សមាជិកវេទិកាសេដ្ឋកិច្ចពិភពលោក (WEF) ត្រឹមតែ ១ ក្នុងចំណោម ១០ បាននិយាយថាពួកគេរំពឹងទុកថា ការងើបឡើងវិញនៃសេដ្ឋកិច្ចសកលលោក នឹងបង្កើនល្បឿនក្នុងរយៈពេល ៣ ឆ្នាំខាងមុខ។ នេះបើតាមការស្ទង់មតិនៃមន្ត្រីរដ្ឋាភិបាល បញ្ញវន្ត និងមេដឹកនាំអាជីវកម្មជិត ១០០០ នាក់ ដោយត្រឹមតែសមាជិក ១ ក្នុងចំណោម ៦ មានសុទិដ្ឋិនិយមអំពីទស្សនវិស័យពិភពលោក។
ការប្រែប្រួលអាកាសធាតុ ត្រូវបានគេមើលឃើញថា ជាគ្រោះថ្នាក់លេខ១ ដោយអ្នកឆ្លើយតបនៅក្នុងការស្ទង់មតិសម្រាប់របាយការណ៍ហានិភ័យប្រចាំឆ្នាំរបស់ WEF ដែលបានចេញផ្សាយកាលពីថ្ងៃអង្គារ ទី១០ មករា។ សំណឹកនៃភាពស្អិតល្មួតក្នុងសង្គម វិបត្តិជីវភាពរស់នៅ និងការចុះខ្សោយនៃសុខភាពផ្លូវចិត្តត្រូវបានកំណត់ថាជាហានិភ័យ ដែលបានកើនឡើងច្រើនបំផុតចាប់តាំងពីការចាប់ផ្ដើមនៃជំងឺរាតត្បាតកូវីដ១៩។
ការស្ទង់មតិបានបង្ហាញថា អាកាសធាតុមិនប្រក្រតីត្រូវបានចាត់ទុកថាជាហានិភ័យដ៏ធំបំផុតរបស់ពិភពលោកក្នុងរយៈពេលខ្លី និងការបរាជ័យនៃសកម្មភាពអាកាសធាតុក្នុងរយៈពេលមធ្យម និងរយៈពេលវែងពី ២ ទៅ ១០ ឆ្នាំ។
របាយការណ៍នេះ ត្រូវបានបោះពុម្ពជារៀងរាល់ឆ្នាំមុនកិច្ចប្រជុំ WEF ប្រចាំឆ្នាំនៅទីក្រុងដាវូស។ ប៉ុន្តែ នៅឆ្នាំនេះ WEF ដែលមានមូលដ្ឋាននៅទីក្រុងហ្សឺណែវ បានពន្យារពេលព្រឹត្តិការណ៍ខែមករារហូតដល់ពាក់កណ្ដាលឆ្នាំ ២០២២ ដោយសារតែការរីករាលដាលនៃវ៉ារ្យ៉ង់មេរោគអូមីក្រុង៕