អង្គការសុខភាពពិភពលោក (WHO) បាននិយាយថា វ៉ារ្យ៉ង់អូមីក្រុង កំពុងឆ្លង និងរីករាលដាលលឿនជាងប្រភេទ ដែលតា មានក្នុងប្រទេសនីមួយៗទៅទៀត ដោយករណីឆ្លងបានកើនឡើងគុណនឹង ២ ក្នុងចន្លោះរយៈពេលពី ១,៥ ទៅ ៣ ថ្ងៃ។ នេះបើតាមការឱ្យដឹងពីសារព័ត៌មាន Al Jazeera។
ទីភ្នាក់ងារសុខភាពរបស់អង្គការសហប្រជាជាតិបាននិយាយថា គិតមកដល់បច្ចុប្បន្ន វ៉ារ្យ៉ង់អូមីក្រុងត្រូវបានគេរកឃើញក្នុងប្រទេសជាង ៨៩ ប្រទេស។
អង្គការ WHO បាននិយាយថា វ៉ារ្យ៉ង់អូមីក្រុង កំពុងរីករាលដាលយ៉ាងឆាប់រហ័សនៅក្នុងប្រទេស ដែលមានប្រជាជនខ្ពស់ ប៉ុន្តែគេនៅមិនច្បាស់ទេថា តើការរីករាលដាលនេះ ដោយសារតែសមត្ថភាពរបស់ វ៉ារ្យ៉ង់ក្នុងការគេចចេញពីភាពស៊ាំ ការកើនឡើងនៃករណីឆ្លង ឬគ្រប់ករណីរួមបញ្ចូលគ្នា។
ទីភ្នាក់ងារដដែលនេះ បានកំណត់វ៉ារ្យ៉ង់អូមីក្រុងជាវ៉ារ្យ៉ង់ព្រួយបារម្ភកាលពីថ្ងៃទី ២៦ ខែវិច្ឆិកា ភ្លាមៗ បន្ទាប់ពីអ្នកវិទ្យាសាស្ត្រនៅអាហ្វ្រិកខាងត្បូងរកឃើញវ៉ារ្យ៉ង់នេះដំបូង និងមិនទាន់ដឹងពីព័ត៌មានលម្អិត ពីវ៉ារ្យ៉ង់នៅឡើយ។ អ្នកវិទ្យាសាស្ត្រនៅតែមិនច្បាស់ថា តើវ៉ារ្យ៉ង់នេះ មានគ្រោះថ្នាក់ប៉ុនណា ប៉ុន្តែទិន្នន័យដំបូងបង្ហាញថា វ៉ារ្យ៉ង់នេះអាចធន់នឹងវ៉ាក់សាំង និងអាចឆ្លងបានច្រើនជាងវ៉ារ្យ៉ង់ដែលតា។
អង្គការ WHO បាននិយាយថា៖ «ទិន្នន័យអំពីការកំណត់នូវភាពធ្ងន់ធ្ងររបស់វ៉ារ្យ៉ង់អូមីក្រុងនៅមានកម្រិតនៅឡើយ។ នៅមានទិន្នន័យជាច្រើនបន្ថែមទៀត ដែលយើងត្រូវសិក្សា ដើម្បីស្វែងយល់ពីទម្រង់ភាពធ្ងន់ធ្ងរ និងថា តើភាពធ្ងន់ធ្ងរនោះ អាចជម្នះការចាក់វ៉ាក់សាំង និងភាពស៊ាំ ដែលមានស្រាប់យ៉ាងដូចម្តេច?»។
កាលពីថ្ងៃសុក្រ ការសិក្សា (មិនទាន់បានត្រួតពិនិត្យ) ដោយមហាវិទ្យាល័យ Imperial College London បាននិយាយថា ហានិភ័យនៃការឆ្លងឡើងវិញដោយសារអូមីក្រុងខ្ពស់ជាង ៥ ដង ហើយ វាមិនបង្ហាញសញ្ញាថា ស្រាលជាងវ៉ារ្យ៉ង់ដែលតានោះទេ។
ការស្រាវជ្រាវបានឱ្យដឹងថា៖ «យើងរកមិនឃើញភ័ស្តុតាង (សម្រាប់ទាំងហានិភ័យនៃការចូលមន្ទីរពេទ្យ និងស្ថានភាពរោគសញ្ញា) ដែលបង្ហាញថា មានភាពធ្ងន់ធ្ងរខុសពីវ៉ារ្យ៉ង់ដែលតាឡើយ ទោះបីជា ទិន្នន័យស្តីពីការចូលមន្ទីរពេទ្យនៅមានកម្រិតនៅឡើយ»។
ការស្រាវជ្រាវបានទម្លាក់ការសង្ស័យទៅលើភាពសុទិដ្ឋិនិយមរបស់អ្នកជំនាញមួយចំនួន ដោយផ្អែកជាចម្បងលើគណនីមិនពិតពីអាហ្វ្រិកខាងត្បូងដែលថា ប្រភេទថ្មីនេះប្រហែលជាមិនមានមេរោគធ្ងន់ធ្ងរ ហើយមិនប៉ះពាល់ដល់ប្រព័ន្ធថែទាំសុខភាពនោះទេ។
