.jpg)
វីរុសបំប្លែងថ្មីអូមីក្រុង ដែលរកឃើញនៅអាហ្វ្រិក។ រូបថត AFP
ថ្វីបើវ៉ារ្យ៉ង់អូមីក្រុង មានការរីករាលដាលឆាប់រហ័សយ៉ាងណាក្ដី ប៉ុន្តែផលប៉ះពាល់របស់វាត្រូវបានអ្នកវិទ្យាស្ត្រសន្និដ្ឋានថា ស្ថិតក្នុងកម្រិតស្រាលដោយសារមេរោគនេះជ្រាបចូលត្រឹមច្រមុះបំពង់កជាជាងចូលទៅក្នុងសួតដែលបណ្ដាលឱ្យក្លាយទៅជាករណីធ្ងន់ធ្ងរប៉ះពាល់ដល់អាយុជីវិតដូចវ៉ារ្យ៉ង់ដែលតា។
ក្រុមអ្នកស្រាវជ្រាវនៅមហាវិទ្យាល័យវេជ្ជសាស្ត្រនៃសាកលវិទ្យាល័យហុងកុង បានរកឃើញថា វ៉ារ្យ៉ង់អូមីក្រុងចម្លងលឿនជាងវ៉ារ្យ៉ង់ដែលតា ៧០ ដងក្នុងផ្លូវដង្ហើមរបស់មនុស្ស។ ការសិក្សាបានបង្ហាញថា បើប្រៀបធៀបជាមួយទាំងដែលតា និងវីរុសដើម វ៉ារ្យ៉ង់អូមីក្រុងមានធ្វើដំណើរចូលទៅក្នុងទងសួត ឬបំពង់កដែលរត់តាមផ្លូវដង្ហើមខាងលើលឿន ប៉ុន្តែធ្វើដំណើរជ្រៀតចូលក្នុងសួតយឺត។
យោងតាមក្រុមអ្នកស្រាវជ្រាវវ៉ារ្យ៉ង់អូមីក្រុងចម្លង បានតិចមានប្រសិទ្ធភាពទាបជាង ១០ ដងពេលចូលទៅក្នុងជាលិកាសួតរបស់មនុស្ស បើធៀបនឹងវីរុស SARS-CoV-2 ដើម ដែលជាសញ្ញាបង្ហាញពីភាពធ្ងន់ធ្ងរនៃវ៉ារ្យ៉ង់នេះស្ថិតក្នុងកម្រិតទាប។
មានការសន្មតថា ករណីធ្ងន់ធ្ងរពីកូវីដ ១៩ កើតឡើងនៅពេលដែលមេរោគចូលទៅក្នុងសួតហើយរាលដាលដល់ផ្នែកផ្សេងៗនៃរាងកាយពីទីនោះ ប្រសិនបើវាមានវត្តមានក្នុងផ្លូវដង្ហើមខាងលើមាត់ ច្រមុះ ជាដើម ឱកាសនៃការវិវត្តជាជំងឺធ្ងន់ធ្ងរនៅមានទាបណាស់។
ទោះជាយ៉ាងណា អ្នកដឹកនាំការនិពន្ធការស្រាវជ្រាវលោកបណ្ឌិត Michael Chan បានជំរុញឱ្យមានការប្រុងប្រយ័ត្នចំពោះការរកឃើញនេះ។ លោកវេជ្ជបណ្ឌិត Chan បាននិយាយថា៖ «វាជារឿងសំខាន់ក្នុងការកត់សម្គាល់ពីភាពកាចសាហាវរបស់វ៉ារ្យ៉ង់ ហើយវាកាន់តែសំខាន់ក្នុងការកំណត់ឱ្យដឹងពីការឆ្លើយតបនៃប្រព័ន្ធភាពស៊ាំរបស់បុគ្គលទៅនឹងការឆ្លងមេរោគផងដែរ»។
