កាលពីថ្ងៃអង្គារ ទី ៤ មករា ប្រធានាធិបតីលីទុយអានី លោក ហ្គីតាណាស ណាវសេដា បាននិយាយថា ការសម្រេចចិត្តឱ្យកោះតៃវ៉ាន់បើកស្ថានទូតក្នុងប្រទេសលីទុយអានី គឺជាកំហុសដ៏ធំមួយ ហើយបានរិះគន់សកម្មភាពរបស់រដ្ឋាភិបាលលីទុយអានីដែលបង្កឱ្យមានជម្លោះការទូតជាមួយចិនដីគោក។
លោក ណាវសេដា បាននិយាយនៅលើវិទ្យុលីទុយអានីថា រដ្ឋាភិបាលស្ដាំកណ្ដាលនិយមមិនបានពិគ្រោះយោបល់ជាមួយលោកអំពីការអនុញ្ញាតឱ្យមានការប្ដូរឈ្មោះបេសកកម្មការទូតរបស់តៃវ៉ាន់ពីការិយាល័យតំណាងក្រុងតៃប៉ិ ទៅជាការិយាល័យតំណាងតៃវ៉ាន់។
ក្រុងប៉េកាំងបានចោទប្រកាន់ប្រទេសលីទុយអានីថា បានរំលោភបំពានគោលការណ៍ចិនតែ១ ដែលកំណត់ឱ្យមានការទទួលស្គាល់ចិនតែ១ប៉ុណ្ណោះ។ ក្រុងប៉េកាំង បានដកឯកអគ្គរដ្ឋទូតរបស់ខ្លួនចេញពីលីទុយអានី ហើយបានកម្រិតយ៉ាងខ្លាំងលើបេសកកម្មការទូតលីទុយអានីក្នុងប្រទេសចិន។ កាលពីខែមុនលីទុយអានី បានដកមន្ត្រីការទូតចុងក្រោយរបស់ខ្លួនចេញពីក្រុងប៉េកាំង បន្ទាប់រដ្ឋាភិបាលចិនដកហូតឯកសារអត្តសញ្ញាណការទូតរបស់ពួកគេ។
បើទោះជាយ៉ាងនេះក៏ដោយ ទាំងលោកណាវសេដា និងរដ្ឋាភិបាល បានទទូចថា ពួកគេនៅតែគោរពគោលការណ៍ចិនតែ១ ប៉ុន្តែនិយាយថាខ្លួនមានសិទ្ធិបង្កើតទំនាក់ទំនងសេដ្ឋកិច្ច និងវប្បធម៌ជាមួយនរណាដែលខ្លួនចង់ទាក់ទង៕