កាលពីពាក់កណ្ដាលឆ្នាំ ២០១៨ កវីនិពន្ធជនជាតិរុស្ស៊ី ១ រូប ដែលប្រើប្រាស់នាមក្លែងក្លាយហៅថា Siberian Viking បានបង្ហោះរូបគំនូរត្លុកនៅលើគណនីបណ្ដាញសង្គមហ្វេសប៊ុករបស់ខ្លួន។ រូបនេះបានបង្ហាញអំពីឥន្ទ្រីក្បាល ២ ក្នុងនិមិត្តសញ្ញារបស់រដ្ឋរុស្ស៊ី ដោយក្បាលរបស់ឥន្ទ្រីទាំង ២ ត្រូវបានជំនួសដោយក្បាលរបស់លោក វ្ល៉ាឌីមៀរ ពូទីន និងនាយករដ្ឋមន្ត្រីដែលកាលនោះ គឺលោក ឌីមីទ្រី មេដវេដេវ។
រូបភាពនេះ គឺអមជាមួយនឹងកំណាព្យមួយដែលសរសេរថា ឥន្ទ្រីមានចិត្តលោភលន់ជាងអ្នកដទៃ ២ ដង កុហកច្រើនជាង ២ ដង ហើយបានធ្វើការឃ្លាំមើលដោយភ្នែក ៤។ កំណាព្យនេះត្រូវបានបញ្ចប់ដោយសំណួរមួយដែលសួរថា៖ «តើនៅពេលណាទើបប្រជាជនរុស្ស៊ីភ្ញាក់ខ្លួន ដើម្បីលុបបំបាត់ជំងឺនេះ»។
រដ្ឋាភិបាលរុស្ស៊ី បានប្រាប់ឱ្យហ្វេសប៊ុកលុបការបង្ហោះនេះ ដោយសារវាជា «ការមិនគោរពយ៉ាងស្រឡះចំពោះរដ្ឋធម្មនុញ្ញ និងប្រធានាធិបតីនៃសហព័ន្ធរុស្ស៊ី»។ ហ្វេសប៊ុកមិនបានធ្វើតាមសំណើ ហើយការបង្ហោះនេះបានបង្ហាញក្នុងពាក្យបណ្ដឹង មួយក្នុងចំណោមជាង ៦០ ដែលរដ្ឋាភិបាលរុស្ស៊ី បានប្ដឹងក្រុមហ៊ុនបណ្ដាញសង្គមនានាក្នុងឆ្នាំ ២០២១ ដែលមានលទ្ធផលជាការផាកពិន័យរាប់លានដុល្លារ។
គេមិនដឹងពិតប្រាកដទេថា ប្រាក់ផាកពិន័យប៉ុន្មានត្រូវបានបង់រួចនោះទេ។ ប៉ុន្តែករណីទាំងនេះបង្ហាញពីការលំបាកក្នុងប្រតិបត្តិការនៅក្នុងប្រទេសដែលមានការដាក់កម្រិតយ៉ាងខ្លាំងលើសេរីភាពនៃការបញ្ចេញ មតិ និងសកម្មភាពនយោបាយ ជាពិសេសបន្ទាប់ពីសាលក្រមរំលាយក្រុមប្រឆាំងដឹកនាំដោយលោក អាឡិចស៊ី ណាវ៉ាល់នី។
និយតករប្រព័ន្ធផ្សព្វផ្សាយរុស្ស៊ី Roskomnadzor បាននិយាយថា ក្រុមហ៊ុនបណ្ដាញសង្គមមានកាតព្វកិច្ចស្វែងរក និងលុបចោលការបង្ហោះគ្រោះថ្នាក់ ដែលរួមមាន «រូបភាពអាសអាភាសរបស់កុមារ ការធ្វើអត្តឃាត គ្រឿងញៀន ភាពជ្រុលនិយម និងព័ត៌មានក្លែងក្លាយ»។
ប៉ុន្តែការពិនិត្យដោយសារព័ត៌មាន BBC ទៅលើករណីជាង ៤០០ ដែលត្រូវបានលើកឡើងក្នុងពាក្យបណ្ដឹងប្រឆាំងនឹងក្រុមហ៊ុនបណ្ដាញសង្គមធំៗដូចជា Google Facebook Instagram និង Twitter បានបង្ហាញមានតែ ៩ ករណីប៉ុណ្ណោះ ដែលទាក់ទងនឹងការរំលោភបំពានលើកុមារ ឬគ្រឿងញៀន ហើយត្រឹមតែ ១២ ករណីប៉ុណ្ណោះមានការទាក់ទងនឹងអត្តឃាត។ ករណីភាគច្រើនលើសលប់ គឺពាក់ព័ន្ធទៅនឹងចលនាប្រឆាំងរបស់លោកណាវ៉ាល់នី។
រដ្ឋាភិបាលលោក ពូទីន បាននិយាយថា សកម្មភាពដែលធ្វើឡើងប្រឆាំងនឹងក្រុមហ៊ុនបណ្ដាញសង្គមទាំងនេះ គឺមិនមែនជាការចាប់ពិរុទ្ធនយោបាយទេ ប៉ុន្តែគ្រាន់តែជាការអនុវត្តច្បាប់របស់រុស្ស៊ីប៉ុណ្ណោះ។
