.jpg)
លោកស្រី Greene ថ្លែងក្នុងសន្និសីទកាសែតក្រៅវិមានកាពីតូល។AFP
ក្រុមហ៊ុនបណ្ដាញសង្គម Twitter បិទគណនីលោកស្រី Marjorie Taylor Greene សមាជិកមកពីសាធារណរដ្ឋ ជាអចិន្រៃ្តយ៍បន្ទាប់ពីបង្ហោះព័ត៌មានខុសម្តងហើយម្តងទៀតទាក់ទិនពីជំងឺរាតត្បាត។
ក្រុមហ៊ុន Twitter បានប្រកាសពីការហាមប្រាមគណនីលោកស្រី Greene កាលពីថ្ងៃអាទិត្យ ១ ថ្ងៃ បន្ទាប់ពីរូបលោកស្រីបានបង្ហោះ Tweet អំពីអ្វីដែលលោកស្រីអះអាងថា ចំនួនអ្នកស្លាប់ជាច្រើន គឺដោយសារវ៉ាក់សាំងកូវីដ។
ក្រុមហ៊ុនដដែលបាននិយាយថា ខ្លួនបានណែនាំគោលការណ៍របស់ខ្លួនលើព័ត៌មានមិនពិតទាក់ទិននឹងកូវីដ កាលពីឆ្នាំមុន បន្ទាប់ពីបានឃើញសេចក្តីសន្និដ្ឋានមិនមានមូលដ្ឋាននៅក្នុងការស្រាវជ្រាវ ឬការរាយការណ៍ដែលអាចទុកចិត្តបាន និងការនិទានរឿងមិនពិតជាច្រើន និងពាក្យចចាមអារ៉ាមដែលមិនច្បាស់លាស់ ដែលអាចរារាំងមនុស្សពីការសម្រេចចិត្តប្រកបដោយការយល់ដឹង និងធ្វើឱ្យពួកគេស្ថិតក្នុងហានិភ័យ។
លោកស្រី Greene បានចេញសេចក្តីថ្លែងការណ៍មួយនៅលើ Telegram កាលពីថ្ងៃអាទិត្យដោយថ្កោលទោសនូវអ្វីដែលគាត់អះអាងថា ជាការបរាជ័យរបស់ក្រុមហ៊ុន Twitter ដើម្បីចាត់វិធានការប្រឆាំងនឹងគណបក្សប្រជាធិបតេយ្យដែលបានរំលោភលើគោលនយោបាយរបស់ខ្លួន។
សកម្មភាពរបស់ Twitter ធ្វើឡើងបន្ទាប់ពីការអំពាវនាវរបស់គណបក្សសាធារណរដ្ឋម្តងហើយម្តងទៀតឱ្យបញ្ចប់មាត្រាទី២៣០ នៃច្បាប់ស្តីពីការទំនាក់ទំនងសមរម្យដែលផ្តល់ឱ្យក្រុមហ៊ុនអនឡាញនូវការការពារផ្នែកច្បាប់នៅពេលដែលពួកគេលុបមាតិកា។ គណបក្សសាធារណរដ្ឋក៏បានអះអាងដែរថា ក្រុមហ៊ុនប្រព័ន្ធផ្សព្វផ្សាយសង្គមបានអនុគ្រោះដល់គណបក្សប្រជាធិបតេយ្យ ហើយបានប្រើប្រាស់ការផ្តល់ជូនដើម្បីរារាំងពួកគេមិនឱ្យនិយាយដោយបើកចំហ៕
