កាលពីថ្ងៃពុធ ទី៨ ធ្នូ សហភាពអឺរ៉ុប បានធ្វើសំណើវិធានការថ្មីមួយដែលអនុញ្ញាតឱ្យពួកគេដាក់ទណ្ឌកម្មលើភាគីណាមួយ ដែលព្យាយាមជិះឥទ្ធិពលលើគោលនយោបាយអឺរ៉ុប តាមរយៈសម្ពាធសេដ្ឋកិច្ច ឬពហិការមិនទិញផលិតផលអឺរ៉ុប។
គណៈកម្មាធិការអឺរ៉ុប ដែលជាអំណាចនីតិប្រតិបត្តិរបស់សហភាពអឺរ៉ុប បានដាក់ចេញនូវអ្វីដែលពួកគេហៅថា «ឧបករណ៍ប្រឆាំងការបង្ខិតបង្ខំ» ទាក់ទងនឹងអ្វីដែលខ្លួនចាត់ទុកថាជាសម្ពាធពាណិជ្ជកម្មអយុត្តិធម៌ ដោយលើកហេតុផល ថាឧបករណ៍ថ្មីគឺចាំបាច់ ដោយសារតែ «ការធ្វើឱ្យពាណិជ្ជកម្មក្លាយជាអាវុធ សម្រាប់គោលបំណងភូមិសាស្ត្រនយោបាយផ្សេងទៀត»។
វិធានការស្នើឡើងនេះ នឹងផ្ដល់អំណាចយ៉ាងទូលំទូលាយឱ្យគណៈកម្មការអឺរ៉ុបក្នុងការដាក់ទណ្ឌកម្មជាធរមានទៅលើបុគ្គល ក្រុមហ៊ុន និងប្រទេសណាមួយ។ យន្តការទណ្ឌកម្មរួមមានការបង្កើនពន្ធនាំចូល ការកំណត់កូតា ការរឹតបន្តឹងការប្រើប្រាស់កម្មសិទ្ធិបញ្ញា ការកំណត់សិទ្ធិចូលរួមក្នុងទីផ្សារហិរញ្ញវត្ថុអឺរ៉ុប ការកំណត់ការចូលរួមក្នុងលទ្ធកម្មសាធារណៈ និងការកំណត់ការចូលរួមក្នុងកម្មវិធីស្រាវជ្រាវឧបត្ថម្ភដោយសហភាពអឺរ៉ុប។
វិធានការនេះក៏ដាក់កម្រិតលើសិទ្ធិរបស់ប្រទេសជាសមាជិកនីមួយៗក្នុងការវេតូរារាំងការដាក់ទណ្ឌកម្មលើប្រទេសទី៣។ ក្រោមកំណែទម្រង់ការដាក់ទណ្ឌកម្មអាចរារាំងបានដោយសំឡេងភាគច្រើននៃប្រទេសជាសមាជិក ខុសពីប្រព័ន្ធឯកតោភាគីនាពេលបច្ចុប្បន្ន។
ដើម្បីក្លាយជាច្បាប់ សំណើនេះត្រូវតែអនុម័តដោយសំឡេងភាគច្រើននៃប្រទេសជាសមាជិក និងដោយសភាអឺរ៉ុប។ សំណើនេះទំនងជាប្រឈមមុខនឹងការប្រឆាំងពីប្រទេសសមាជិកមួយចំនួន ដូចជាប្រទេសស៊ុយអែត និងសាធារណរដ្ឋឆែក ដែលព្រួយបារម្ភថាវិធានការនេះអាចបំពានច្បាប់របស់អង្គការពាណិជ្ជកម្មពិភពលោក និងមានភាពមិនសមាមាត្រ៕