.jpg)
រោងចក្រថាមពលនុយក្លេអ៊ែររបស់អាល្លឺម៉ង់។ AFP
ប្រទេសអាល្លឺម៉ង់ អូទ្រីស និងលុចសំបួ បានរិះគន់ផែនការរបស់សហភាពអឺរ៉ុបក្នុងការចាត់ទុកថាមពលនុយក្លេអ៊ែរ ជាប្រភពថាមពលប្រកបដោយចីរភាពអាចទទួលការវិនិយោគបៃតង ដែលជាចំណុចកណ្ដាលនៃផែនការរបស់អឺរ៉ុប ដើម្បីកាត់បន្ថយការប្រើប្រាស់កាបូនក្នុងសេដ្ឋកិច្ច។
រដ្ឋមន្ត្រីក្រសួងសេដ្ឋកិច្ច និងសកម្មភាពអាកាសធាតុអាល្លឺម៉ង់លោករ៉ូប៊ឺត ហាបេក ដែលជាសមាជិកនៃគណបក្សបៃតងនៅក្នុងសម្ព័ន្ធភាពកាន់អំណាច បាននិយាយថា៖ «វាមិនទំនងថាការលាបពណ៌បៃតងនេះនឹងអាចរកឃើញការទទួលយកនៅលើទីផ្សារហិរញ្ញវត្ថុឬអត់»។ លោកបន្តទៀតថា៖ «តាមទស្សនៈរបស់យើង មិនចាំបាច់មានការបន្ថែមនេះទៅក្នុងបញ្ជីបែងចែកនេះទេ»។
សំណើរបស់សហភាពអឺរ៉ុបគឺជាផ្នែកមួយនៃបញ្ជីបែងចែកប្រភពថាមពល ដែលមានគោលបំណងជួយដឹកនាំការវិនិយោគរាប់ពាន់លានអឺរ៉ូទៅកាន់វិស័យដែលជួយកាត់បន្ថយការប្រើប្រាស់កាបូនក្នុងសេដ្ឋកិច្ចរបស់ពួកគេ។ ប៉ុន្តែដំណើរការបង្កើតបញ្ជីនេះគឺពោរពេញទៅដោយជម្លោះនយោបាយនៅក្នុងគណៈកម្មការអឺរ៉ុប និងបណ្ដាប្រទេសជាសមាជិក។
រដ្ឋមន្ត្រីសកម្មភាពអាកាសធាតុ និងថាមពលអូទ្រីសលោកស្រីឡេអូណូ ហ្គឺវេស្លឺ បាននិយាយថារដ្ឋាភិបាលលោកស្រីនឹងពិចារណាប្ដឹងគណៈកម្មការអឺរ៉ុប ប្រសិនបើការចាត់ទុកថាមពលនុយក្លេអ៊ែរជាថាមពលបៃតងបានដំណើរទៅមុខ។ រីឯលោកក្លូដ តួមេសវិញ ដែលជារដ្ឋមន្ត្រីក្រសួងថាមពលលុចសំបួ បានហៅការដាក់បញ្ចូលថាមពលនុយក្លេអ៊ែរថាជា «ការបង្កហេតុ»។
ការដាក់បញ្ចូលថាមពលនុយក្លេអ៊ែរ ត្រូវបានគេមើលឃើញយ៉ាងទូលំទូលាយថាជាជ័យជម្នះសម្រាប់រដ្ឋាភិបាលបារាំង ដែលជំរុញឱ្យសហភាពអឺរ៉ុបធានាថាផែនការថ្មីនេះនឹងមិនដាក់ទណ្ឌកម្មលើបច្ចេកវិទ្យាដែលផ្ដល់ថាមពលអគ្គិសនីស្ទើរតែ២ភាគ៣នៃតម្រូវការរបស់បារាំង។ បច្ចេកវិទ្យានុយក្លេអ៊ែរគឺមិនបញ្ចេញឧស្ម័នកាបូនឌីអុកស៊ីតទេ ប៉ុន្តែផលិតកាកសំណល់មានវិទ្យុសកម្ម និងជាតិពុលខ្ពស់៕
