ប្រធានាធិបតីអាមេរិកលោក ចូ បៃដិន និងប្រធានាធិបតីរុស្ស៊ី លោក វ្ល៉ាឌីមៀរ ពូទីន គ្រោងពិភាក្សាគ្នាតាមរយៈប្រព័ន្ធទូរស័ព្ទនៅថ្ងៃព្រហស្បតិ៍ ចុងឆ្នាំ ២០២១ នេះ ដើម្បីពិភាក្សាអំពីបញ្ហាសន្តិសុខនៅអឺរ៉ុប។ នេះបើតាមការប្រកាសរបស់សេតវិមាន និងវិមានក្រឹមឡាំង។
កិច្ចប្រជុំនេះ គឺជាផ្នែកមួយនៃកិច្ចខិតខំប្រឹងប្រែងដើម្បីកាត់បន្ថយភាពតានតឹងនៅប្រទេសអ៊ុយក្រែន ខណៈពេលដែលមានការរាយការណ៍យោធារុស្សីបានដាក់ពង្រាយទាហានជិត ១០០ ០០០ នាក់ នៅតំបន់ព្រំដែនជាមួយប្រទេសអ៊ុយក្រែន។
មន្ត្រីជាន់ខ្ពស់អាមេរិក ១ រូបបាននិយាយថា កិច្ចប្រជុំតាមរយៈទូរស័ព្ទដែលត្រូវបានរៀបចំតាមសំណើរបស់រុស្ស៊ី ហើយថា វានឹងត្រូវការ «កម្រិតខ្ពស់នៃការចូលរួម» ដើម្បីបង្កើតផ្លូវនៃ «ការកាត់បន្ថយភាពតានតឹង»។
មន្ត្រីរូបនេះបន្ថែមទៀតថា លោក បៃដិន នឹងបង្ហាញបញ្ជីនៃការព្រួយបារម្ភរបស់អាមេរិកអំពីការប្រមូលផ្ដុំកងទ័ពរុស្ស៊ីនៅជិតព្រំដែនប្រទេសអ៊ុយក្រែន ហើយនឹងបញ្ជាក់យ៉ាងច្បាស់ថាសហរដ្ឋអាមេរិក និងសម្ព័ន្ធមិត្តបានត្រៀមខ្លួន ដើម្បីឆ្លើយតបប្រសិនបើរុស្ស៊ីឈ្លានពានអ៊ុយក្រែន។
រុស្ស៊ីបានច្រានចោលការចោទប្រកាន់នេះថា ខ្លួនមិនមានផែនការបែបនេះទេ ហើយលើកឡើងថា ភាពតានតឹង គឺបង្កដោយអង្គការណាតូដើរហួសដែនកំណត់ ដែលអាចទទួលយកបាន ក្នុងការពង្រីកសកម្មភាពឆ្ពោះមកអឺរ៉ុបខាងកើតជាពិសេសមកជិតព្រំដែនរុស្ស៊ី។ លោក ពូទីន បានទាមទារឱ្យលោកខាងលិចធ្វើការធានាបញ្ឈប់ការពង្រីកទាំងនេះ៕