កាលពីថ្ងៃ ពុធ ទី ១២ មករា សមាជិកព្រឹទ្ធសភាអាមេរិកមកពីគណបក្សប្រជាធិបតេយ្យបានបង្ហាញសេចក្ដីព្រាងច្បាប់មួយ ដើម្បីដាក់ទណ្ឌកម្មលើប្រទេសរុស្ស៊ី ប្រសិនបើពួកគេសម្រេចចិត្តឈ្លានពានប្រទេសអ៊ុយក្រែន។
សេចក្ដីព្រាងច្បាប់ស្ដីពីការការពារអធិបតេយ្យភាពអ៊ុយក្រែន ដែលស្នើឡើងដោយប្រធានគណៈកម្មាធិការទំនាក់ទំនងបរទេសនៃព្រឹទ្ធសភាអាមេរិកលោក រ៉ូប៊ឺត ម៉ានេនដេស និងសមាជិក ២៥ រូប ដទៃទៀត នឹងកំណត់កាតព្វកិច្ចឱ្យរដ្ឋាភិបាលអាមេរិកដាក់ទណ្ឌកម្មលើបុគ្គល និងនីតិបុគ្គលរុស្ស៊ី ប្រសិនបើរុស្ស៊ី បង្កើនសកម្មភាពប្រឆាំងអ៊ុយក្រែន។ សេចក្ដីព្រាងក៏នឹងកំណត់ឱ្យក្រសួងការបរទេស និងក្រសួងការពារជាតិអាមេរិកជួយពង្រឹងសមត្ថភាពយោធាអ៊ុយក្រែន និងបង្កើនជំនួយសន្តិសុខ។
ក្នុងសេចក្ដីថ្លែងការណ៍មួយលោក ម៉ានេនដេស និយាយថាវិធានការមានប្រសិទ្ធភាពបំផុតដើម្បីប្រឆាំងរុស្ស៊ី គឺ «អ៊ុយក្រែនដែលរឹងមាំ និងរួបរួមគ្នា» ហើយសង្ឃឹមថា នឹងអាចធ្វើការជាមួយគណបក្សសាធារណរដ្ឋដើម្បីជួយអ៊ុយក្រែនប្រឆាំងនឹង «អ្នកយាយីនៅក្រុងម៉ូស្គូ»។
នេះគឺជាលើកទី២ នៅសប្ដាហ៍នេះ ដែលសមាជិកសភាអាមេរិកបានស្នើសេចក្ដីព្រាងច្បាប់ប្រឆាំងនឹងរុស្សី។ កាលពីថ្ងៃចន្ទ សមាជិកសភាតំណាង ១ ក្រុមមកពីគណបក្សសាធារណរដ្ឋបានបង្ហាញសេចក្ដីព្រាងច្បាប់ការធានាស្វ័យភាពអ៊ុយក្រែន ដោយការពង្រឹងការការពារ ដែលមានលក្ខណៈស្រដៀងនឹងសេចក្ដីព្រាងច្បាប់របស់លោក ម៉ានេនដេស ដោយមានការបន្ថែមការតម្រូវឱ្យច្រានចោលការទាមទាររបស់រុស្ស៊ី ។
ការដាក់ពង្រាយទាហានរុស្ស៊ី ជិត ១០០ ០០០ នាក់ នៅតំបន់ព្រំដែនអ៊ុយក្រែនបានធ្វើឱ្យមានការព្រួយបារម្ភថាក្រុងម៉ូស្គូគឺកំពុងត្រៀមធ្វើការឈ្លានពាន។ រុស្សីបានច្រានចោលការចោទប្រកាន់នេះ និងបាននិយាយថា អ៊ុយក្រែន និងលោកខាងលិច គឺកំពុងបង្កការគំរាមកំហែងទៅដល់សន្តិសុខរបស់ខ្លួន ហើយបានធ្វើទាមទារការធានាសន្តិសុខពីលោកខាងលិច។
មន្ត្រីរុស្ស៊ី និងអាមេរិកបានជួបចរចានៅថ្ងៃចន្ទ និងថ្ងៃពុធ ដើម្បីស្វែងរកការកាត់បន្ថយភាពតានតឹង៕