The Phnom Penh Post Search

Search form




Logo of Phnom Penh Post newspaper Phnom Penh Post - HRW​ រិះគន់​ប៉ា​គី​ស្ថាន​ ​ជុំវិញ​ការបង្ក្រាប​ក្រុ​ម​ប្រ​ឆាំង​ និង​រំលោភសិទ្ធិ​មនុស្ស​

HRW​ រិះគន់​ប៉ា​គី​ស្ថាន​ ​ជុំវិញ​ការបង្ក្រាប​ក្រុ​ម​ប្រ​ឆាំង​ និង​រំលោភសិទ្ធិ​មនុស្ស​

Content image - Phnom Penh Post
លោកនាយករ​ដ្ឋមន្ត្រី អុីមរ៉ា​ន ខាន់ ចូលរួម​ជំនួប​នៃ​អង្គការ​កិច្ច​សហប្រតិបត្តិការ​អ៊ិស្លាម​។ AFP

HRW​ រិះគន់​ប៉ា​គី​ស្ថាន​ ​ជុំវិញ​ការបង្ក្រាប​ក្រុ​ម​ប្រ​ឆាំង​ និង​រំលោភសិទ្ធិ​មនុស្ស​

​នៅក្នុង​របាយការណ៍​ថ្មី​មួយ អង្គការសិទ្ធិមនុស្ស​អន្តរជាតិ ​(HRW)​ បាន​រិះគន់​ ​រដ្ឋាភិបាល​ប៉ា​គី​ស្ថាន ​ជុំវិញ​ការបន្ត​បង្ក្រាប​ទៅលើ​ការប្រឆាំង​របស់​ពលរ​ដ្ឋ អ្នក​កាសែត និង​អ្នកនយោបាយ​ប្រឆាំង​។

HRW ដែលមាន​មូលដ្ឋាន​ម​នៅ​អា​មេ​​រិ​កបាន​បញ្ចេញ​របាយការណ៍​ពិភពលោក ប្រចាំឆ្នាំ​របស់ខ្លួន​ «World Report 2022» កាលពី​ថ្ងៃទី​ព្រហស្បតិ៍​កន្លងទៅនេះ ដោយមាន​ជំពូក​ស្តីពី​ប៉ា​គី​ស្ថាន​ដែល​បាន​ផ្តោតទៅលើ​សេរី​បញ្ចេញ មតិយោបល់ សាសនា និង​សិទ្ធិ​ស្ត្រី និង​ការរំលោភបំពាន​ដោយ​ប៉ូលិស និងកងកម្លាំង​សន្តិសុខ​ប៉ា​គី​ស្ថាន​។​

​ជំពូក​ស្តីពី​ប៉ា​គី​ស្ថាន​នោះ បានឱ្យដឹងថា​៖ «​អាជ្ញាធរ​បន្ត​ការប្រើ​ច្បាប់​ប្រឆាំង​ភេរវកម្ម ​ដើម្បី​បង្ក្រាប​ការប្រឆាំង​ក្រុម​សង្គម ស៊ីវិល​ត្រូវបាន​គេ​រឹតត្បិត​យ៉ាង​តឹងរ៉ឹង ក្រុម​រិះគន់​សកម្មភាព​រដ្ឋាភិបាល​»​។

​អា​ជាធរ ក៏បាន​បង្ក្រាប​ទៅលើ​សមាជិក​និង​អ្នកគាំទ្រ​បក្ស​ន​យោ​បា​យា​ប្រឆាំង​។

​ក្រសួងការបរទេស​ប៉ា​គី​ស្ថាន មិនបាន​ឆ្លើយ​តម​របាយការណ៍​នេះ​ទេ​។

​រដ្ឋាភិបាល​របស់លោក​នាយករដ្ឋមន្ត្រី អ៊ី​ម​រ៉ា​ន ខាន់ ត្រូវ​រង​ការរិះគន់​ពី​ក្រុម​សិទ្ធិមនុស្ស​នៅក្នុង ​និង​ក្រៅប្រទេស ​ចាប់តាំងពីលោក​បាន​ឡើងកាន់​អំណាច​នៅក្នុង​ឆ្នាំ ​២០១៨ ដែល​លទ្ធផល​បោះ​​ឆ្នោត​ទូទៅ​ត្រូវបាន​គេ​តវ៉ា​ប្រឆាំង​ថា មានកា​រលួយ​បន្លំ​។

​ចាប់តាំងពី​ឡើងកាន់​អំណាចរដ្ឋា​ភិ​បាលច​ម្រុះ​ដឹកនាំ​ដោយ​បក្ស​ Tehreek-e-Insaf​ ប៉ា​គី​ស្ថានបាន​រង​ការរង​ការ​​រិះគន់​ ជុំវិញ​អំពើពុករលួយ​។

​ស្របពេល​ជាមួយគ្នានេះ អ្នកកាសែតប៉ា​គី​ស្ថាន និង​អង្គការ​ព័ត៌មាន បាន​រាយការណ៍​ថា ត្រូវ​ស្ថិតនៅ​ការគ្រប់គ្រង​តឹងរ៉ឹង​ជាង​មុន​ពី​រដ្ឋាភិបាល និង​យោធា​ដ៏​មាន​ឥទ្ធិពល​របស់​ប្រទេស​នេះ ដែល​បាន​គ្រប់គ្រង​ប៉ា​គី​ស្ថាន​ជិត​ពាក់កណ្តាល​នៃ​ប្រវត្តិសាស្ត្រ ​៧៤ ​ឆ្នាំ​របស់ខ្លួន​។

