.jpg)
កាលពីថ្ងៃអាទិត្យ ទី២ មករា យោធាកូរ៉េខាងត្បូង បានប្រកាសថា ជនជាតិកូរ៉េខាងត្បូង១ រូបបានលួចរត់ឆ្លងកំពែងព្រំដែនកូរ៉េ ក្នុងការរត់ចេញពីស្រុកដ៏កម្រទៅកាន់កូរ៉េខាងជើង។
គណៈសេនាធិការចម្រុះ(JCS) របស់កូរ៉េខាងត្បូងបាននិយាយថា ពួកគេបានធ្វើបេសកកម្មរុករក បន្ទាប់ពីប្រព័ន្ធសន្តិសុខប្រទះឃើញបុគ្គល១រូបនៅម៉ោង៩និង២០នាទីយប់ថ្ងៃសៅរ៍ទី១មករា នៅផ្នែកខាងកើតនៃតំបន់គ្មានយោធា (DMZ) ដែលជាព្រំដែនខណ្ឌចែកកូរ៉េទាំង២។
អាជ្ញាធរ JCS បាននិយាយថា ពួកគេមិនអាចបញ្ជាក់ថា បុគ្គលនេះនៅមានជីវិតដែរឬទេ ប៉ុន្តែបានជូនដំណឹងដល់យោធាកូរ៉េខាងជើងតាមរយៈប្រព័ន្ធទូរស័ព្ទទំនាក់ទំនងបន្ទាន់អំពីករណីនេះ ហើយស្នើសុំឱ្យមានការការពារបុគ្គល។
ការឆ្លងព្រំដែននេះ កើតឡើងខណៈពេលដែលកូរ៉េខាងជើងបិទព្រំដែនទាំងស្រុងក្រោមវិធានការដ៏តឹងរ៉ឹងដើម្បីប្រឆាំងជំងឺកូវីដ១៩ បើទោះបីជាប្រទេសនេះមិនបានប្រកាសអំពីករណីវិជ្ជមានជំងឺនេះក៏ដោយ។
ភាពខឹងសម្បានៅកូរ៉េខាងត្បូងបានកើតឡើង បន្ទាប់ពីករណីបាត់ខ្លួនអ្នកនេសាទ១ រូបកាលពីចុងឆ្នាំ ២០២០ ត្រូវបានបញ្ជាក់ថាជាករណីបាញ់សម្លាប់ដោយទាហានកូរ៉េខាងជើង។ កូរ៉េខាងជើងបាននិយាយថា ករណីនេះ គឺបង្កដោយការអនុវត្តវិធានការប្រឆាំងការឆ្លងជំងឺកូវីដ ហើយបានធ្វើការសុំទោស។
វិធានការបិទខ្ទប់ប្រទេស និងរឹតត្បិតការធ្វើដំណើរឆ្លងខេត្ត ក៏បានបង្កឱ្យចំនួនអ្នករត់ពីកូរ៉េខាងជើងទៅកាន់កូរ៉េខាងត្បូងធ្លាក់ដល់កម្រិតទាបបំផុតក្នុងប្រវត្តិសាស្ត្រ៕
