.jpg)
លោកប្រធានាធិបតី វ្ល៉ាឌីមៀរ ពូទីន ប្រជុំជាមួយសមភាគីអាមេរិក ចូ បៃដិន តាមវីដេអូខល។ AFP
ក្នុងអំឡុងវីដេអូខលកាលពីថ្ងៃអង្គារ ទី ៧ ធ្នូ ដែលធ្វើឡើងចំពេលដែលភាពតានតឹងកំពុងកើនឡើង ជុំវិញការប្រមូលផ្ដុំនៃទាហានរុស្ស៊ីតាមព្រំដែនប្រទេសអ៊ុយ-ក្រែនប្រធានាធិបតីអាមេរិក លោក ចូ បៃដិន បានបដិសេធមិនទទួលយក «ខ្សែបន្ទាត់ក្រហម» របស់ប្រធានាធិបតីរុស្ស៊ី លោក វ្ល៉ាឌីមៀរ ពូទីន ជុំវិញអ៊ុយក្រែន។
នេះមានន័យថា សហរដ្ឋអាមេរិកបានច្រានចោលការទាមទាររបស់លោក ពូទីន ឱ្យអង្គការសន្ធិសញ្ញាអាត្លង់ទិកខាងជើង (ណាតូ) បដិសេធឱ្យប្រទេសអ៊ុយក្រែនចូលរួមជាសមាជិកក្នុងសម្ព័ន្ធភាពយោធា។ សន្ធិសញ្ញាអាត្លង់ទិកខាងជើងបានចែងថា ប្រសិនបើសមាជិកណាមួយរងការវាយប្រហារពីខាងក្រៅ នោះសមាជិកទាំងអស់ត្រូវជួយការពារប្រទេសនោះ។
ក្នុងអំឡុងពេលវីដេអូខលខាងលើលោក ពូទីន បានប្រាប់លោក បៃដិន ថា ការព្យាយាមរបស់អ៊ុយក្រែនដើម្បីធ្វើជាសមាជិកក្នុងអង្គការណាតូដាច់ខាតត្រូវតែបដិសេធ ជាថ្នូរនឹងការធានាថា យោធារុស្ស៊ី នឹងមិនធ្វើការវាយប្រហារទៅលើប្រទេស នេះទេ។ ប្រទេសអ៊ុយក្រែន បានព្យាយាមចូលរួមក្នុងអង្គការណាតូចាប់តាំងពីឆ្នាំ ២០០២ មកម្ល៉េះ។
វិមានក្រឹមឡាំងបានចាត់ទុកការពង្រីករបស់អង្គការណាតូមកអឺរ៉ុបខាងកើត ថា ជាការគំរាមកំហែងផ្នែកសន្តិសុខដោយផ្ទាល់ ដោយលើកហេតុផលថាការទទួលយកអ៊ុយក្រែនទៅក្នុងសម្ព័ន្ធភាពយោធាអាចបណ្ដាលឱ្យមានចលនាទាហានណាតូនៅតាមព្រំដែនរុស្ស៊ី។
លោក ពូទីន បានសង្កត់ធ្ងន់ប្រាប់លោក បៃដិន ថា អង្គការណាតូទទួលខុសត្រូវចំពោះការបង្កើនភាពតានតឹងនៅតាមព្រំដែនរបស់រុស្ស៊ី ហើយបានចោទប្រកាន់សម្ព័ន្ធភាពសមាជិក ៣០ ប្រទេសនេះថា បានកសាងកម្លាំងយោធាក្នុងរដ្ឋដែលនៅជាប់នឹងប្រទេសរុស្ស៊ី។
រដ្ឋបាលលោក បៃដិន មានបំណងចង់បញ្ជាក់ឱ្យច្បាស់ដល់រុស្ស៊ី និងពិភពលោកថា ខ្លួនបានរៀបចំឱ្យមានវិធានការតឹងរ៉ឹងជាងមុនបើធៀបនឹងឆ្នាំ ២០១៤ នៅពេលដែលកងកម្លាំងរុស្ស៊ីបានបានកាត់យកឧបទ្វីបគ្រីមាបស់អ៊ុយក្រែន។
នៅពេលដែលអ្នកសារព័ត៌មានសួរថាតើលោក បៃដិន បានដោះស្រាយ «ខ្សែបន្ទាត់ក្រហម» របស់លោកពូទីនដែរឬទេ? ទីប្រឹក្សាសន្តិសុខជាតិលោក ជេក សូលីវ៉ាន់ និយាយថា លោក បៃដិន មិនបាន «ធ្វើការសន្យា ឬសម្បទាននោះទេ»។
លោក សូលីវ៉ាន់ និយាយថា៖ «លោក បៃដិន ឈរជាមួយគំនិតដែលប្រទេសនានាគួរតែអាចជ្រើសរើសដោយសេរីថា ពួកគេភ្ជាប់ជាមួយនរណា?»។
