កាលពីថ្ងៃព្រហស្បតិ៍ ទី ៦ មករា នាយករដ្ឋមន្ត្រីអាមេនីបានប្រកាសថា សម្ព័ន្ធភាពអតីតរដ្ឋសហភាពសូវៀតដឹកនាំដោយរុស្ស៊ីនឹងបញ្ជូនកងកម្លាំងរក្សាសន្តិភាពទៅកាន់ប្រទេសកាហ្សាក់ស្ថាន បន្ទាប់ពីប្រធានាធិបតីប្រទេសនេះ បានអំពាវនាវសុំជំនួយក្នុងការបង្ក្រាបបាតុកម្មដែលបានប្រែទៅជាហិង្សា។
នាយករដ្ឋមន្ត្រីអាមេនីលោក នីកូល ផាស៊ីនយ៉ាន បានប្រកាសលើបណ្ដាញសង្គម Facebook ថា អង្គការសន្ធិសញ្ញាសន្តិសុខសមូហភាព (CSTO) ដែលមានសមាជិករុស្ស៊ី អាមេនី បេឡារុស កាហ្សាក់ស្ថាន កៀហ្ស៊ីស៊ីស្ថាន និងតាហ្ស៊ីគីស្ថាន នឹងបញ្ជូនកងកម្លាំងរក្សាសន្តិភាពទៅកាន់កាហ្សាក់ស្ថាន ដើម្បីស្ដារស្ថិរភាព បន្ទាប់ពីអគាររដ្ឋាភិបាលជាច្រើនត្រូវបានដុត ហើយអាកាសយានដ្ឋានអន្តរជាតិក្រុងអាលម៉ាទីត្រូវបានកាន់កាប់ដោយក្រុមបាតុករ។
បើតាមការរាយការណ៍ដោយសារព័ត៌មានរុស្ស៊ី Sputnik ប៉ូលិស និងកងឆ្មាំជាតិ ៨នាក់ បានស្លាប់ក្នុងការបង្ក្រាបបាតុកម្មនៅថ្ងៃអង្គារ និងថ្ងៃពុធ។ ក្រោយមកមានការរាយការណ៍ថា ទាហានចំនួន ២ នាក់ បានស្លាប់ ក្នុងបេសកកម្មបណ្ដេញបាតុករចេញពីអាកាសយានដ្ឋានក្រុងអាលម៉ាទី។
ដំបូងឡើយបង្កឡើងដោយកំហឹងចំពោះការកើនឡើងតម្លៃឧស្ម័នឥន្ធនៈ LPG។ បាតុកម្មនេះបានប្រែក្លាយយ៉ាងឆាប់រហ័សទៅជាបាតុកម្មប្រឆាំងអតីតប្រធានាធិបតីន័រស៊ុលតង់ ណាហ្សាបាយ៉េវ ដែលបានរក្សាអំណាចជាច្រើនឆ្នាំ បើទោះបីជាបានលាលែងពីតំណែងតាំងពីឆ្នាំ ២០១៩ បន្ទាប់ពីការកាន់អំណាចជាង ៣ ទសវត្សរ៍។
ក្នុងសកម្មភាពដែលត្រូវបានគេគិតថា ធ្វើឡើងដើម្បីបន្ធូរបន្ថយកំហឹងសាធារណៈលោកប្រធានាធិបតីកាស៊ីម-ជូម៉ាត តូកាយ៉េវ បានបណ្ដេញលោកណាហ្សាបាយ៉េវចេញពីតំណែងប្រធានក្រុមប្រឹក្សាសន្តិសុខរំលាយគណៈរដ្ឋមន្ត្រី ហើយស្ដារតម្លៃទាបនៃឧស្ម័នឥន្ធនៈ LPG។ បើទោះជាយ៉ាងនេះក៏ដោយក៏គ្មានសញ្ញាថា បាតុកម្មនៅប្រទេសកាហ្សាក់ស្ថាន នឹងមានភាពធូរស្បើយនៅពេលឆាប់ៗនោះទេ៕