.jpg)
ជប៉ុន និងកូរ៉េខាងត្បូងថ្កោលទោសការសាកល្បងមីស៊ីលកូរ៉េខាងជើងជាលើកទី២ ក្នុងរយៈពេលមិនដល់ ១ សប្ដាហ៍។ រូបថត AFP
កាលពីថ្ងៃអង្គារ ទី ១១ មករា កូរ៉េខាងជើងហាក់ដូចជាបានធ្វើការបាញ់សាកល្បងមីស៊ីលជាលើកទី២ ក្នុងរយៈពេលមិនដល់ ១ សប្ដាហ៍ ធ្វើឱ្យមានការថ្កោលទោសពីកូរ៉េខាងត្បូង និងជប៉ុន ដែលបាននិយាយថា ការបាញ់សាកល្បងម្ដងហើយម្ដងទៀតនឹងប្រថុយបង្កអស្ថិរភាពក្នុងតំបន់។
គណៈសេនាធិការចម្រុះកូរ៉េខាងត្បូង (JCS) បាននិយាយក្នុងសេចក្ដីថ្លែងការណ៍មួយថា ការបាញ់សាកល្បងត្រូវបានប្រព័ន្ធតាមដានរកឃើញនៅម៉ោង ៧:២៧ ព្រឹក ដែលបានហោះចេញពីផ្ទៃក្នុងនៃកូរ៉េខាងជើងទៅកាន់សមុទ្រនៅខាងកើតប្រទេស។
ក្រុមប្រឹក្សាសន្តិសុខជាតិរបស់កូរ៉េខាងត្បូង បានរៀបចំកិច្ចប្រជុំបន្ទាន់ ហើយបានជំរុញកូរ៉េខាងជើងឱ្យ «ឆ្លើយតបយ៉ាងឆាប់រហ័សចំពោះការរំពឹងទុករបស់សហគមន៍អន្តរជាតិសម្រាប់សន្តិភាព និងស្ថិរភាពនៅលើឧបទ្វីបកូរ៉េ ហើយយល់ព្រមបន្តកិច្ចសន្ទនា និងកិច្ចសហប្រតិបត្តិការឡើងវិញ»។
ការសាកល្បងនេះ បានកើតឡើងបន្ទាប់ពីកូរ៉េខាងជើង បានអះអាងថា ខ្លួនបានសាកល្បងមីស៊ីលល្បឿនលឿនជាងសំឡេងកាលពីថ្ងៃពុធ សប្ដាហ៍មុន បន្ទាប់ពីមេដឹកនាំកូរ៉េខាងជើងលោកគីម ជុងអ៊ុន បានប្ដេជ្ញាធ្វើការពង្រឹងសមត្ថភាពយោធារបស់ខ្លួន ខណៈពេលដែលការចរចាជាមួយសហរដ្ឋអាមេរិក និងកូរ៉េខាងត្បូងជាប់គាំង៕
វីដេអូ៖
