អធិការបតីអាល្លឺម៉ង់លោក Olaf Scholz បាននិយាយកាលពីថ្ងៃអង្គារ ថា ប្រទេសអាល្លឺម៉ង់ នឹងដាក់ចេញនូវវិធានការថ្មី ដើម្បីទប់ស្កាត់ការរីករាលដាលកូវីដ នៅមុនថ្ងៃចូលឆ្នាំសកល រួមទាំងការកំណត់ការជួបជុំឯកជន សម្រាប់អ្នកទទួលវ៉ាក់សាំងចំនួនអតិបរមា ១០ នាក់។
ទាក់ទិននឹងការបិទខ្ទប់ប្រទេសទាំងមូល លោក Scholz ក៏បានយល់ព្រមជាមួយរដ្ឋចំនួន ១៦ របស់ប្រទេសអាឡឺម៉ង់ក្នុងការបិទក្លិប និងឌីស្កូ ហើយអនុញ្ញាតឱ្យមានព្រឹត្តិការណ៍ធំៗ រួមទាំងការប្រកួតបាល់ទាត់ដោយគ្មានអ្នកទស្សនា។
លោក Scholz បានប្រាប់អ្នកយកព័ត៌មានបន្ទាប់ពីកិច្ចពិភាក្សាថា៖«យើងមិនអាច និងមិនត្រូវបិទភ្នែក ចំពោះរលកបន្ទាប់ទេ។ កូវីដនឹងមិនឈប់សម្រាកបុណ្យណូអែលទេ»។
អាល្លឺម៉ង់ក៏នឹងបង្កើនយុទ្ធនាការចាក់វ៉ាក់សាំងការពារខ្លួនផងដែរ។ ប្រហែល ៧០,៤ភាគរយនៃប្រជាជនអាល្លឺម៉ង់ប្រហែល ៨៣ លាននាក់ ទទួលបានវ៉ាក់សាំងពេញលេញ ខណៈ ប្រជាជន ៣២,៦ភាគរយទទួលបានវ៉ាក់សាំង ១ដូស។
វិទ្យាស្ថាន Robert Koch (RKI) សម្រាប់ជំងឺឆ្លងបានផ្តល់អនុសាសន៍វិធានការតឹងរ៉ឹង រួមទាំងការណែនាំ "ការរឹតបន្តឹងទំនាក់ទំនងអតិបរមា" ភ្លាមៗ និងការរឹតបន្តឹងការធ្វើដំណើរទៅអ្វីដែលចាំបាច់បំផុត។
ទីក្រុង Hamburg បានដាក់ការរឹតបន្តឹងចាប់ពីថ្ងៃទី២៤ ខែធ្នូ។ ភោជនីយដ្ឋាន និងបារ៍ ត្រូវបិទនៅម៉ោង ១១យប់។ បម្រាមគោចរនឹងធ្វើឡើងនៅម៉ោង ១ ព្រឹក សម្រាប់ថ្ងៃចូលឆ្នាំសកល។លោក Scholz នឹងជួបនាយករដ្ឋមន្ត្រីរដ្ឋម្តងទៀតនៅថ្ងៃទី៧ខែមករា ដើម្បីពិភាក្សាអំពីស្ថានភាពកូវីដបន្ត៕