ករណីសម្រាកនៅមន្ទីរពេទ្យជា ច្រើនបានកើតឡើងមិនត្រឹមតែដោយសារតែជំងឺដែលមេរោគបង្កឡើងប៉ុណ្ណោះទេ ប៉ុន្តែក៏ដោយសារតែធម្មជាតិដែលមិនអាចទាយទុកជាមុនបាន ដែលប្រព័ន្ធការពាររាងកាយរបស់យើងឆ្លើយតបទៅនឹងមេរោគ។ ក្នុងករណីខ្លះប្រព័ន្ធភាពស៊ាំមិនអាចបិទ និងវាយប្រហារកោសិកា ដែលឆ្លងមេរោគបាននោះទេ។
លោក Chan បានកត់សម្គាល់ថា មេរោគឆ្លងខ្លាំងដូចជា វ៉ារ្យ៉ង់អូមីក្រុងអាចបណ្តាលឱ្យមានជំងឺធ្ងន់ធ្ងរ និងស្លាប់ដោយគ្រាន់តែរីករាលដាលលឿនជាងមុន ទោះបីជាការឆ្លងមេរោគសួត ដោយសារវ៉ារ្យ៉ង់នេះ ហាក់ដូចជា មិនធ្ងន់ធ្ងរខ្លាំងក៏ដោយ។
ក្រុមសិក្សាវ៉ារ្យ៉ង់អូមីក្រុង នៅទីក្រុង Glasgow នៃប្រទេសស្កុតឡេនថា ពួកគេបានរកឃើញចម្លើយថា ហេតុអ្វីបានជាវ៉ារ្យ៉ង់នេះ មិនអាចឆ្លងកោសិកាសួតបានច្រើនដូចវាឆ្លងនៅលើផ្លូវដង្ហើមខាងលើ។ ពួកគេបានរកឃើញប្រូតេអ៊ីនសំខាន់ៗនៅលើកោសិកាសួតហៅថា TMPRSS2 ដែលជាធម្មតាកោសិកានេះ បានជួយវ៉ារ្យ៉ង់ SARS-COV-2 មុនជ្រាបចូលទៅក្នុងកោសិកាសួតដោយធ្វើការចងខ្លួនជាប់ជាមួយអូមីក្រុងបានតិចជាងមានន័យថា វ៉ារ្យ៉ង់នេះពិបាកក្នុងការចូលទៅខាងក្នុងកោសិកាសួតនិងចម្លងមេរោគ។
មេរោគចូលទៅក្នុងកោសិកាតាមច្រមុះ បំពង់ក និងផ្លូវដង្ហើមខាងលើតាមរបៀបផ្សេងគ្នា ដូច្នេះទោះបីជាវាត្រូវបានគេរកឃើញក្នុងបរិមាណច្រើននៅក្នុងផ្នែកទាំងនេះនៃផ្លូវដង្ហើមក៏ដោយ កំហាប់នៃមេរោគគឺទាបជាងនៅក្នុងជាលិកាសួត។ នេះក៏អាចពន្យល់បានមួយផ្នែកថា ហេតុអ្វីបានជាវ៉ារ្យ៉ង់អូមីក្រុងឆ្លងដោយរបៀបនេះ។ ប្រសិនបើវាត្រូវបានប្រមូលផ្តុំក្នុងបរិមាណខ្ពស់នៅក្នុងផ្លូវដង្ហើមខាងលើ មេរោគទំនងជាត្រូវបញ្ជូនចេញវិញខ្លះតាមរយៈការក្អក កណ្តាស់ ឬដកដង្ហើមចេញពីផ្នែកទាំងនេះនៃផ្លូវដង្ហើម ហើយឆ្លងទៅមនុស្សផ្សេងទៀត។
