.jpg)
ក្រុមហ៊ុននានា កំពុងត្រៀមខ្លួនបណ្ដើរៗសម្រាប់ការរំខានដល់ខ្សែចង្វាក់ផ្គត់ផ្គង់ ដែលអាចនឹងធ្លាក់ចុះ ខណៈប្រទេសចិន ដែលជាប្រទេសផ្គត់ផ្គង់ផលិតកម្មប្រហែល ១ ភាគ ៣ នៃផលិតកម្មសកល ចាប់ផ្ដើមបិទខ្ទប់ប្រទេសទ្រង់ទ្រាយធំ ដើម្បីទប់ស្កាត់អូមីក្រុង។ នេះបើតាមការឱ្យដឹងពីសារព័ត៌មាន the New York Times។
វិធានការថ្មីនេះ បានបង្ខាំងមនុស្សរាប់សិបលាននាក់ឱ្យនៅផ្ទះ និងបានរួមចំណែកដល់ការផ្អាកការតភ្ជាប់ជើងហោះហើរឆ្លងកាត់ហុងកុងពីពិភពលោកជាច្រើនសម្រាប់ខែបន្ទាប់។ មនុស្សយ៉ាងហោចណាស់ ២០ លាននាក់ ឬ ប្រហែល ១,៥ ភាគរយនៃចំនួនប្រជាជនចិន កំពុងជាប់គាំង ដែលភាគច្រើននៅក្នុងទីក្រុងស៊ីអាន ភាគខាងលិចប្រទេសចិន និងនៅក្នុងខេត្តហឺណាន ភាគខាងជើងភាគកណ្តាលប្រទេសចិន។
គោលនយោបាយហ្សេរ៉ូកូវីដរបស់ប្រទេសនេះ បានធ្វើឱ្យក្រុមហ៊ុនផលិតនានាមរមាញឹកក្នុងការស្វែងរកវិធី ដើម្បីដោះស្រាយវិបត្តិខ្សែចង្វាក់ផ្គត់ផ្គង់អស់រយៈពេល ២ ឆ្នាំចុងក្រោយនេះ ដើម្បីចៀសផុតពីការបិទសកម្មភាពនៅរោងចក្រ និងកំពង់ផែចិន។
ការរំខានខ្សែចង្វាក់ផ្គត់ផ្គង់សកល នឹងកាន់តែអាក្រក់ជាងមុន ជាពិសេសសម្រាប់ក្រុមហ៊ុន ដែលប្រឈមនឹងបញ្ហានៃការកើនឡើងតម្លៃសម្រាប់វត្ថុធាតុដើម និងការដឹកជញ្ជូន និងភាពរអាក់រអួលសម្រាប់ការដឹកជញ្ជូនបន្ថែម និងកង្វះបុគ្គលិក។
ប្រទេសចិន បានដាក់វិធានការបិទខ្ទប់ស្ទើរពាសពេញប្រទេស តាមដានទំនាក់ទំនង និងការដាក់ឱ្យនៅដាច់ពីគេ ដើម្បីបញ្ឈប់ការរីករាលដាលនៃមេរោគឆ្លងកាលពីជិត ២ ឆ្នាំមុន បន្ទាប់ពីការលេចឡើងដំបូងរបស់វានៅទីក្រុងវូហាន។ យុទ្ធសាស្ត្រទាំងនេះ មានប្រសិទ្ធភាពខ្ពស់ ប៉ុន្តែការបញ្ជូនដ៏ខ្លាំងនៃវ៉ារ្យ៉ង់អូមីក្រុង ធ្វើឱ្យមានការសាកល្បងដ៏ធំបំផុតនៃប្រព័ន្ធរបស់ប្រទេសចិន។
រហូតមកដល់ពេលមកនេះ ឥទ្ធិពលនៃការបិទខ្ទប់ទៅលើការផលិត និងការដឹកជញ្ជូនរបស់រោងចក្រចិន ត្រូវបានកាត់បន្ថយជាងមុន។ ទីក្រុងកំពង់ផែធំជាងគេចំនួន ៤ របស់ប្រទេសចិន ដូចជា ស៊ាងហៃ ដាលៀន ធានជីន និង សិនជិន បានដាក់គោលដៅបិទជិត ដើម្បីព្យាយាមគ្រប់គ្រងការផ្ទុះឡើងតិចតួចនៃវ៉ារ្យ៉ង់អូមីក្រុង។
