.jpg)
ការរីករាលដាលនៃវ៉ារ៉្យង់អូមីក្រុង ដែលកំពុងកើនឡើង ផ្ដើមចេញពីស្ត្រីម្នាក់ ដែលមិនបានចាក់វ៉ាក់សាំង និងចម្លងផ្ទាល់ទៅមនុស្ស ៨ នាក់ដទៃទៀត និងបន្តរីករាលដាលលឿនបំផុតក្នុងរយៈពេលតិចជាង ២ សប្តាហ៍។ នេះបើតាមការឱ្យដឹងពីសារព័ត៌មាន South China Morning Post។
ការវិភាគក៏ បានបង្ហាញផងដែរថា គិតត្រឹមថ្ងៃចន្ទ ប្រហែល ១ ភាគ ៤ នៃអ្នកឆ្លងអូមីក្រុង គឺជាមនុស្សចាស់ ដែលក្នុងនោះ ៣៥,៧ ភាគរយ មិនទាន់បានចាក់វ៉ាក់សាំង ដែលករណីនេះ បានបង្កើនការព្រួយបារម្ភថា វ៉ារ៉្យង់នេះនឹងបង្កឱ្យមានការរីករាលដាលកាន់តែខ្លាំងជាងមុនទៀត។
ប៉ុន្តែអ្នកជំនាញខាងរោគរាតត្បាតបាននិយាយថា សូម្បីតែអ្នកដែលបានចាក់ថ្នាំក៏ងាយនឹងឆ្លងនឹងវ៉ារ្យ៉ង់ថ្មីដែរ ដោយសារកម្រិតអង្គបដិប្រាណ អាចធ្លាក់ចុះយ៉ាងខ្លាំងជាច្រើនខែបន្ទាប់ពីការចាក់ថ្នាំ ២ ដងដំបូង ខណៈតំបន់នេះ បានជំរុញអ្នកស្រុកឱ្យទទួលបានវ៉ាក់សាំងភ្លាមៗ។
នេះជារលកទី៥ ហើយរបស់ហុងកុង ដែលការរីករាលដាលដំបូងកើតឡើងនៅចុងខែ ធ្នូ ចេញពីសមាជិកអាកាសយានិក ២ នាក់។ ករណីឆ្លងចេញពីអ្នកបម្រើការលើយន្តហោះ Cathay Pacific ទាំង ២ នាក់ សុទ្ធតែចាក់វ៉ាក់សាំងពេញលេញ និងបានត្រឡប់មកពីសហរដ្ឋអាមេរិក បង្កឱ្យមានការរីករាលដាលដល់ប្រជាជនសរុបចំនួន ៤៦ នាក់ រួមមានស្ត្រី ៣២ នាក់ និងបុរស ១៤ នាក់ ធ្វើឱ្យឆ្លងដល់ទីតាំងចំនួន ២ គឺភោជនីយដ្ឋាន Kowloon Tong និងក្រុមរាំ Causeway Bay ផងដែរ។
ចង្កោមផ្សេងទៀត ត្រូវបានបង្កឡើង ដោយអ្នកបម្រើលើយន្តហោះបុរស ដែលញ៉ាំអាហារជាមួយគ្រួសាររបស់គាត់នៅក្នុងភោជនីយដ្ឋាន Moon Palace ក្នុងមជ្ឈមណ្ឌលផ្សារទំនើប Festival Walk អំឡុងពេលគាត់នៅដាច់ដោយឡែក។ ក្នុងចំណោមអ្នកឆ្លងក្នុងក្រុមនោះ ២៥ ភាគរយ មិនបានចាក់វ៉ាក់សាំង។
អាជ្ញាធរសុខាភិបាលបាននិយាយថា វ៉ាក់សាំងកូវីដ ១៩ មិនផ្តល់ការការពារទាំងស្រុងប្រឆាំងនឹងការឆ្លងទេ ប៉ុន្តែ ពួកគេបានកាត់បន្ថយភាពធ្ងន់ធ្ងរនៃជំងឺ និងលទ្ធភាពនៃការស្លាប់យ៉ាងច្រើន។
មន្ត្រី ក៏បានសង្កត់ធ្ងន់ម្តង ហើយម្តងទៀត អំពីសារៈសំខាន់នៃការចាក់ថ្នាំបង្ការ ដោយចង្អុលទៅម្តាយរបស់អ្នកបម្រើលើយន្តហោះ មិនបានទទួលការចាក់វ៉ាក់សាំងទេ ដូច្នេះហើយផ្ទុកមេរោគខ្ពស់ ដែលទំនងជានាំទៅរកការរីករាលដាល។
