រដ្ឋាភិបាលស៊ីរីអះអាងថា ផែនការរបស់អ៊ីស្រាអែលដើម្បីបង្កើនចំនួនអ្នកតាំងលំនៅក្នុងទឹកដីមានជម្លោះខ្ពង់រាបហ្គោលេនរហូតទៅដល់ទ្វេដង គឺជាអំពើ«គ្រោះថ្នាក់ និងមិនធ្លាប់មានពីមុនមក» ហើយគ្រាន់តែបន្តការកាន់កាប់ដោយខុសច្បាប់របស់ខ្លួនលើទឹកដីនេះ។
កាលពីថ្ងៃអាទិត្យនេះ នាយករដ្ឋមន្ត្រីអ៊ីស្រាអែលលោកណាហ្វតាលី បេននិតបានប្រកាសផែនការតម្លៃរាប់លានដុល្លារ ដើម្បីបង្កើនទ្វេដងនៃចំនួនអ្នកតាំងលំនៅដែលរស់នៅក្នុងតំបន់ដែលអ៊ីស្រាអែលវាយយកពីប្រទេសស៊ីរីក្នុងសង្គ្រាមកាលពីជាង ៥០ឆ្នាំមុន។
កាលពីឆ្នាំ២០១៩ សហរដ្ឋអាមេរិកទទួលស្គាល់អធិបតេយ្យភាពរបស់អ៊ីស្រាអែលលើខ្ពង់រាបហ្គោលេន ប៉ុន្តែប្រទេសដទៃទៀតក្នុងសហគមន៍អន្តរជាតិបានចាត់ទុកការកាន់កាប់ទឹកដីនេះដោយអ៊ីស្រាអែលថាជាអំពើខុសច្បាប់។
បើតាមប្លង់មេអនុម័តដោយគណៈរដ្ឋមន្ត្រីអ៊ីស្រាអែល គម្រោងជាង ៣០០ លានដុល្លារនឹងធ្វើការអភិវឌ្ឍជាច្រើននៅលើតំបន់ខ្ពង់រាបនេះ ដែលរួមមានការសាងសង់អគារលំនៅឋានចំនួន ៧៣០០ ខ្នងបន្ថែមទៀត។
កាលពីថ្ងៃចន្ទ ក្រសួងការបរទេសស៊ីរីបានចេញសេចក្ដីថ្លែងការណ៍មួយថា៖ «ស៊ីរីថ្កោលទោសយ៉ាងខ្លាំងចំពោះការបង្កើនភាពតានតឹងដ៏គ្រោះថ្នាក់ និងមិនធ្លាប់មានពីមុនមកដោយកងកម្លាំងកាន់កាប់អ៊ីស្រាអែលក្នុងខ្ពង់រាបហ្គោលេនរបស់ស៊ីរី និងការប្រកាន់ខ្ជាប់នូវគោលនយោបាយតាំងលំនៅរបស់ពួកគេ និងការបំពានដ៏ធ្ងន់ធ្ងរ ដែលឈានដល់កម្រិតឧក្រិដ្ឋកម្មសង្គ្រាម»។
ប្រទេសស៊ីរីបានទាមទារជាយូរមកហើយឱ្យអ៊ីស្រាអែលប្រគល់ដែនដីទំហំ ១២០០ គីឡូម៉ែត្រការ៉េមកខ្លួនវិញ។ ខ្ពង់រាបហ្គោលេនមានសារៈសំខាន់យុទ្ធសាស្ត្រដោយសារដែនដីនេះមានកម្ពស់ខ្ពស់ ហើយស្ថិតនៅចំណុចត្រួតស៊ីគ្នានៃព្រំដែនរវាងប្រទេសលីបង់ ហ្ស៊កដានី ស៊ីរី និងអ៊ីស្រាអែល។
អ៊ីស្រាអែលបានដណ្ដើមយកខ្ពង់រាបហ្គោលេននៅក្នុងសង្គ្រាម៦ថ្ងៃជាមួយប្រទេសស៊ីរី អេហ្ស៊ីប ហ៊្សកដានី និងអ៊ីរ៉ាក់ កាលពីឆ្នាំ១៩៦៧៕