​ក្រុម​អ្នកសារព័ត៌មាន​ដែល​រិះគន់​រដ្ឋាភិបាល​នេះ​ត្រូវបាន​ចាប់ពង្រត់ វាយប្រហារ បាញ់ ឬត្រូវបាន​គេ​ចោទ​ប្រកាន់​ពីបទ​ក្បត់ជាតិ និង​អំពើ​ឧក្រិដ្ឋ​ដទៃទៀត នៅក្រោម​រដ្ឋាភិបាល​រប​ស់លោក​ខាន់​។

​របាយការណ៍​របស់​ HRW​ កាលពី​ថ្ងៃព្រហស្បតិ៍​ កត់សម្គាល់​ពី​បរិយាកាស​នៃ​ការភ័យខ្លាច​នៅក្នុង​ចំណោម​អ្នកកាសែត​នៅពេល​តាម​យក​ព័ត៌មាន​ការរំលោភ​សិទ្ធិ​មនុស្ស​របស់​រដ្ឋាភិបាល​។

​របាយការណ៍​នោះ និយាយថា​៖ «​អង្គ​ការ​ក្រៅ​រដ្ឋាភិបាល​ (NGOs) បាន​រាយ​ការណ៍​អំពី​ការ​បំភិត​បំ​ណ័​យ ការធ្វើ​បាប និង​ការ​ស៊ើប​យកការណ៍​ពី​អាជ្ញាធរ​រដ្ឋាភិបាល​។

«​រដ្ឋាភិបាលបាន​ប្រើ​បញ្ញត្តិ​នៃ​ NGOs នៅក្នុង​គោលនយោបាយ​របស់​ប៉ា​គី​ស្ថាន​ដើម្បី​រារាំង​ការចុះឈ្មោះ និង​ដំណើរការ​នៃ​ជំនួយ​មនុស្សធម៌​អន្តរជាតិ និង​ក្រុម​សិទ្ធិមនុស្ស​»​។

​របាយការណ៍​របស់ ​HRW ក៏បានផ្តោតទៅលើ​បញ្ហា​ផ្សេងៗ​ដែល​ទាក់ទង​ទៅនឹង​សេរីភាព​ជំនឿ និង​សាសនា​នៅក្នុង​ប្រទេស​ប៉ា​គី​ស្ថាន​ ជាទី​ដែល​ច្បាប់​ប្រមាថ​ព្រះ ត្រូវបាន​គេ​ប្រើប្រាស់​កាន់​​តែ​ខ្លាំង​ឡើង​ប្រឆាំងនឹង​ជនជាតិ​ភាគ​តិច និង​សមាជិក​នៃ​មូស្លីម​ភាគច្រើន​។​

​កាលពី​ឆ្នាំទៅ មនុស្ស​យ៉ាងតិច​ ៣​ នាក់ ត្រូវបាន​គេ​សម្លាប់ ទាក់ទង​ជាមួយ​ការ​​ចោទប្រកាន់​ការជេរប្រមាថ​ព្រះ​ក្នុងនោះ មាន​អ្នកគ្រប់គ្រង​រោងចក្រ​ស្រីលង្កា​នៅ​ទីក្រុង ​Sialkot ​ភាគ​ខាងកើត​ ដែល​ត្រូវបាន​វាយ​រហូតដល់​ស្លាប់ ដោយ​ហ្វូងមនុស្ស​នៅ​ខែធ្នូ ឆ្នាំ ​២០២១​។​

ចាប់តាំងពី​ឆ្នាំ​ ១៩៩០ ​មក មនុស្ស​យ៉ាងតិច​ ៨០ ​នាក់ ត្រូវបាន​គេ​សម្លាប់​ទាក់​​ទង​នឹង​ការចោទប្រកាន់​ប្រមាថ​ព្រះ​នៅក្នុង​ប្រទេស​ប៉ា​គី​ស្ថាន​។ នេះ​បើ​យោងតាម​ការឱ្យ​ដឹង​ពីសា​រ​ព័ត៌មាន​AlJazeera​។

HRW ក៏បាន​រៀបចំ​ឯកសារ​អំពី​ការចោទប្រកាន់​អំពី​ការរំលោភ​សិទ្ធិ​ប្រឆាំង​ស្ត្រី​និង​កុមារ​នៅក្នុង​ប្រទេស​អាស៊ី​ខាង​​ត្បូង​នេះ ដែល​ជាប់​ចំណាត់​ ១៦៧ ​ក្នុងចំណោម​ប្រទេស​ចំនួន ​១៧០ ​នៅលើ​ស្ថិតិ​ស្ត្រី​សកល សន្តិភាព និង​សន្តិសុខ​របស់​សាកលវិទ្យាល័យ Georgetown University​។​

​របាយការណ៍​របស់ HRW​ បានឱ្យដឹងថា​៖ «​អំពើហិង្សា​ប្រឆាំង​ស្ត្រី និង​ស្ត្រី​ក្នុងនោះ​មានការ​ចាប់រំលោភ ឃាតកម្ម​ការវាយប្រហា​រ អំពើហិង្សា​ក្នុង​គ្រួសារ និង​ការ​រៀបការ​ដោយ​បង្ខំ គឺ​កើតមាន​ទូទាំងប្រទេស​ប៉ា​គី​ស្ថាន​។ ក្រុម​អ្នកការពារ​សិទ្ធិមនុស្ស​បាន​ប៉ាន់ប្រមាណ​ថា ស្ត្រី​ប្រហែល ១ ០០០ ​នាក់​ ត្រូវបាន​គេ​សម្លាប់​ជា​រៀងរាល់ឆ្នាំ​៕

អត្ថបទគួរចាប់អារម្មណ៍