.jpg)
លោកនាយករដ្ឋមន្ត្រីហូឡង់Mark Rutte ធ្វើសន្និសីទកាសែតកាលពីថ្ងៃទី១៧ ធ្នូ។ AFP
ប្រទេសហូឡង់ បានចាប់ផ្តើមការបិទខ្ទប់យ៉ាងតឹងរ៉ឹងជុំវិញបុណ្យណូអែល ចំពេលមានការព្រួយបារម្ភអំពីការរីករាលដាលនៃវ៉ារ្យ៉ង់អូមីក្រុង។ នេះបើតាមការឱ្យដឹងពីសារព័ត៌មាន BBC។
ហាងមិនសំខាន់ បារ៍ កន្លែងហាត់ប្រាណ ហាងកាត់សក់ និងកន្លែងសាធារណៈផ្សេងទៀតត្រូវបានបិទរហូតដល់ថ្ងៃទី១៤ ខែមករា។ នាយករដ្ឋមន្ត្រីMark Rutteបាននិយាយថា វិធានការនេះគឺជាការ "ចៀសមិនរួច" ។
បណ្តាប្រទេសនៅទូទាំងទ្វីបអឺរ៉ុប បាននិងកំពុងរឹតបន្តឹងការរឹតត្បិត ខណៈដែលវ៉ារ៉្យង់នេះបានរីករាលដាលយ៉ាងខ្លាំង។ ច្បាប់ថ្មីនៅក្នុងប្រទេសហូឡង់គឺ តឹងរ៉ឹងបំផុត សម្រាប់ការទប់ស្កាត់ការរីករាលដាលអូមីក្រុងនេះ។
លោក Rutteបានប្រាប់សន្និសីទសារព័ត៌មានកាលពីថ្ងៃសៅរ៍ថា៖ «ខ្ញុំឈរនៅទីនេះក្នុងអារម្មណ៍ស្រងូតស្រងាត់។មនុស្សជាច្រើនក៏នឹងមានអារម្មណ៍ដូចគ្នាដែរ ដើម្បីសង្ខេបវាជា ១ ប្រយោគ ហូឡង់នឹងត្រឡប់ទៅរកការបិទខ្ទប់សាជាថ្មីចាប់ពីថ្ងៃស្អែកទៅ»។
នៅក្រោមការរឹតបន្តឹងថ្មី មនុស្សត្រូវបានជំរុញឱ្យនៅផ្ទះឱ្យបានច្រើនតាមដែលអាចធ្វើទៅបានហើយក៏មានការកំណត់យ៉ាងតឹងរ៉ឹងលើចំនួនមនុស្សដែលអាចជួបបាន។ព្រឹត្តិការណ៍ផ្សេងៗ មិនត្រូវបានអនុញ្ញាតឱ្យធ្វើទេក្រៅពីពិធីបុណ្យសពទីផ្សារប្រចាំសប្តាហ៍ដែលលក់គ្រឿងទេស និងការប្រកួតកីឡាអាជីព មិនអនុញ្ញាតឱ្យមានអ្នកចូលទស្សនាឡើយ។
ភោជនីយដ្ឋានអាចបន្តលក់អាហារសម្រាប់យកទៅប្រើប្រាស់ ហើយហាងដែលមិនចាំបាច់ អាចផ្តល់សេវាកម្មតាមរយៈអនឡាញ។ ទន្ទឹមនឹងនេះ សាលារៀនទាំងអស់ត្រូវបានបិទរហូតដល់ថ្ងៃទី៩ ខែមករា៕
