.jpg)
កាលពីថ្ងៃពុធ ទី ២៩ ធ្នូនេះប្រធានាធិបតីរុស្ស៊ី លោក វ្ល៉ាឌីមៀរ ពូទីន លើកឡើងថាគម្រោងបំពង់រាប់ពាន់ដុល្លារ Nord Stream 2 ដែលភ្ជាប់ពីប្រទេសរុស្ស៊ីទៅកាន់ប្រទេសអាល្លឺម៉ង់ ត្រូវបានបំពេញដោយឧស្ម័នធម្មជាតិរួចរាល់សម្រាប់នាំចេញទៅអឺរ៉ុប។ ប៉ុន្តែមុនបំពង់នេះអាចដំណើរការបាន ទាំងប្រទេសអាល្លឺម៉ង់ និងសហភាពអឺរ៉ុប ត្រូវតែយល់ព្រម ហើយត្រូវគេចាត់ទុកជាការសម្រេចចិត្តមួយប្រហែលមិនកើតឡើងក្នុងអំឡុងពេលឆមាសដំបូងនៃឆ្នាំក្រោយ។
ក្នុងអំឡុងពេលនៃកិច្ចប្រជុំជាមួយមន្ត្រីថាមពល លោក ពូទីន និយាយថា ការអនុញ្ញាតឱ្យបំពង់ Nord Stream 2 ចាប់ផ្ដើមដំណើរការ អាចជួយកាត់បន្ថយតម្លៃថាមពលដ៏ខ្ពស់នៅអឺរ៉ុប ហើយអាចជួយរក្សាសមភាពទីផ្សារ។
«ផ្លូវបន្ថែមថ្មីនេះពិតជានឹងជួយរក្សាស្ថិរភាពតម្លៃនៅលើទីផ្សារអឺរ៉ុប» លោក ពូទីន និយាយបែបនេះហើយបន្តទៀតថា៖ «វាប្រាកដជានឹងប៉ះពាល់ដល់តម្លៃនៅលើទីផ្សារទំនិញ ហើយអ្នកប្រើប្រាស់នៅក្នុងប្រទេសដែលប្រើប្រាស់ឧស្ម័នរុស្ស៊ីនឹងបានដឹងភ្លាមៗ»។
បំពង់បង្ហូរក្រោមសមុទ្រថ្មីប្រវែង ១ ២៣៤ គីឡូម៉ែត្រ ដែលមានសមត្ថភាពបញ្ជូនឧស្ម័នប្រចាំឆ្នាំ ៥៥ ពាន់លានម៉ែត្រគុប នឹងបង្កើនបរិមាណឧស្ម័នដែលបូមពីរុស្ស៊ីទៅកាន់ប្រទេសអាល្លឺម៉ង់ដោយផ្ទាល់រហូតទៅដល់ទ្វេដង ហើយអាចនឹងអនុញ្ញាតឱ្យរុស្ស៊ីចៀសវាងបំពង់មានស្រាប់ ដែលឆ្លងកាត់ប្រទេសប៉ូឡូញ និងអ៊ុយក្រែន។
អ្នករិះគន់នៃបញ្ហាជុំវិញបំពង់បង្ហូរ Nord Stream 2 ប្រចាំការនៅអាមេរិក ប៉ូឡូញ និងអ៊ុយក្រែន បាននិយាយថា បំពង់នេះនឹងបង្កើនឥទ្ធិពលរុស្ស៊ីនៅអឺរ៉ុប បង្កការបែកបាក់ក្នុងអឺរ៉ុប ហើយនឹងដកហូតប្រាក់ឆ្លងកាត់រាប់ពាន់លានដុល្លារពីប្រទេសប៉ូឡូញ និងអ៊ុយក្រែន៕
