ប្រទេសអ៊ុយក្រែនសង្ស័យថាក្រុមពាក់ព័ន្ធនឹងទីភ្នាក់ងារចារកម្មបេឡារុសនៅពីក្រោយការវាយប្រហារតាមអ៊ីនធឺណិតទៅលើគេហទំព័ររដ្ឋាភិបាលមួយចំនួន ដោយប្រើប្រាស់មេរោគកុំព្យូទ័រផ្ដល់ឱ្យនិងបង្កើតដោយក្រុមពាក់ព័ន្ធនឹងទីភ្នាក់ងារចារកម្មរុស្ស៊ី។ នេះបើតាមការលើកឡើងរបស់មន្ត្រីសន្តិសុខអ៊ុយក្រែន១ រូប។
លោកសឺហ៊ី ដេមេឌីក អនុលេខាធិការក្រុមប្រឹក្សាសន្តិសុខ និងការពារជាតិរបស់អ៊ុយក្រែន បានប្រាប់សារព័ត៌មានរ៉យទ័រ ថាក្រុមដែលមានឈ្មោះថា UNC1151 គឺត្រូវបានគេសង្ស័យថានៅពីក្រោយការវាយប្រហារកាលពីថ្ងៃសុក្រ ដែលលោកនិយាយថា ជាការបិទបាំងសម្រាប់សកម្មភាពបំផ្លិចបំផ្លាញបន្ថែមទៀតនៅពីក្រោយឆាក។
កាលពីថ្ងៃសុក្រ គេហទំព័ររដ្ឋាភិបាលអ៊ុយក្រែនមួយចំនួនបានរងការវាយប្រហារ ហើយបានចាប់ផ្ដើមបង្ហាញសារក្នុងភាសារុស្ស៊ី អ៊ុយក្រែន និងប៉ូឡូញ ដែលបានលើកឡើងថា ទិន្នន័យផ្ទាល់ខ្លួនរបស់ជនជាតិអ៊ុយក្រែនគឺត្រូវបានបង្ហាញជាសាធារណៈ ហើយពួកគេគួរតែ «ខ្លាច និងរំពឹងរឿងអាក្រក់បំផុត»។
លោកដេមេឌីក ដែលជាអតីតប្រធាននាយកដ្ឋានប៉ូលិសបច្ចេកវិទ្យានៃកងកម្លាំងប៉ូលិសជាតិអ៊ុយក្រែន បាននិយាយថាក្រុម UNC1151 គឺមានពាក់ព័ន្ធនឹងរដ្ឋាភិបាលបេឡារុស ហើយមានប្រវត្តិសាស្ត្រលីទុយអានី ឡេតូនី ប៉ូឡូញ និងអ៊ុយក្រែន។ លោកនិយាយថា មេរោគកុំព្យូទ័រដែលត្រូវបានប្រើប្រាស់ក្នុងការវាយប្រហារនេះ គឺមានលក្ខណៈស្រដៀងនឹងមេរោគប្រើប្រាស់ដោយក្រុមរុស្ស៊ីក្នុងការវាយប្រហារលើគណបក្សប្រជាធិបតេយ្យរបស់អាមេរិកកាលពីឆ្នាំ ២០១៦។
បេឡារុស និងរុស្ស៊ី នៅមិនទាន់បានធ្វើការអត្ថាធិប្បាយលើការលើកឡើងរបស់លោកដេមេឌីកទេ ប៉ុន្តែកាលពីមុនៗបានច្រានចោលការពាក់ព័ន្ធនឹងការវាយប្រហារតាមអ៊ីនធឺណិត ដែលរួមទាំងការវាយប្រហារទៅលើអ៊ុយក្រែន៕