សហរដ្ឋអាមេរិក និងសហភាពអឺរ៉ុបបានអនុវត្តទណ្ឌកម្មថ្មីលើមន្ត្រីនីការ៉ាហ្គា មួយចំនួនកាលពីថ្ងៃចន្ទ ត្រឹមតែប៉ុន្មានម៉ោងមុនពេលមេដឹកនាំកាន់តំណែងដ៏យូរអង្វែងរបស់ប្រទេសនេះគឺលោកDaniel Ortega បានស្បថចូលកាន់តំណែងជាប្រធានាធិបតីសម្រាប់អាណត្តិទី៥។
សហរដ្ឋអាមេរិក និងសហភាពអឺរ៉ុបបានចោទប្រកាន់លោកOrtegaរួមជាមួយភរិយា និងក៍កាន់តំណែងជាអនុប្រធានាធិបតី Rosario Murillo ពីការរំលោភសិទ្ធិមនុស្ស និងធ្វើឱ្យប៉ះពាល់ដល់លទ្ធិប្រជាធិបតេយ្យ និងនីតិរដ្ឋ។
នៅក្នុងចលនាសម្រាប់សម្របសម្រួលដែលបានរចនាឡើងដើម្បីដាក់សម្ពាធលើរបបOrtega-Murillo ដែលនៅថ្ងៃនៃការប្រារព្ធពិធីនោះ សហរដ្ឋអាមេរិក និងសហភាពអឺរ៉ុប បានបន្ថែមឈ្មោះមន្ត្រីជាន់ខ្ពស់ជាច្រើននាក់រួមទាំងរដ្ឋមន្ត្រីការពារជាតិផងដែរ ទៅក្នុងបញ្ជីបុគ្គលដែលមានទណ្ឌកម្ម។
រតនាគារសហរដ្ឋអាមេរិកបានប្រកាសដាក់ទណ្ឌកម្មថ្មីប្រឆាំងនឹងមន្ត្រីនីការ៉ាហ្គាចំនួន ៦ រូប ជុំវិញការចោទប្រកាន់ពីអំពើហិង្សារបស់រដ្ឋ ការផ្សព្វផ្សាយព័ត៌មានមិនពិត និងគោលដៅលើប្រព័ន្ធផ្សព្វផ្សាយឯករាជ្យ។ គោលដៅទាំងនោះរួមមានរដ្ឋមន្ត្រីការពារជាតិលោកRosa Adelina Barahona De Rivas និងប្រធានសេនាធិការយោធាលោកBayardo Ramon Rodriguez Ruiz ។
ដោយឡែក ក្រសួងការបរទេសសហរដ្ឋអាមេរិកបានប្រកាសថា ខ្លួនកំពុងចាត់វិធានការ ដើម្បីដាក់កម្រិតទិដ្ឋាការលើបុគ្គលចំនួន ១១៦ នាក់ រួមទាំងអភិបាលក្រុង ព្រះរាជអាជ្ញា អ្នកគ្រប់គ្រងសាកលវិទ្យាល័យ ក៏ដូចជាប៉ូលិស ពន្ធនាគារ និងមន្ត្រីយោធា។
លោក Brian E. Nelson អនុរដ្ឋលេខាធិការទទួលបន្ទុកភេរវកម្ម និងស៊ើបការណ៍ហិរញ្ញវត្ថុ បាននិយាយនៅក្នុងសេចក្តីថ្លែងការណ៍មួយថា៖«របប Ortega-Murillo បន្តការអនុលោមតាមលទ្ធិប្រជាធិបតេយ្យតាមរយៈការធ្វើឱ្យមានការបោះឆ្នោតក្លែងក្លាយ ការបំបិទមាត់ក្រុមប្រឆាំងដោយសន្តិវិធី និងការឃុំឃាំងមនុស្សរាប់រយនាក់ជាអ្នកទោសនយោបាយ" ។
ប្រភពដដែលបានបន្តថា៖ «សហរដ្ឋអាមេរិក និងដៃគូរបស់យើងកំពុងផ្ញើសារយ៉ាងច្បាស់មួយទៅកាន់ប្រធានាធិបតីOrtega អនុប្រធានាធិបតី Murillo និងរង្វង់ខាងក្នុងរបស់ពួកគេថាយើងបន្តឈរជាមួយប្រជាជននីការ៉ាហ្គាក្នុងការអំពាវនាវរបស់ពួកគេឱ្យមានការដោះលែងអ្នកទោសនយោបាយទាំងនេះជាបន្ទាន់ និងការវិលត្រឡប់ទៅកាន់លទ្ធិប្រជាធិបតេយ្យវិញ»។
ទន្ទឹមនឹងនេះ ក្រុមប្រឹក្សាអឺរ៉ុបបានបន្ថែមឈ្មោះមនុស្ស ៧ នាក់ទៀត រួមទាំងសមាជិកនៃគ្រួសាររបស់ Ortega ទៅក្នុងបញ្ជីដែលត្រូវបានដាក់ទណ្ឌកម្មផងដែរ៕