ប្រទេសម៉ាឡេស៊ីបានរាយការណ៍ករណីអូមីក្រុងចំនួន ១១ ករណីបន្ថែមទៀតនៅថ្ងៃ សៅរ៍ ដែលធ្វើឱ្យចំនួនអូមីក្រុងសរុបក្នុងប្រទេស កើនឡើងដល់ ១៣ករណី។ នេះបើតាមការឱ្យដឹងពីសារព័ត៌មាន CNA។
ការឆ្លងមេរោគទាំង ១១ ករណី ត្រូវបាននាំចូលដែលក្នុងនោះមាន ៣ នាក់ដែលធ្វើដំណើរមកពីចក្រភពអង់គ្លេស ៣ នាក់មកពីសហរដ្ឋអាមេរិក២ នាក់មកពីនីហ្សេរីយ៉ា២ នាក់មកពីអារ៉ាប៊ីសាអ៊ូឌីត និងម្នាក់មកពីអូស្ត្រាលី។
លោកវេជ្ជបណ្ឌិត Noor Hisham Abdullah អគ្គនាយកសុខាភិបាលម៉ាឡេស៊ី បាននិយាយថា ៩ ករណីក្នុងចំណោមករណីទាំងនេះ គឺជាជនជាតិម៉ាឡេស៊ី ខណៈដែល២នាក់ជាជនជាតិនីហ្សេរីយ៉ា។
លោកបានបន្ថែមថាករណីទាំង ១១ គឺស្ថិតក្នុងចំណោមគំរូ១៨ ដែលបង្ហាញពីវត្តមានសង្ស័យនៃវ៉ារ្យ៉ង់ អូមីក្រុង ដូចដែលបានប្រកាសដោយរដ្ឋមន្ត្រីក្រសួងសុខាភិបាលKhairyJamaluddinកាលពីថ្ងៃព្រហស្បតិ៍។
លោកវេជ្ជបណ្ឌិត Noor Hishamបាននិយាយថា៖ «ទោះជាយ៉ាងណាក៏ដោយសំណាកចំនួន ៧ ផ្សេងទៀត យើងមិនអាចបញ្ជាក់ពីវត្តមានរបស់វ៉ារ្យ៉ង់អូមីក្រុងបានទេ ពីព្រោះការចាត់ថ្នាក់ហ្ស៊ែនទាំងមូលមិនអាចធ្វើបាន ដោយសារតែកម្រិតផ្ទុកមេរោគទាបនៅក្នុងគំរូ»។
ចាប់តាំងពីករណីនាំចូលក្នុងស្រុក កាន់តែច្រើននៅក្នុងប្រទេសម៉ាឡេស៊ី អាជ្ញាធរសុខាភិបាល បានបង្កើនវិធានកូវីដនៅគ្រប់ច្រកចូលអន្តរជាតិ និងក្នុងសហគមន៍។
ឧទាហរណ៍ នីហ្សេរីយ៉ា ត្រូវបានបញ្ចូលទៅក្នុងបញ្ជីប្រទេស ដែលមានហានិភ័យខ្ពស់។ លោក Khairyបាននិយាយកាលពីដើមសប្តាហ៍នេះថា អ្នកធ្វើដំណើរមកពីប្រទេសទាំងនេះត្រូវពាក់ឧបករណ៍តាមដានឌីជីថលពេញមួយរយៈពេល និងចាំបាច់ដាក់ឱ្យនៅដាច់ដោយឡែកពីគេ។
អ្នកដំណើរដែលមកដល់ចក្រភពអង់គ្លេសត្រូវតែធ្វើតេស្តដោយខ្លួនឯងជារៀងរាល់ថ្ងៃពេញមួយរយៈពេលនៃការដាក់ឱ្យនៅដាច់ពីគេរបស់ពួកគេ ហើយរាយការណ៍លទ្ធផលនៅលើកម្មវិធី MySejahtera។
លោក Khairyបាននិយាយថា ការប្រារព្ធពិធីចូលឆ្នាំថ្មីទ្រង់ទ្រាយធំមិនត្រូវបានអនុញ្ញាតឱ្យប្រារព្ធទេ ហើយអ្នកដែលចូលរួមក្នុងពិធីបុណ្យតូចតាចឯកជនត្រូវតែធ្វើតេស្តដោយខ្លួនឯងមុនពេលចូលរួម។ក្រសួងសុខាភិបាលម៉ាឡេស៊ីក៏កំពុងជំរុញប្រជាជនឱ្យទទួលបានការចាក់វ៉ាក់សាំងការពារជំងឺកូវីដ១៩ ផងដែរ៕