.jpg)
កាលពីថ្ងៃពុធ ទី៨ ធ្នូ សភាតំណាងអាមេរិក បានអនុម័តសេចក្ដីព្រាងច្បាប់មួយ ដើម្បីហាមឃាត់ការនាំចូលផលិតផលពីតំបន់ស៊ីនជាំងប្រទេសចិន ជុំវិញការព្រួយបារម្ភអំពីពលកម្មដោយបង្ខំ ដោយនេះគឺជាវិធានការមួយក្នុងចំណោមវិធានការ៣ ដែលទទួលការគាំទ្រលើសលប់ ខណៈក្រុងវ៉ាស៊ីនតោនបង្កើនការប្រឆាំងចំពោះការប្រព្រឹត្តរបស់ក្រុងប៉េកាំងទៅលើជនជាតិភាគតិចអ៊ុយហ្គ័រ។
សភាតំណាងអាមេរិកបានបោះឆ្នោតក្នុងសំឡេង ៤២៨-១ ដើម្បីអនុម័តលើសេចក្ដីព្រាងច្បាប់ស្ដីពីការទប់ស្កាត់ពលកម្មដោយបង្ខំជនជាតិអ៊ុយហ្គ័រ។ ដើម្បីចូលជាធរមានសេចក្ដីព្រាងច្បាប់នេះត្រូវតែអនុម័តដោយព្រឹទ្ធសភាអាមេរិក និងចុះហត្ថលេខាដោយលោកប្រធានាធិបតីចូ បៃដិន។
សេចក្ដីព្រាងច្បាប់នេះបានបង្កើត «ការសន្មតអាចប្រកែកបាន» ថាផលិតផលទាំងអស់មកពីតំបន់ស៊ីនជាំង គឺត្រូវបានផលិតដោយពលកម្មដោយបង្ខំ នៅតាមបណ្ដាញជំរំឃុំឃាំងជនជាតិអ៊ុយហ្គ័រ និងជនជាតិភាគតិចមូស្លីមដទៃទៀត។
សហរដ្ឋអាមេរិក និងប្រទេសលោកខាងលិចដទៃទៀត បានចោទប្រកាន់ប្រទេសចិនថាកំពុងប្រព្រឹត្តអំពើប្រល័យពូជសាសន៍ទៅលើជនជាតិភាគតិចទាំងនេះ ប៉ុន្តែក្រុងប៉េកាំងបានច្រានចោលការចោទប្រកាន់ទាំងនេះ ហើយនិយាយថាបញ្ហានៅតំបន់ស៊ីនជាំង គឺជាកិច្ចការផ្ទៃក្នុងរបស់ប្រទេសចិន។
សភាតំណាងក៏បានអនុម័តវិធានការ២ផ្សេងទៀតផងដែរ។ សភាតំណាង បានអនុម័តសេចក្ដីសម្រេចមួយក្នុងសំឡេង ៤២៨-០ ចោទប្រកាន់គណៈកម្មាធិការអូឡាំពិកអន្តរជាតិថាបានរំលោភលើការសន្យាសិទ្ធិមនុស្សរបស់ខ្លួនដោយសហការជាមួយរដ្ឋាភិបាលចិន។ ពួកគេក៏បានអនុម័តសេចក្ដីសម្រេចមួយទៀតក្នុងសំឡេង ៤២៧-១ ថ្កោលទោស «អំពើប្រល័យពូជសាសន៍ និងឧក្រិដ្ឋកម្មប្រឆាំងមនុស្សជាតិ» របស់ក្រុងប៉េកាំងទៅលើជនជាតិភាគតិច ហើយបានជំរុញឱ្យអង្គការសហប្រជាជាតិចាត់វិធានការ៕
