងសុខាភិបាលបានបង្ហាញថាមនុស្សជាង ៥៧ ភាគរយនៅក្នុងប្រទេសថៃ បានទទួលវ៉ាក់សាំងកូវីដ ១៩ ចំនួន២ដូស៕