ប្រធានាធិបតីនៃប្រទេសអាហ្រ្វិកខាងត្បូង បាននិយាយកាលពីថ្ងៃចន្ទថា មេរោគកូវីដ ១៩ កំពុងតែរីករាលដាលលឿនជាងពេលណាៗទាំងអស់នៅអាហ្រ្វិកខាងត្បូង ដែលជាការបង្ហាញពីល្បឿនដែលវ៉ារ្យ៉ង់ អូមីក្រុងថ្មីចម្លង ប៉ុន្តែរបាយការណ៍បឋមបង្ហាញថា វាអាចនឹងមានឥទ្ធិពលស្រាលជាងវ៉ារ៉្យង់ដទៃ។ នេះបើតាមការឱ្យដឹងពីសារព័ត៌មានញូវយ៉កថាមសន៍។
ទោះយ៉ាងណា អ្នកវិទ្យាសាស្ត្របានព្រមានអំពី ព័ត៌មានទាំង ២ ករណី ដោយករណីទី ១ គឺ លទ្ធផលបឋមស្ដីអំពីភាពធ្ងន់ធ្ងររបស់វ៉ារ៉្យង់ ដែលអាចធ្វើឱ្យពិភពលោកធូរចិត្ត និងទី ១ ព័ត៌មានស្ដីអំពីវ៉ារ៉្យង់គ្រាន់តែជាភ័ស្ដុតាងដំបូង ដោយសារវ៉ារ្យ៉ង់នេះ ទើបរកឃើញកាលពីខែមុន ហើយត្រូវការការសិក្សាបន្ថែមទៀត មុនពេលអ្នកជំនាញ អាចនិយាយច្រើនអំពីវាដោយមានទំនុកចិត្ត។ លើសពីនេះ ផលប៉ះពាល់ពិតប្រាកដនៃមេរោគឆ្លងមិនតែងតែដឹងភ្លាមៗនោះទេ ដោយព័ត៌មានអ្នកជំងឺសម្រាកព្យាបាលនៅមន្ទីរពេទ្យ និងការស្លាប់តែងតែពន្យារមុនពេលមានការរីករាលដាលធ្ងន់ធ្ងរ។
វេជ្ជបណ្ឌិត Emily Gurley អ្នកស្រាវជ្រាវផ្នែកសុខភាពសាធារណៈនៅសាលា Johns Hopkins បាន និយាយថា៖ «ព័ត៌មាន ពីវ៉ារ្យ៉ង់ថ្មីដែលមិនសូវធ្ងន់ធ្ងរនេះមិនមែនជារឿងគួរឱ្យភ្ញាក់ផ្អើលទេ ប្រសិនបើវាជាការពិត ប៉ុន្តែខ្ញុំមិនប្រាកដថា យើងអាចសន្និដ្ឋានបានអំពីឥទ្ធិពលជាក់លាក់បានហើយឬនៅទេ»។
នាយកផ្នែកសង្គ្រោះបន្ទាន់របស់អង្គការសុខភាពពិភពលោក លោក Michael Ryan ក៏បាននិយាយនៅក្នុងបទសម្ភាសមួយថា៖«ទិន្នន័យបឋមមិនបង្ហាញថាវាធ្ងន់ធ្ងរជាងនេះទេ។ តាមពិតទៅ ប្រសិនបើមានអ្វីកើតឡើងមែននោះ ចំនួនករណីឆ្លងអាចនឹងឆ្ពោះទៅរកភាពធ្ងន់ធ្ងរតិចជាងនេះបន្តិច»។
លោក Ryan ក៏បាននិយាយផងដែរថា មិនមានសញ្ញាណាមួយដែលថាវ៉ារ៉្យង់អូមីក្រុងអាចយកឈ្នះទាំងស្រុងលើវ៉ាក់សាំង ដែលមានស្រាប់នោះដែរ។
អ្នកស្រាវជ្រាវនៅអគារមន្ទីរពេទ្យធំមួយក្នុងទីក្រុងព្រីតូរីយ៉ាបានរាយការណ៍ថា អ្នកជំងឺរបស់ពួកគេដែលមានជំងឺកូវីដ ១៩ ឈឺតិចជាងអ្នក ដែលពួកគេបានព្យាបាលពីមុន ហើយមន្ទីរពេទ្យផ្សេងទៀត កំពុងមើលឃើញនិន្នាការដូចគ្នា។ តាមពិតទៅ ពួកគេបាននិយាយថា ភាគច្រើននៃអ្នកជំងឺដែលឆ្លងមេរោគត្រូវរកឃើញថា ឈឺដោយសារមូលហេតុផ្សេង ហើយមិនមានរោគសញ្ញានៃជំងឺកូវីដនោះទេ។
