រដ្ឋាភិបាលថ្មី រឹតបន្តឹងវិធានការសុវត្ថិភាពកូវីដនៅទូទាំងចក្រភពអង់គ្លេស និងនៅតំបន់ផ្សេងទៀតនៃទ្វីបអឺរ៉ុប កាន់តែខ្លាំងឡើងជុំវិញការព្រួយបារម្ភលើការរីករាលដាលវ៉ារ្យ៉ង់អូមីក្រុងបានកាត់បន្ថយអាជីវកម្មភោជនីយដ្ឋាន ហាងស្រាទីកន្លែងព្រឹត្តិការណ៍ និងហាងនានា និងជំរុញឱ្យមានការអំពាវនាវជាបន្ទាន់ សម្រាប់ជំនួយបន្ថែមពីរដ្ឋាភិបាល។
នៅក្នុងប្រទេសអង់គ្លេស រដ្ឋាភិបាលបានឆ្លើយតបនឹងការសុំជំនួយ កាលពីថ្ងៃអង្គារដោយប្រកាសផ្តល់ជំនួយចំនួន ១,៣ ពាន់លានដុល្លារ សម្រាប់ឧស្សាហកម្មបដិសណ្ឋារកិច្ច ជាមួយនឹងជំនួយម្ដងចំនួន ៨ ពាន់ដុល្លារ និងប្រាក់បង្វិលសម្រាប់សងឈប់សម្រាកឈឺរបស់បុគ្គលិក។
ជំនួយបន្ថែមនេះ ព្យាករថា ជារលកថ្មីនៃការព្រួយបារម្ភជុំវិញសេដ្ឋកិច្ចដែលបោកបក់មកក្នុងតំបន់។ នៅប្រទេសបារាំង រដ្ឋាភិបាលបានប្រកាស កាលពីថ្ងៃអង្គារថា ជំនួយបន្ថែមរហូតដល់ ១៣,៥ លានដុល្លារសម្រាប់ទីភ្នាក់ងារទេសចរណ៍ ព្រឹត្តិការណ៍ អាហារដ្ឋាន និងក្រុមហ៊ុនលម្ហែកាយក្នុងផ្ទះ ដែលទទួលរងការខាតបង់ប្រតិបត្តិការដ៏ធំក្នុងខែនេះ។
នៅក្នុងប្រទេសអេស្ប៉ាញ រដ្ឋាភិបាលបានកំណត់ពេលកិច្ចប្រជុំបន្ទាន់មួយជាមួយមេដឹកនាំក្នុងតំបន់នៅថ្ងៃពុធ ដើម្បីពិភាក្សាថា តើត្រូវអនុម័តការរឹតបន្តឹងថ្មី ឬយ៉ាងណា? រដ្ឋាភិបាលអ៊ីតាលីកំពុងប្រជុំនៅថ្ងៃព្រហស្បតិ៍។
លោក Claus Vistesen ប្រធានសេដ្ឋវិទូប្រចាំតំបន់ចាយប្រាក់អឺរ៉ូនៅ Pantheon Macroeconomics បាននិយាយថា៖ «យើងកំពុងស្ថិតក្នុងដំណាក់កាលផ្សេងគ្នាមួយឥឡូវនេះ ដែលការបិទខ្ទប់ត្រូវចំណាយប្រាក់ច្រើនជាងអ្វីទាំងអស់។ រហូតមកដល់ពេលនេះយើងធ្លាប់បិទខ្ទប់អមដោយការគាំទ្រពីរដ្ឋាភិបាល។ ខ្ញុំគិតថា ករណីបិទខ្ទប់ក៏នឹងអាចកើតឡើងដែរ ប៉ុន្តែការគាំទ្រអាចនឹងមានកម្រិត ហើយមិនសូវគ្រប់ជ្រុងជ្រោយដូចមុនទេ»។
យោងតាមអង្គការសុខភាពពិភពលោកបានឱ្យដឹងថា ចក្រភពអង់គ្លេសបានរកឃើញចំនួនករណីកូវីដខ្ពស់បំផុតនៅអឺរ៉ុបក្នុងរយៈពេល ៧ ថ្ងៃចុងក្រោយនេះ។
កាលពីថ្ងៃចន្ទ អង្គការតំណាងឱ្យអាជីវកម្មជាង ១០ ម៉ឺនកន្លែងនៅទូទាំងប្រទេស បានផ្ញើលិខិតចំហមួយទៅកាន់នាយករដ្ឋមន្ត្រី Boris Johnson ដោយទាមទារឱ្យមានការបន្ធូរបន្ថយពន្ធ និងជំនួយបន្ថែមទៀតដើម្បីជួយពួកគេ។
