សហរដ្ឋអាមេរិកបានចោទប្រកាន់រុស្ស៊ីថា កំពុងរៀបចំផែនការធ្វើប្រតិបត្តិសម្ងាត់ដើម្បីបង្កើត«លេសសម្រាប់ការឈ្លានពាន» តំបន់ខាងកើតរបស់ប្រទេសអ៊ុយក្រែន បន្ទាប់ពីកិច្ចខិតខំប្រឹងប្រែងការទូតដើម្បីកាត់បន្ថយភាពតានតឹងបានជាប់គាំង។
អ្នកនាំពាក្យសេតវិមានលោកស្រីជេន ផ្សាគី បានអះអាងថា រដ្ឋាភិបាលអាមេរិក បានទទួលដំណឹងថារុស្ស៊ី បានដាក់ពង្រាយក្រុមទាហានប្រតិបត្តិការពិសេសទៅកាន់តំបន់ភាគខាងកើតនៃប្រទេសអ៊ុយក្រែន ដើម្បីធ្វើការវាយប្រហារលើកងកម្លាំងគាំទ្រដោយខ្លួន ហើយចោទប្រកាន់ថា អ៊ុយក្រែន គឺនៅពីក្រោយការវាយប្រហារនោះ ដែលការចោទប្រកាន់នេះនឹងក្លាយជា «លេសសម្រាប់ការឈ្លានពាន»។
អ្នកនាំពាក្យវិមានក្រឹមឡាំងលោកឌីមីទ្រី ប៉េស្កូវ បានបដិសេធថា ក្រុងម៉ូស្គូពុំមានផែនការដើម្បីបង្កើតលេសធ្វើការឈ្លានពានតំបន់ភាគខាងលិចនៃប្រទេសអ៊ុយក្រែនទេ ហើយនិយាយថាទីភ្នាក់ងារសារព័ត៌មានលោកខាងលិចបានធ្វើការរាយការណ៍ដោយផ្អែកលើព័ត៌មាន «មិនមានមូលដ្ឋាន»។
ការអះអាងរបស់អាមេរិក និងការវាយប្រហារតាមអ៊ីនធឺណិតថ្មីៗនេះទៅលើរដ្ឋាភិបាលអ៊ុយក្រែន បានកើតឡើងបន្ទាប់រុស្ស៊ី បានធ្វើការចរចាជាមួយនឹងសហរដ្ឋអាមេរិក និងអង្គការណាតូ ដើម្បីកាត់បន្ថយភាពតានតឹង។ ប៉ុន្តែការចរចានេះមានលក្ខណៈជាប់គាំង និងមិនបានសម្រេចអ្វីនោះទេ ហើយមន្ត្រីជាន់ខ្ពស់រុស្ស៊ី បាននិយាយថា ការចរចានេះគឺជា «ផ្លូវទាល់»៕