លោក Emmanuel Macron ត្រូវប្រឈមមុខនឹងការរិះគន់ពីគូប្រជែងនយោបាយ និងឈុតឆាកក្តៅគគុកនៅក្នុងសភាកាលពីថ្ងៃពុធ បន្ទាប់ពីលោកព្រមានដល់ប្រជាជនបារាំង ដែលមិនបានចាក់វ៉ាក់សាំង ថា លោកនឹងធ្វើឱ្យជីវិតរបស់ពួកគេលំបាកតាម ដែលអាចធ្វើទៅបាន ដោយនឹងហាមឃាត់មិនឱ្យពួកគេចូលទៅកាន់កន្លែងនានា ដូចជាហាងកាហ្វេ និងភោជនីយដ្ឋាន។
ការជជែកដេញដោលរបស់សភាដ៏សំខាន់មួយស្តីពីការណែនាំអំពី "បណ្ណវ៉ាក់សាំង" ដែលត្រូវបានស្នើឡើង សម្រាប់ការចូលទៅកាន់តំបន់ដូចជា សារមន្ទីរ និងរថភ្លើងផ្លូវឆ្ងាយ ត្រូវបន្តឡើងវិញនៅរសៀលថ្ងៃ ពុធ។
ការជជែកដេញដោលត្រូវបានផ្អាកនៅមុនម៉ោង ២ ទៀបភ្លឺ កាលពីថ្ងៃពុធ ខណៈដែលសមាជិកសភា បានសម្តែងការខឹងសម្បានៅឯបទសម្ភាសរបស់លោក Macron ដែលក្នុងនោះលោកបាននិយាយថា មនុស្ស ៥ លាននាក់ ដែលមិនបានចាក់វ៉ាក់សាំងគឺ "ជាបុគ្គលគ្មានការទទួលខុសត្រូវ" ហើយថា គាត់ពិតជាចង់ "ធ្វើឱ្យជីវិតរបស់ពួកគេរស់នៅទាំងលំបាកវេទនាបំផុត"។
អ្នកនាំពាក្យរដ្ឋាភិបាលបារាំង លោក Gabriel Attal បានព្រមានថា ករណីកូវីដនឹងកើនឡើងច្រើនអស្ចារ្យនៅបារាំងក្នុងរយៈពេលប៉ុន្មានថ្ងៃខាងមុខនេះ ហើយការឆ្លងកំពុងឈានដល់កម្រិតខ្ពស់ក្នុងតំបន់ Île-de-France ជុំវិញទីក្រុងប៉ារីស ក៏ដូចជាតំបន់មួយចំនួនទៀតផងដែរ។ .
លោកបាននិយាយថា ស្ថានភាពក្នុងមន្ទីរពេទ្យ អាចនឹងកាន់តែអាក្រក់នៅប៉ុន្មានសប្តាហ៍ខាងមុខ។ តួយ៉ាង កាលពីថ្ងៃពុធ ប្រទេសបារាំង បានរកឃើញករណីឆ្លងចំនួន ៣៣៥ ០០០ នាក់ ក្នុងរយៈពេល ២៤ ម៉ោងប៉ុណ្ណោះ។
ទោះជាយ៉ាងណា រដ្ឋាភិបាល ដែលកំពុងពង្រឹងច្បាប់បច្ចុប្បន្ន ក៏កំពុងស្វែងរកវិធីធ្វើយ៉ាងណាឱ្យប្រជាជន បង្ហាញភ័ស្តុតាងនៃការចាក់វ៉ាក់សាំងកូវីដ ដើម្បីចូលទៅក្នុងហាងកាហ្វេ ភោជនីយដ្ឋាន សារមន្ទីរ និងរោងកុន ឬប្រើប្រាស់រថភ្លើងផ្លូវឆ្ងាយ។
ភាពខ្វែងគំនិត និងការប៉ះទង្គិចគ្នាម្តងទៀតនៅក្នុងសភា ក៏ដូចជាការស្នើវិសោធនកម្មរាប់រយច្បាប់ កំពុងធ្វើឱ្យរដ្ឋាភិបាលបារាំង ជួបការលំបាកក្នុងការជំរុញច្បាប់នេះឱ្យចប់មុនថ្ងៃផុតកំណត់នៅថ្ងៃទី ១៥ ខែមករា។
នៅក្នុងបទសម្ភាសជាមួយកាសែត Le Parisien ដែលបានចុះផ្សាយកាលពីថ្ងៃពុធ លោក Macron ប្រធានាធិបតីបារាំង បានប្រើកិរិយាស័ព្ទ ដោយចេតនា "emmerder" ដែលមកពីពាក្យ "merde" ឬ "shit" ហើយត្រូវបានគេប្រើយ៉ាងទូលំទូលាយនៅក្នុងប្រទេសបារាំង ហើយត្រូវបានចាត់ទុកថាជា ពាក្យស្លោកប្រមាថ។ .
