.jpg)
យុទ្ធជនតាលីបង់ដើរសំដៅទៅអ្នកកាសែតក្នុងអំឡុងការតវ៉ាក្នុងទីក្រុងកាប៊ុលកាលពីថ្ងៃទី ២៨ ធ្នូ។ AFP
រដ្ឋាភិបាលតាលីបង់បានរំលាយគណៈកម្មការបោះឆ្នោតទាំង ២ របស់ប្រទេសអាហ្វហ្គានីស្ថាន ក៏ដូចជាក្រសួងសន្តិភាព និងក្រសួងកិច្ចការសភា។ នេះបើតាមការលើកឡើងរបស់មន្ត្រីតាលីបង់ ១ រូប។
ប៊ីឡាល់ ការីមី អ្នកនាំពាក្យរងរបស់រដ្ឋាភិបាលតាលីបង់ បាននិយាយថាគណៈកម្មាការរៀបចំការបោះឆ្នោតឯករាជ្យ និងគណៈកម្មការតវ៉ាការបោះឆ្នោត គឺត្រូវបានរំលាយ។ លោកនិយាយថាគណៈកម្មការទាំង ២ នេះ គឺជា «ស្ថាប័នដែលមិនចាំបាច់សម្រាប់ស្ថានភាពបច្ចុប្បន្ននៅអាហ្វហ្គានីស្ថាន»។ លោកបន្ថែមទៀតថាប្រសិនបើមានតម្រូវការនាពេលអនាគត រដ្ឋាភិបាលអាចបង្កើតគណៈកម្មការទាំង ២ ឡើងវិញ។
គណៈកម្មការបោះឆ្នោតទាំង ២ មានកាតព្វកិច្ចគ្រប់គ្រង និងត្រួតពិនិត្យការបោះឆ្នោតគ្រប់ប្រភេទក្នុងប្រទេសអាហ្វហ្គានីស្ថាន រួមទាំងការបោះឆ្នោតជ្រើសរើសប្រធានាធិបតី សភា និងការបោះឆ្នោតក្រុមប្រឹក្សាខេត្ត។
លោកការីមីក៏បាននិយាយថាតាលីបង់ក៏រំលាយក្រសួងសន្តិភាព និងក្រសួងកិច្ចការសភាផងដែរ ដោយសារក្រសួងទាំងនេះគឺមិនចាំបាច់ក្នុងរចនាសម្ព័ន្ធរដ្ឋាភិបាលបច្ចុប្បន្ន។ បន្ទាប់ពីចូលកាន់អំណាចភ្លាមៗ ក្រុមតាលីបង់បានរំលាយក្រសួងកិច្ចការនារី។
សហគមន៍អន្តរជាតិកំពុងរង់ចាំមើលស្ថានភាពជាក់ស្ដែង មុនពេលពង្រីកការទទួលស្គាល់ជាផ្លូវការដល់អ្នកគ្រប់គ្រងថ្មីរបស់អាហ្វហ្គានីស្ថាន។ ពួកគេមានការប្រុងប្រយ័ត្នថា ក្រុមតាលីបង់អាចបង្កើតរបបផ្ដាច់ការស្រដៀងគ្នានឹងពេលដែលពួកគេកាន់អំណាចកាលពី ២០ ឆ្នាំមុនដែរ បើទោះបីជាពួកគេធានាថាមិនធ្វើដូចនេះក៏ដោយ៕
