រដ្ឋបាលប្រធានាធិបតីអាមេរិកលោក ចូ បៃដិន កំពុងពិចារណាជម្រើសធ្វើការជម្លៀសពលរដ្ឋអាមេរិកចេញពីប្រទេសអ៊ុយក្រែន ប្រសិនបើរុស្ស៊ីវាយប្រហារឈ្លានពានប្រទេសនេះ នេះបើតាមការរាយការណ៍របស់ CNN ផ្អែកលើប្រភពមួយចំនួន។
ការរៀបចំផែនការទាំងនេះគឺដឹកនាំដោយក្រសួងការពារជាតិអាមេរិក ហើយធ្វើឡើងនៅពេលដែលរដ្ឋបាលលោក បៃដិន ធ្វើការរាយការណ៍ទៅសភាអាមេរិកអំពីរបៀបដែលអាមេរិក កំពុងត្រៀមការឆ្លើយតប។ ប្រភព បាននិយាយថា ក្នុងការរាយការណ៍ទៅកាន់ក្រុមសមាជិកព្រឹទ្ធសភាកាលពីយប់ថ្ងៃចន្ទ ទី ៨ ធ្នូ រដ្ឋលេខាធិការក្រសួងការបរទេសអាមេរិកទទួលបន្ទុកកិច្ចការនយោបាយលោកស្រី វិចតូរីយ៉ា នូឡែន បានធ្វើការបង្ហាញអំពីកញ្ចប់ទណ្ឌកម្មមួយដែលរៀបចំដោយរដ្ឋបាល ប្រសិនបានរុស្ស៊ី ធ្វើការវាយប្រហារ ប៉ុន្តែលោកស្រីទទួលស្គាល់ថា មធ្យោបាយដើម្បីបង្ការការប៉ះទង្គិច គឺមានកម្រិត។
លោកស្រី នូឡែន បាននិយាយថា ឥឡូវនេះមានពលរដ្ឋអាមេរិករវាង ១០ ០០០ និង ១៥ ០០០ នាក់នៅក្នុងប្រទេសអ៊ុយក្រែនប្រភពបាននិយាយថា ឥឡូវនេះ គេមិនឃើញតម្រូវការសម្រាប់ការជម្លៀសចេញទេ ប៉ុន្តែការពិភាក្សាទាំងនេះ គឺជាផ្នែកមួយនៃការរៀបចំផែនការក្នុងករណីដែលស្ថានភាពសន្តិសុខកាន់តែយ៉ាប់យ៉ឺនខ្លាំង។
ក្រសួងការពារជាតិ និងក្រសួងការបរទេសអាមេរិក មានផែនការបែបនេះសម្រាប់សេណារីយោអាក្រក់បំផុតនៅគ្រប់ប្រទេសជុំវិញពិភពលោក ហើយផែនការទាំងនេះត្រូវបានធ្វើបច្ចុប្បន្នភាព និងផ្លាស់ប្ដូរទៅតាមស្ថានភាពជាក់ស្ដែង។
យ៉ាងណាមិញ ការព្រួយបារម្ភទាំងនេះ គឺបង្កដោយការប្រមូលផ្ដុំទាហានរុស្ស៊ីយ៉ាងហោចណាស់ ៩០ ០០០ នាក់នៅព្រំដែនប្រទេសអ៊ុយក្រែន ដែលលោកខាងលិចចោទប្រកាន់ថាជាការត្រៀមធ្វើការឈ្លានពានចូលប្រទេសអ៊ុយក្រែន។ ប្រទេសរុស្ស៊ីបានច្រានចោលការចោទប្រកាន់ទាំងនេះ៕
វីដេអូ៖