ប្រទេសចិន បានរាយការណ៍ពីករណីកើនឡើងប្រចាំថ្ងៃកម្រិតខ្ពស់បំផុតរបស់ខ្លួនក្នុងរយៈពេល ២១ ខែ ចុងក្រោយ ដោយសារការរីករាលដាលច្រើនទ្វេដងនៅក្នុងទីក្រុងស៊ីអានភាគពាយព្យប្រទេសចិន។ នេះបើតាមការឱ្យដឹងពីសារព័ត៌មាន CNA។
ទីក្រុងដែលមានចំនួនប្រជាជនប្រមាណ ១៣ លាននាក់ ត្រូវបានបិទខ្ទប់អស់រយៈពេល ៤ ថ្ងៃហើយ ក្រោយរកឃើញករណីឆ្លង ១៥៥ ករណីកាលពីថ្ងៃសៅរ៍ ពោលគឺកើនឡើងពី ៧៥ ករណី ១ ថ្ងៃមុននេះ។ នេះបើតាមការឱ្យដឹងពីទិន្នន័យផ្លូវការនៅថ្ងៃអាទិត្យ។
ករណីរកឃើញថ្មីនេះ ជំរុញឱ្យករណីឆ្លងសរុបនៅប្រទេសចិនកើនដល់ ១៥៨ ករណី ដែលជាចំនួនខ្ពស់បំផុត ចាប់តាំងពីប្រទេសចិនបានគ្រប់គ្រងការរីករាលដាលទូទាំងប្រទេសនៅដើមឆ្នាំ ២០២០។
ទីក្រុងស៊ីអាន រកឃើញករណីស្រាលក្នុងតំបន់ ៤៨៥ ករណី សម្រាប់រយៈពេលពីថ្ងៃទី ៩ ខែធ្នូដល់ថ្ងៃទី ២៥ ខែធ្នូ ហើយក៏បានដាក់វិធានការធ្ងន់ៗ ដើម្បីទប់ទល់នឹងការផ្ទុះឡើងនៃជំងឺនេះ ស្របតាមគោលនយោបាយរបស់ទីក្រុងប៉េកាំងដែលថាការផ្ទុះឡើងណាមួយគួរតែត្រូវបានទប់ស្កាត់ឱ្យបានឆាប់តាមដែលអាចធ្វើទៅបាន។
ទីក្រុងនេះបានប្រកាសថាមិនមានការឆ្លងដែលបណ្តាលមកពីវ៉ារ្យ៉ង់អូមីក្រុងទេ បើទោះបីជាអាជ្ញាធរចិន បានរាយការណ៍ថា បានរកឃើញករណីអូមីក្រុងមួយចំនួនក្នុងចំណោមអ្នកដំណើរអន្តរជាតិ និងនៅភាគខាងត្បូងប្រទេសចិនក៏ដោយ៕