ក្នុងករណីដែលគ្មានព័ត៌មានលម្អិតបន្ថែមទៀត រដ្ឋាភិបាលបានប្រតិកម្មចំពោះវ៉ារ៉្យង់អូមីក្រុង ដោយការរឹតបន្តឹងយ៉ាងខ្លាំងលើការធ្វើដំណើរអន្តរជាតិ និងតម្រូវការចាក់វ៉ាក់សាំងថ្មី។ មេដឹកនាំពិភពលោកដែលត្រូវបានចោទប្រកាន់ថា បានឆ្លើយតបវ៉ារ៉្យង់យឺតពេកឬខ្សោយមុនការរាតត្បាតនៃជំងឺរាតត្បាតគឺ ចង់ឱ្យគេមើលឃើញថា ខ្លួនសកម្ម ទោះបីជាអ្នកជំនាញមួយចំនួនចោទថា ការរឹតបន្តឹងការធ្វើដំណើរ គឺជាប្រតិកម្មហួសហេតុក៏ដោយ។
វ៉ារ្យ៉ង់នេះ បានរីករាលដាលយ៉ាងឆាប់រហ័សហើយត្រូវបានគេរកឃើញនៅក្នុងប្រទេសប្រមាណលើស ៤០ប្រទេស លើទ្វីបចំនួន ៦ រហូតមកដល់ពេលនេះ។ មន្ត្រីសុខាភិបាល និងអ្នកស្រាវជ្រាវបាននិយាយថា វាអាចជាទម្រង់ឆ្លងលឿនបំផុតក៏ដោយ ឆាប់ៗនេះ វាអាចវិវត្ត និងគ្របដណ្ដបទូទាំងពិភពលោក ដូចវ៉ារ៉្យង់ ដែលតា ដែលបានលេចឡើងកាលពីឆ្នាំមុន។ ជាលទ្ធផល ពិភពលោក កំពុងប្រឈមនឹងផលវិបាកនៃជំងឺរាតត្បាតរយៈពេល ២ ឆ្នាំកន្លងមក អាចនឹងត្រូវប្រឈមនឹងវដ្តនៃជំងឺ ដែលតម្រូវឱ្យមានការបិទខ្ទប់ និងការរងទុក្ខផ្នែកសេដ្ឋកិច្ចផ្សេងទៀត។
នៅទ្វីបអឺរ៉ុប ដូចជានៅអាហ្រ្វិកខាងត្បូង មានការចង្អុលបង្ហាញដំបូងថា ករណីអូមីក្រុងប្រហែលជាស្រាលល្មម ប្រសិនបើងាយឆ្លងដូច្នេះ។
នៅក្នុងប្រទេសអង់គ្លេស រដ្ឋាភិបាលបាននិយាយកាលពីថ្ងៃ ចន្ទថា ចំនួនករណីជំងឺអូមីក្រុងនៅប្រទេសខ្លួនបានកើនឡើងដល់ ៣៣៦ ករណី បើធៀបនឹងករណីរកឃើញនៅថ្ងៃសុក្រ។ ប្រទេសដាណឺម៉ាកបានរាយការណ៍ថា មានករណីចំនួន ២៦១ ករណី ដែលកើនឡើងចំនួន ៤ ដងបើធៀបនឹងករណីនៅថ្ងៃសុក្រ។
ដោយឡែក នៅអាហ្រ្វិកខាងត្បូង ដែលជាកន្លែងដែលអ្នកវិទ្យាសាស្ត្ររកឃើញវ៉ារ៉្យង់ថ្មីនេះ ក៏កំពុងកើនឡើងដែរ ដោយកាលពីថ្ងៃសុក្រ និងថ្ងៃសៅរ៍ តួលេខនៃករណីឆ្លងមានច្រើនជាង ១៦ ពាន់ករណី ដោយសារតែភាពយឺតយ៉ាវនៃការរាយការណ៍ករណីឆ្លង នៅចុងសប្តាហ៍។
ទោះយ៉ាងណា អ្នកវិទ្យាសាស្ត្រកំពូលមកពីអង្គការសុខភាពពិភពលោក (WHO) និងសហរដ្ឋអាមេរិក បានប្រាប់សារព័ត៌មាន AFP ថា វ៉ារ្យ៉ង់អូមីក្រុងហាក់ដូចជា មិនសូវសាហាវជាងវ៉ារ៉្យង់ដទៃនោះទេ បើទោះជាមានការជំរុញឱ្យមានការស្រាវជ្រាវបន្ថែមទៀតដើម្បីវិនិច្ឆ័យភាពធ្ងន់ធ្ងររបស់វាក៏ដោយ៕