ការសិក្សានេះត្រូវបានចេញផ្សាយ ខណៈដែលមន្ត្រីអង់គ្លេសបានរាយការណ៍ពីករណីឆ្លងកូវីដក្នុងរយៈពេល ៣ ថ្ងៃជាប់ៗគ្នា ជាមួយនឹងការកើនឡើងដល់ទៅ ៩៣ ០៤៥ ករណីឆ្លងថ្មី ខណៈដែលនាយករដ្ឋមន្ត្រីបារាំង លោក Jean Castex បានប្រដូចការរីករាលដាលរបស់អូមីក្រុងនៅអឺរ៉ុបថា ដូចនឹង "រន្ទះ"។
កាលពីថ្ងៃព្រហស្បតិ៍ ប្រធានាធិបតីសហរដ្ឋអាមេរិក Joe Biden បានព្រមានអំពីការរីករាលដាលនៅរដូវរងាដ៏ធ្ងន់ធ្ងរ និងបណ្ដាលឱ្យមានការស្លាប់សម្រាប់អ្នកដែលមិនបានទទួលថ្នាំបង្ការប្រឆាំងនឹងកូវីដ ខណៈដែលរដ្ឋមន្ត្រីសុខាភិបាលនៅប្លុក G7 នៃសេដ្ឋកិច្ចជឿនលឿនថា អូមីក្រុងជាការគំរាមកំហែងដ៏ធំបំផុត ចំពោះសុខភាពសាធារណៈសកល។
រដ្ឋមន្ត្រីសុខាភិបាល Joe Phaahla បានឱ្យដឹងថា៖ «យើងជឿថា ការសន្និដ្ឋានថា តើអូមីក្រុងធ្ងន់ធ្ងរ ឬយ៉ាងណា មិនសូវជាមានភាពចាំបាច់ខ្លាំងទេ អ្វីដែលសំខាន់ គឺការចែកចាយវ៉ាក់សាំង ដែលជាកត្តាបង្ក្រាបមេរោគឱ្យស្ថិតក្នុងកម្រិតស្រាល»។
ទោះជាយ៉ាងណាក៏ដោយ មហាវិទ្យាល័យ Imperial College London បាននិយាយនៅក្នុងសេចក្តីថ្លែងការណ៍មួយថា ការការពារ ដែលផ្តល់ដោយការឆ្លងមេរោគពីមុន ប្រឆាំងនឹងការឆ្លងឡើងវិញចំពោះវ៉ារ្យ៉ង់អូមីក្រុង អាចមានកម្រិតទាបរហូតដល់ ១៩ ភាគរយ។ នេះបើយោងតាម ការស្រាវជ្រាវរបស់ខ្លួន។
ទោះយ៉ាងណា អ្នកវិទ្យាសាស្ត្របានរកឃើញការពន្យល់អំពីជីវសាស្ត្រ ដែលអាចកើតមានសម្រាប់ការកាត់បន្ថយភាពធ្ងន់ធ្ងរជាក់ស្តែងរបស់អូមីក្រុង។ ការងារនេះ ត្រូវបានអនុវត្តដោយលោក Michael Chan Chiwai នៅសាកលវិទ្យាល័យហុងកុង ដែលបានរកឃើញថា ទោះបីជាវ៉ារ្យ៉ង់ថ្មីមានប្រសិទ្ធភាពជាង បើប្រៀបធៀបវ៉ារ្យ៉ង់ដែលតាក្នុងការបន្តពូជនៅផ្លូវដង្ហើមផ្នែកខាងលើ ដែលវាអាចក្អកទៅអ្នកដទៃ វាមានប្រសិទ្ធភាពតិចជាងក្នុងការរីករាលដាលនៅក្នុងសួត ដែលវានឹងបង្កគ្រោះថ្នាក់ខ្លាំងបំផុតដល់អ្នកជំងឺ។
តាមរបៀបនេះ វ៉ារ្យ៉ង់អាចរីករាលដាលរវាងបុគ្គលម្នាក់ៗកាន់តែលឿន ប៉ុន្តែមិនឈានដល់ផ្នែកដែលងាយរងគ្រោះនៃកាយវិភាគសាស្ត្ររបស់ពួកគេនោះទេ ដែលនេះ នឹងកាត់បន្ថយភាពធ្ងន់ធ្ងរនៃជំងឺដែលវាអាចបង្កឡើង។
ទោះជាយ៉ាងណា លោក Chan បានព្រមានឱ្យមានការប្រុងប្រយ័ត្នក្នុងការបកស្រាយពីផលប៉ះពាល់នៃការងាររបស់លោក។ លោកបានបន្តថា៖ «ការឆ្លងទៅមនុស្សជាច្រើនទៀត មេរោគដែលឆ្លងខ្លាំងអាចនឹងបង្កឱ្យមានជំងឺកាន់តែធ្ងន់ធ្ងរ និងស្លាប់ ទោះបីមេរោគខ្លួនវាមិនសូវបង្កជំងឺក៏ដោយ។ ការគំរាមកំហែងជាទូទៅពីវ៉ារ្យ៉ង់អូមីក្រុង ទំនងជាមាន សារៈសំខាន់ខ្លាំងណាស់»៕
វីដេអូ៖