ទីប្រឹក្សាជំងឺរាតត្បាតរបស់រដ្ឋាភិបាលសាស្រ្តាចារ្យ David Hui Shu-cheong នៃសាកលវិទ្យាល័យចិន បាននិយាយថា ការរីករាលដាលឆ្លងចំពោះអ្នកចាក់វ៉ាក់សាំងរួច មានកម្រិតខ្ពស់ ដោយសារតែកម្រិតអង្គបដិប្រាណរបស់ពួកគេបានធ្លាក់ចុះតាមពេលវេលា តួយ៉ាងអ្នកទទួលវ៉ាក់សាំង BioNTech ចំនួន ២ ដូស កាលពីខែមេសា និងឧសភាឆ្នាំមុន។
លោកបាននិយាយថា វិសាលភាពនៃការឆ្លងក៏ត្រូវបានកំណត់ ដោយកត្តាខាងក្រៅផងដែរ ដូចជារបៀប ដែលការតាមដានទំនាក់ទំនងរវាងអ្នកឆ្លង ក្នុងការកំណត់អត្តសញ្ញាណទំនាក់ទំនងជិតស្និទ្ធ និងរយៈពេលភ្ញាស់ខ្លីរបស់អូមីក្រុង ដែលបង្កើនល្បឿននៃការឆ្លងសហគមន៍។
គាត់បាននិយាយថា៖ «ការសន្និដ្ឋានតែមួយគត់គឺថា អ្នកដែលមិនបានទទួលវ៉ាក់សាំង គឺជាបុគ្គលដែលត្រូវប្រឈមនឹងការឆ្លងមេរោគខ្ពស់។ នោះហើយជាមូលហេតុ ដែលយើងត្រូវតែជំរុញមនុស្សឱ្យទទួលបានការចាក់វ៉ាក់សាំងដូសទី៣»។
ទន្ទឹមនឹងនេះដែរ ប្រមាណ ២៦,៤ ភាគរយនៃករណីក្នុងស្រុកនៅក្នុងរលកទី៥ មានអាយុចាប់ពី ៦០ ឆ្នាំឡើងទៅ ដោយក្នុងនោះមានជំងឺម្នាក់មានអាយុលើសពី ៨០ ឆ្នាំ។
វេជ្ជបណ្ឌិត Leung Chi-chiu អ្នកជំនាញផ្នែកវេជ្ជសាស្ត្រផ្លូវដង្ហើម បាននិយាយថា អ្នកជំងឺភាគច្រើន គឺជាមនុស្សវ័យកណ្តាល ឬ ចាស់ជាង ដែលឆ្លងតាមរយៈ ការរាំក្នុងសួនសាធារណៈ គឺជាសកម្មភាពទូទៅសម្រាប់មនុស្សជំនាន់មុន និងការកើនឡើងនូវលទ្ធភាពនៃការវិវត្តនៃរោគសញ្ញារបស់មនុស្សចាស់ ដែលធ្វើឱ្យវា ងាយស្រួលក្នុងការកំណត់អត្តសញ្ញាណពួកគេថាជាករណីកូវីដ។
លោក Hui បានកត់សម្គាល់ថា វាចៀសសមិនរួចទេចំពោះករណីស្លាប់ ដែលបណ្ដាលមកពីអូមីក្រុង ហើយវានឹងកើនឡើងស្របតាមការកើនឡើងនៃករណីដែរ ប៉ុន្តែលោកបានបន្ថែមថា ជាសំណាងល្អវ៉ារ្យ៉ង់ អូមីក្រុង គឺស្រាលជាងវ៉ារ្យ៉ង់ដែលតា ហើយហានិភ័យនៃការវិវត្តទៅជាជំងឺធ្ងន់ធ្ងរ គឺមិនខ្ពស់នោះទេ។
ទោះយ៉ាងណា ទីក្រុងនេះ បានបង្កើនកិច្ចខិតខំប្រឹងប្រែងរបស់ខ្លួនក្នុងការចាក់វ៉ាក់សាំងដល់អ្នកចាស់ៗ។ នៅក្នុងសន្និសីទសារព័ត៌មានកាលពីថ្ងៃអង្គារ នាយកប្រតិបត្តិលោកស្រី Carrie Lam Cheng Yuet-ngor បានប្រកាសថា ចំនួនមជ្ឈមណ្ឌលថែទាំសុខភាពរបស់រដ្ឋាភិបាលសម្រាប់មនុស្សចាស់ ដែលចែកចាយវ៉ាក់សាំង នឹងកើនឡើងពី ៥ ដងដល់ ១៥ កន្លែង ដែលជួយជំរុញ ដល់ការចែកចាយវ៉ាក់សាំងប្រមាណ ២ ០០០ ដូសបន្ថែមទៀតជារៀងរាល់ថ្ងៃ។
លោកស្រី Lam បានបន្ថែមថា លោកស្រីរំពឹងថា អត្រានៃការចាក់វ៉ាក់សាំងទាំងមូលរបស់ទីក្រុងនឹងឈានដល់ ៩០ ភាគរយក្នុងពេលឆាប់ៗនេះ ប្រសិនបើការជំរុញការចាក់វ៉ាក់សាំងនៅតែបន្តក្នុងល្បឿនបច្ចុប្បន្នរបស់វា៕
វីដេអូ៖