ដោយឡែក នៅប្រទេសអាល្លឺម៉ង់ វិស័យធុរកិច្ចកំពុងដាក់សម្ពាធលើរដ្ឋាភិបាលឱ្យដកតម្រូវការថ្មី ដែលតម្រូវឱ្យអតិថិជនត្រូវតែបង្ហាញភ័ស្តុតាងនៃការចាក់វ៉ាក់សាំង ឬការជាសះស្បើយថ្មីៗ។
ចំណែកនៅប្រទេសហូឡង់ ដែលរដ្ឋាភិបាលបានប្រកាសពីការបិទខ្ទប់កាលពីចុងសប្តាហ៍ ក៏មានចំនួនអាជីវកម្មរបស់ប្រទេស ដែលស្នើសុំជំនួយបានកើនឡើងលើស ៤០០ អាជីវកម្ម កាលពីថ្ងៃចន្ទ ដែលជាចំនួនច្រើនជាង ៧ ដងនៃចំនួន ដែលបានកត់ត្រាកាលពីថ្ងៃចន្ទមុន។
ទោះបីជាការកើនឡើងនៃករណីឆ្លងអូមីក្រុង មិនទាន់បណ្តាលឱ្យមានការបិទខ្ទប់តឹងរ៊ឹង ដែលដាក់ដោយរដ្ឋាភិបាលហូឡង់ក៏ដោយ ក៏អាជីវកម្មនៅអង់គ្លេសអះអាងថា វិធានការចូលគ្នានៃការកំណត់ឱ្យពាក់ម៉ាស់ តម្រូវការចាក់វ៉ាក់សាំង និងភាពមិនប្រាកដប្រជាក្នុងរដូវវិស្សមកាលកំពូល ក៏នៅតែតម្រូវឱ្យមានដដែល។
លោក Matthew Sims ដែលបានជួយរៀបចំយុទ្ធនាការ និងដឹកនាំក្រុមកែលម្អអាជីវកម្មនៅទីក្រុង Croydon ភាគខាងត្បូងនៃទីក្រុងឡុងដ៍ លើកឡើងថា ការលក់រាយបដិសណ្ឋារកិច្ច និង លម្ហែកំពុងស្ថិតនៅក្នុងហានិភ័យមួយ។
អ្នកគ្រប់គ្រងភោជនីយដ្ឋាន ហាងស្រា និងបារ៍លើកឡើងថា ចាប់តាំងពីរដ្ឋាភិបាលបានបន្ថែមការរឹតបន្តឹងស៊េរីថ្មី ដែលត្រូវបានគេស្គាល់ថា គម្រោងបន្ទាប់ជំនួស (Plan B) នៅថ្ងៃទី ៨ ខែធ្នូ ជាការឆ្លើយតបទៅនឹងការរីករាលដាលនៃអូមីក្រុងមក ការរំសាយចោលនូវការកក់វិស័យបដិសណ្ឋារកិច្ច បាននិងកំពុងដំណើរការ ហើយចរាចរជើងហោះហើរបានបាត់នៅក្នុងតំបន់មួយចំនួន។
ឧស្សាហកម្មបដិសណ្ឋារកិច្ចដែលបាត់បង់ការលក់ធ្លាក់ចុះក្នុងថ្ងៃឈប់សម្រាកកាលពីឆ្នាំមុន កំពុងពឹងផ្អែកលើរដូវកាលដ៏មមាញឹកនៅឆ្នាំនេះ។
អាជីវកម្មបដិសណ្ឋារកិច្ច និងការកម្សាន្តប្រហែល ២០ ម៉ឺន នឹងមានសិទ្ធិទទួលបានជំនួយថ្មីនេះ។ រដ្ឋាភិបាលក៏នឹងរ៉ាប់រងថ្លៃចំណាយសម្រាប់ ដាក់ច្បាប់ឈឺ ដែលត្រូវការតាមច្បាប់សម្រាប់អាជីវកម្មខ្នាតតូច និងមធ្យម និងកំពុងបញ្ចូលទឹកប្រាក់ដល់មូលនិធិវប្បធម៌សម្រាប់អង្គការនានា រួមទាំងរោងមហោស្រព វង់តន្ត្រី និងសារមន្ទីរ ដោយផ្ដល់ជំនួយជាទឹកប្រាក់ជាង ៤០ លានដុល្លារទៀត៕
វីដេអូ៖