លោក Macron បាននិយាយថា៖ «យើងត្រូវប្រាប់ [អ្នកមិនទាន់ចាក់វ៉ាក់សាំង] ... អ្នកឯងនឹងមិនអាចទៅភោជនីយដ្ឋានបានទៀតទេ អ្នកឯងនឹងមិនអាចទៅញ៉ាំកាហ្វេបានទៀតទេ អ្នកឯងក៏មិនអាចទៅរោងកុនបានទៀតដែរ។ យើងនឹងបន្តធ្វើរឿងនេះរហូតដល់ទីបញ្ចប់។ នេះជាយុទ្ធសាស្ត្រយើង»។
លោកបានពន្យល់ថា លោកមិនអាចបង្ខំប្រជាជនបារាំងឱ្យចាក់វ៉ាក់សាំង ឬ ចាប់ពួកទាំងនេះដាក់ក្នុង ពន្ធនាគារ ឬពិន័យនោះទេ ប៉ុន្តែលោកនឹងធ្វើឱ្យពួកគេរស់នៅទាំងលំបាកវេទនា ដោយគ្មានវ៉ាក់សាំង។
យ៉ាងណាមិញនៅក្នុងសភា គណបក្សប្រឆាំងបានរិះគន់ការជ្រើសរើសភាសារបស់លោក Macron ថា មិនស័ក្តិសមសម្រាប់ប្រធានាធិបតី និងព្រួយបារម្ភចំពោះការបោះឆ្នោតតាមរយៈច្បាប់ថ្មី។
លោក Christian Jacob ប្រធានគណបក្សប្រឆាំង គណបក្សស្តាំនិយម Les Républicains បានប្រាប់សភាថា៖ «ប្រធានាធិបតីម្នាក់ មិនអាចនិយាយរឿងបែបនេះបានទេ… ខ្ញុំពេញចិត្តនឹងការចាក់វ៉ាក់សាំង ប៉ុន្តែខ្ញុំមិនអាចគាំទ្រអត្ថបទ ដែលមានគោលបំណងដាក់ប្រជាជនបារាំងនៅក្នុងលាមកនោះទេ»។
លោក Damien Abad មកពីគណបក្សតែ១ បានរិះគន់អ្វី ដែលគាត់ហៅថាមិនស័ក្តិសម មិនទទួលខុសត្រូវ និងសុន្ទរកថា ដែលបានគិតទុកជាមុនដែលបង្ហាញពី "ការមើលងាយ ដោយចរិតកូនក្មេង"។
គួរបញ្ជាក់ផងដែរថា ប្រជាជនបារាំងជិត ៩២ ភាគរយ ដែលមានអាយុចាប់ពី ១២ ឆ្នាំឡើងទៅ ឥឡូវនេះបានទទួលថ្នាំយ៉ាងហោចណាស់ ២ ដង ដែលជាលទ្ធផល ដែលមិននឹកស្មានដល់នៅក្នុងប្រទេស ដែលធ្លាប់តែសង្ស័យប្រសិទ្ធភាពវ៉ាក់សាំងច្រើនបំផុតកាលពី ១ ឆ្នាំមុន។ នេះបើយោងតាមការស្ទង់មតិ។
យ៉ាងណាមិញ ជនជាតិបារាំងប្រហែល ៥ លាននាក់ រួមទាំងមនុស្សពេញវ័យ ៤ លាននាក់ មិនទាន់បានទទួលវ៉ាក់សាំងសូម្បីតែ ១ ដូសនៅឡើយ ខណៈវ៉ារ៉្យង់អូមីក្រុង កំពុងរីករាលដាលខ្លាំងពាសពេញតំបន់៕