សម្ពាធលើក្រុមហ៊ុនបណ្ដាញសង្គម គឺមានចាប់តាំងពីឆ្នាំ ២០១៥ បន្ទាប់ពីច្បាប់មួយចូលជាធរមានដែលអនុញ្ញាតឱ្យតម្រូវឱ្យពួកគេរក្សាទុកទិន្នន័យផ្ទាល់ខ្លួនរបស់អ្នកប្រើប្រាស់រុស្ស៊ី នៅលើទឹកដីរុស្ស៊ី ហើយផ្ដល់អំណាចឱ្យរដ្ឋាភិបាលផាកពិន័យពួកគេ ឬបិទពួកគេចំពោះការរំលោភ។ គ្មានក្រុមហ៊ុនលោកខាងលិចណាមួយបានអនុវត្តតាម ដែលនាំទៅដល់ការបិទដំណើរការក្រុមហ៊ុន LinkedIn នៅរុស្ស៊ី ក្នុងឆ្នាំ ២០១៦។
ក្នុងឆ្នាំ ២០១៦ សំណើពីរដ្ឋាភិបាលរុស្ស៊ីទៅកាន់ក្រុមហ៊ុន Google ដើម្បីលុបវីដេអូមួយចំនួនចេញពី YouTube និងដើម្បីទប់ស្កាត់លទ្ធផលស្វែងរកមួយចំនួនបានចាប់ផ្ដើមកើនឡើងយ៉ាងឆាប់រហ័ស។ របាយការណ៍តម្លាភាពរបស់ក្រុមហ៊ុនបង្ហាញថា ក្នុងរយៈពេល ១០ ឆ្នាំចុងក្រោយនេះ ខ្លួនបានទទួលសំណើបែបនេះពីរុស្ស៊ីច្រើនជាងប្រទេសដទៃទៀតក្នុងពិភពលោករួមបញ្ចូលគ្នា ដោយនិយាយថា ១ ភាគ ៣ នៃសំណើពួកគេគឺទាក់ទងនឹង «សន្តិសុខជាតិ»។
Google បានធ្វើតាមសំណើមួយចំនួន ប៉ុន្តែបានបដិសេធធ្វើតាមសំណើផ្សេងទៀត។
កិច្ចខិតខំប្រឹងប្រែងដើម្បីគ្រប់គ្រងការរីករាលដាលនៃព័ត៌មានដែលមិនចង់បាននៅលើបណ្ដាញសង្គមបានបង្កើនល្បឿនបន្ថែមទៀតនៅដើមឆ្នាំ ២០២១ បន្ទាប់ពីការវិលត្រឡប់របស់ណាវ៉ាល់នី មកកាន់ប្រទេសរុស្ស៊ី ពីមន្ទីរពេទ្យនៅប្រទេសអាល្លឺម៉ង់ ជាកន្លែងដែលលោកសម្រាកព្យាបាលការបំពុលដោយអាវុធគីមី។
កាលពីខែមីនា អាជ្ញាធររុស្ស៊ីបានបន្ថយល្បឿនអ៊ីនធឺណិតរបស់ក្រុមហ៊ុនបណ្ដាញសង្គម Twitter បន្ទាប់ពីក្រុមហ៊ុននេះបានបដិសេធមិនធ្វើតាមសំណើរបស់ខ្លួន ធ្វើឱ្យគេហទំព័រ និងកម្មវិធីរបស់ Twitter មានដំណើរការយឺតខ្លាំង។ កាលពីខែឧសភា រុស្ស៊ីបានស្ដារល្បឿនឱ្យ Twitter វិញ បន្ទាប់ពីក្រុមហ៊ុននេះយល់ព្រមលុបចោលសារជិត ៥ ០០០ សម្រាប់ អ្នកប្រើប្រាស់រុស្ស៊ី ប៉ុន្តែសារទាំងនេះនៅតែអាចមើលឃើញ សម្រាប់អ្នកប្រើប្រាស់នៅខាងក្រៅរុស្ស៊ី។
ប្រទេសរុស្ស៊ី ប្រើមធ្យោបាយបច្ចេកទេសដើម្បីរារាំងប្រតិបត្តិការរបស់ក្រុមហ៊ុនបណ្ដាញសង្គម ហើយមានច្បាប់ដែលអាចផ្ដល់ហេតុផលសម្រាប់ការធ្វើបែបនេះ។
បណ្ដាញសង្គមអាចត្រូវបានរារាំងដោយស្របច្បាប់សម្រាប់ការមិនរក្សាទុកទិន្នន័យផ្ទាល់ខ្លួនរបស់អ្នកប្រើប្រាស់រុស្សីនៅក្នុងប្រទេសរុស្ស៊ី ឬសម្រាប់ការបដិសេធមិនលុបសារដែលបង្កគ្រោះថ្នាក់ ហើយចាប់ពីឆ្នាំនេះ រុស្ស៊ីនឹងអាចទប់ស្កាត់ពួកគេមិនឱ្យមានការិយាល័យនៅក្នុងប្រទេស។
ប្រទេសរុស្ស៊ី ក៏បានដាក់ចេញនូវទោសទណ្ឌខ្ពស់ៗថ្មីផងដែរ សម្រាប់ការខកខានក្នុងការលុបសារខុសច្បាប់ ហើយនៅក្នុងសំណុំរឿងមួយចំនួនទាំងក្រុមហ៊ុន Google និង បណ្ដាញសង្គមFacebook ប្រឈមនឹងការផាកពិន័យរហូតដល់ ១០ ភាគរយនៃប្រាក់ចំណូលប្រចាំឆ្នាំរបស់ពួកគេនៅក្នុងប្រទេសរុស្ស៊ី។
បណ្ដាញសង្គម Facebook មិនបានបង្ហាញពីប្រាក់ចំណូល របស់ខ្លួននៅរុស្ស៊ីទេ ប៉ុន្តែកាលពីឆ្នាំមុនចំណូលរបស់ក្រុមហ៊ុនបច្ចេកវិទ្យា Google នៅរុស្ស៊ី គឺយ៉ាងហោចណាស់ ១ ពាន់លានដុល្លារ ដែលបើកផ្លូវឱ្យមានការផាកពិន័យចំនួន ១០០ លានដុល្លារ៕