បើទោះជាយ៉ាងនេះក៏ដោយ លោក បៃដិន និយាយកាលពីថ្ងៃពុធថា ជម្រើសដាក់ពង្រាយទាហានអាមេរិកនៅប្រទេសអ៊ុយក្រែន ដើម្បីរារាំងការឈ្លានពានដោយរុស្ស៊ី គឺ «មិនមាននៅលើតុទេ»។ លោកនិយាយថា អាមេរិកមានកាតព្វកិច្ចការពារសម្ព័ន្ធមិត្តណាតូ ប្រសិនបើពួកគេរងការវាយប្រហារ ប៉ុន្តែកាតព្វកិច្ចនេះ គឺមិនពង្រីកដល់ប្រទេសអ៊ុយក្រែនទេ។
«វានឹងអាស្រ័យលើអ្វីដែលប្រទេសផ្សេងទៀតនៃអង្គការណាតូមានឆន្ទៈធ្វើផងដែរ» លោកបៃដិននិយាយបែបនេះហើយបន្តទៀតថា៖ «ប៉ុន្តែគំនិតដែលអាមេរិក នឹងប្រើកម្លាំងជាឯកតោភាគី ដើម្បីប្រឈមមុខនឹងរុស្ស៊ីដែលឈ្លានពានអ៊ុយក្រែនមិនស្ថិតក្នុងសន្លឹកបៀនៅពេលនេះទេ»។
អ៊ុយក្រែន បានព្រមានក្រុងវ៉ាស៊ីនតោន និងសម្ព័ន្ធមិត្តអឺរ៉ុបអស់ជាច្រើនសប្តាហ៍ថា ទាហានរុស្ស៊ីកំពុងប្រមូលផ្តុំគ្នានៅតាមបណ្ដោយព្រំដែនភាគខាងកើតរបស់ខ្លួន ដែលជាការអភិវឌ្ឍដែលធ្វើត្រាប់តាមការលុកលុយរបស់ក្រុងមូស្គូនៅឧបទ្វីបគ្រីមាឆ្នាំ ២០១៤។ ការកាត់យកឧបទ្វីបសមុទ្រខ្មៅបានបង្កឱ្យមានការចលាចលជាអន្តរជាតិ និងបានបង្កឱ្យមានការដាក់ទណ្ឌកម្មជាបន្តបន្ទាប់លើក្រុងម៉ូស្គូ។
រុស្ស៊ី បានច្រានចោលការចោទប្រកាន់ទាំងនេះ។
កាលពីសប្ដាហ៍មុនអគ្គលេខាធិការអង្គការណាតូលោក ជេន ស្តូលធីនប៊ឺក បានអំពាវនាវដល់ក្រុងមូ៉ស្គូឱ្យបន្ថយភាពតានតឹង និងបានបញ្ជាក់ជាថ្មីថាការប្ដេជ្ញាចិត្តរបស់សម្ព័ន្ធភាពយោធាចំពោះអធិបតេយ្យភាព និងបូរណភាពទឹកដីរបស់អ៊ុយក្រែន «នៅតែមិនប្រែប្រួល»។
លោកបាននិយាយថា៖ «អ៊ុយក្រែនជាប្រទេសអធិបតេយ្យ និងឯករាជ្យហើយគ្រប់ប្រទេសដែលមានអធិបតេយ្យភាព ឯករាជ្យ មានសិទ្ធិជ្រើសរើសផ្លូវរបស់ខ្លួន រួមទាំងផែនការសន្តិសុខបែបណាដែលខ្លួនចង់ចូលរួម។ ដូច្នេះវាអាស្រ័យលើអ៊ុយក្រែន និងសម្ព័ន្ធមិត្តទាំង ៣០ ក្នុងការសម្រេចថា ពេលណាអ៊ុយក្រែនត្រៀមខ្លួនជាស្រេច ដើម្បីចូលរួមក្នុងសម្ព័ន្ធភាព»។
លោកបន្តទៀតថា៖ «រុស្ស៊ីគ្មានសិទ្ធិវេតូ គ្មានសិទ្ធិជ្រៀតជ្រែកក្នុងដំណើរការនេះទេ»។
យ៉ាងណាមិញ លោក ពូទីន បាននិយាយថា ទីក្រុងម៉ូស្គូនឹងបញ្ជូនគំនិតទៅកាន់ទីក្រុងវ៉ាស៊ីនតោនក្នុងរយៈពេល ១ សប្ដាហ៍ ដើម្បីតបតាមកិច្ចពិភាក្សារបស់លោកជាមួយលោក បៃដិន នៅថ្ងៃអង្គារ។
លោក បៃដិន បាននិយាយថា លោកសង្ឃឹមថា នឹងមានសេចក្តីប្រកាសមួយនៅថ្ងៃសុក្រ អំពីកិច្ចប្រជុំកម្រិតខ្ពស់ជាមួយរុស្ស៊ី និងសម្ព័ន្ធមិត្តណាតូសំខាន់ៗ ដើម្បីពិភាក្សាអំពី «ការព្រួយបារម្ភរបស់ទីក្រុងមូ៉ស្គូទាក់ទងនឹងអង្គការណាតូ» និងលទ្ធភាពនៃ «ការទម្លាក់សីតុណ្ហភាពនៅតាមបណ្ដោយភាគខាងកើត»៕
វីដេអូ៖