ការសិក្សារួមគ្នារបស់អាមេរិក និងជប៉ុន បានពិនិត្យមើលផលប៉ះពាល់នៃវ៉ារ្យ៉ង់អូមីក្រុងចំពោះសត្វកណ្តុរ និងហេមស្ទ័រ។ សត្វកកេរទាំងនេះ មានអ្នកទទួលអង់ស៊ីមបំប្លែង ជាអង់ស្យូតង់ស៊ីន២ (ACE2) ដូចគ្នាដែលមនុស្សមាននិងអ្វីដែលមេរោគ Coronovairus ភ្ជាប់ដើម្បីចូល និងឆ្លងកោសិការបស់មនុស្ស។ ការសិក្សាបានរកឃើញថា សត្វកកេរដែលឆ្លងអូមីក្រុងមានការខូចខាតសួតតិចជាង ស្រកទម្ងន់តិចជាង និងទំនងជាស្លាប់តិចជាងសត្វកកេរដែលឆ្លងវ៉ារ្យ៉ង់ដែលតា។
ការសិក្សាផ្តល់ក្តីសង្ឃឹមខ្លះ សម្រាប់ស្ថានភាពស្រាលរបស់ជំងឺ ប៉ុន្តែការសិក្សាមន្ទីរពិសោធន៍មិនតែងតែអព្យាក្រឹតទាំងស្រុងទេនៅក្នុងពិភពលោកផ្ទាល់ដោយសារវាមានកត្តាច្រើនទៀតពាក់ព័ន្ធ។ ទិន្នន័យពីអ្រាហ្វិកខាងត្បូងដែលជាកន្លែងគេរកឃើញវ៉ារ្យ៉ង់ដំបូង គេសង្កេតឃើញថាមិនមានករណីកើនឡើងពិតប្រាកដនៃការសម្រាកព្យាបាលនៅមន្ទីរពេទ្យនោះទេប៉ុន្តែវាជាការសំខាន់ក្នុងការកត់សម្គាល់ថា អាហ្វ្រិកខាងត្បូងមានប្រជាជនវ័យក្មេង។
យើងមិនទាន់ឃើញពីរបៀបដែលវ៉ារ្យ៉ង់អូមីក្រុងមានឥទ្ធិពលលើមនុស្សចាស់ទេ ការរស់នៅចម្រុះជាមួយគ្នាក្នុងផ្ទះតែមួយក្នុងអំឡុងពេលបុណ្យណូអែល និងឆ្នាំថ្មីទំនងជានឹងឆ្លើយសំណួរនោះក្នុងពេលឆាប់ៗនេះ។ គួរជម្រាបផងដែរថា សាលារៀនជុំវិញពិភពលោកត្រូវបានបិទសម្រាប់ពិធីបុណ្យ ប៉ុន្តែនឹងបើកនៅដើមខែមករា ដូច្នេះកុមារដែលធ្លាប់ឆ្លងមេរោគក្នុងរលកកន្លងមក នឹងត្រូវប្រឈមមុខនឹងការឆ្លងមេរោគនៅក្នុងថ្នាក់រៀន ហើយនឹងចម្លងមេរោគនេះទៅផ្ទះ និងក្រុមគ្រួសារពួកគេ។
តែទោះជាយ៉ាងណាក្ដី អ្នកវិទ្យាសាស្ត្រវេជ្ជបណ្ឌិតជាច្រើននៅតែបារម្ភថា ផលប៉ះពាល់នៃជំងឺស្រាលជាងនេះ អាចបញ្ឆោតមនុស្សឱ្យយល់ខុសអំពីសុវត្ថិភាព ធ្វើឱ្យពួកគេមិនសូវពាក់ម៉ាស់គម្លាតសង្គម ឬអាក្រក់ជាងនេះមិនទៅចាក់វ៉ាក់សាំង។
បើទោះជាករណីស្លាប់ដោយសារវ៉ារ្យ៉ង់នៅមានកម្រិតទាប ហើយឥទ្ធិពលនៃជំងឺនេះ ហាក់ដូចជាស្រាលក្ដី ក៏វ៉ារ្យ៉ង់នេះ នៅតែជាការគំរាមកំហែងសកលដ៏ធ្ងន់ធ្ងរ៕
វីដេអូ៖