គិតត្រឹមចុងសប្តាហ៍នេះ ទីក្រុងទាំងនេះ មិនបានបិទច្រកចូលចតរបស់ពួកគេទេ ប៉ុន្តែ ក្រុមហ៊ុន Volkswagen និង Toyota បានប្រកាសកាលពីសប្តាហ៍មុនថាពួកគេនឹងផ្អាកប្រតិបត្តិការជាបណ្តោះអាសន្ននៅក្នុងទីក្រុងធានជីន ដោយសារតែការចាក់សោ។
អ្នកវិភាគ បានព្រមានថា ឧស្សាហកម្មជាច្រើន អាចប្រឈមនឹងការរំខានដល់លំហូរទំនិញ នៅពេល ដែលប្រទេសចិន ព្យាយាមលុបបំបាត់ការឆ្លងមេរោគណាមួយនៅមុនព្រឹត្តិការណ៍កីឡាអូឡាំពិករដូវរងារ ដែលនឹងធ្វើឡើងនៅទីក្រុងប៉េកាំងនៅខែក្រោយ។ កាលពីថ្ងៃ សៅរ៍ មន្ត្រីប៉េកាំង បានរាយការណ៍ករណីដំបូងនៃទីក្រុង វ៉ារ្យ៉ង់អូមីក្រុង ដោយជំរុញឱ្យអាជ្ញាធរបិទបរិវេណលំនៅដ្ឋាន និងកន្លែងធ្វើការរបស់អ្នកឆ្លងមេរោគទាំងអស់។
ប្រសិនបើ ការបិទខ្ទប់កាន់តែរីករាលដាលធំទូលាយជាងនេះ វាអាចនឹងជះឥទ្ធិពលដល់ខ្សែចង្វាក់ផ្គត់ផ្គង់ អាចធ្វើឱ្យប៉ះពាល់ដល់សហរដ្ឋអាមេរិកថែមទៀតផង។ ការរអាក់រអួលថ្មីសំខាន់ៗ អាចបង្អាក់ទំនុកចិត្តរបស់អ្នកប្រើប្រាស់ និងធ្វើឱ្យអតិផរណាកាន់តែធ្ងន់ធ្ងរឡើង។
លោក Craig Allen ប្រធានក្រុមប្រឹក្សាធុរកិច្ចអាមេរិក-ចិន បាននិយាយថា៖ «តើជនជាតិចិន អាចគ្រប់គ្រងវាបាន ឬ អត់? ខ្ញុំគិតថាជាសំណួរដ៏សំខាន់មួយ។ ប្រសិនបើ ពួកគេនឹងត្រូវចាប់ផ្តើមបិទទីក្រុងកំពង់ផែ វាកាន់តែធ្វើឱ្យមានការរំខានដល់ខ្សែចង្វាក់ផ្គត់ផ្គង់បន្ថែមទៀត»។
លទ្ធផលនៃការបិទរោងចក្រ កំពង់ផែ និងឃ្លាំងនានា ជាបណ្ដោះអាសន្ននៅជុំវិញពិភពលោក និងកំណើនតម្រូវការអតិថិជនអាមេរិក សម្រាប់ទំនិញបរទេស បានធ្វើឱ្យប្រព័ន្ធចែកចាយទូទាំងពិភពលោកដាច់ចង្វាក់។ ការចំណាយលើការដឹកជញ្ជូន បានកើនឡើងខ្ពស់ ខណៈកំពង់ផែ និងឃ្លាំងស្ទុកទំនិញ ជួបប្រទះ នឹងវិបត្តិនៃប្រមូលផ្តុំផលិតផល ដែលត្រូវស្ទះនៅផែ រង់ចាំការដឹកជញ្ជូនទៅប្រទេសផ្សេងៗ។
ការរីករាលដាលនៃវ៉ារ្យ៉ង់អូមីក្រុង កំពុងធ្វើឱ្យមានក្តីសង្ឃឹម សម្រាប់ការងើបឡើងវិញយ៉ាងឆាប់រហ័ស ដោយសារវ៉ារ្យ៉ង់នេះ មានកម្រិតស្រាល បើទោះជាមានការរីករាលដាលខ្លាំង និងលឿនយ៉ាងណាក៏ដោយ ដោយការងើបឡើងវិញនេះ មិនត្រឹមតែកើតឡើងនៅសហរដ្ឋអាមេរិក ដែលជាប្រទេសពឹងផ្អែកលើទំនិញចិនប៉ុណ្ណោះទេ ប៉ុន្តែក៏នឹងជួយសម្រួល និងធ្វើឱ្យប្រសើរឡើងវិញសម្រាប់ភាពផុយស្រួយនៃខ្សែចង្វាក់ផ្គត់ផ្គង់ទាំងនៅក្នុងសហរដ្ឋអាមេរិកនិងពិភពលោកទាំងមូល៕
