.jpg)
ក្រុមយុទ្ធជនស្មោះត្រង់រដ្ឋាភិបាលយេម៉ែនគាំទ្រដោយអារ៉ាប៊ី សាអ៊ូឌីត។ រូបថត AFP
ក្រុមឧទ្ទាមហ៊ូធីនៅប្រទេសយេម៉ែន បានអះអាងទទួលខុសត្រូវចំពោះការវាយប្រហារ្រដូនកាលពីថ្ងៃចន្ទ នៅទីក្រុងអាប៊ូដាប៊ី ជារដ្ឋធានីអារ៉ាប់រួម (UAE)ដែលបានបណ្តាលឱ្យមនុស្សស្លាប់ យ៉ាងតិច ៣ នាក់។
ក្រុមឧទ្ទាមហ៊ូធី បានវាយប្រហារ្រដូនទៅលើរោងចក្រប្រេងសំខាន់មួយកន្លែង។ ការវាយប្រហារនោះ បានបណ្តាលឱ្យឆេះនៅព្រលានយន្តហោះអន្តរជាតិអាប៊ូដាប៊ី។ នេះបើយោងតាមការឱ្យដឹងពីសារព័ត៌មាន AP។
២នាក់ក្នុងចំណោមអ្នកស្លាប់ទាំងនោះ ត្រូវបានកំណត់អត្តសញ្ញាណដោយប៉ូលិសអារ៉ាប់រួមថា ជាជនជាតិឥណ្ឌា និងម្នាក់ទៀត គឺជាជនជាតិប៉ាគីស្ថាន។ នេះបើយោងតាមការឱ្យដឹងពី AP។ មនុស្សជាច្រើននាក់ទៀតនៅតំបន់ឧស្សាហកម្មមួយដែលជាទីតាំងក្រុមហ៊ុនថាមពលគ្រប់គ្រងដោយរដ្ឋនៅក្នុងទីក្រុងអាប៊ូដាប៊ី បានរងរបួសស្រាលៗនៅក្នុងការវាយប្រហារនោះ។
តាមការរាយការណ៍ ក្រុមហ៊ុននោះគ្រប់គ្រងបណ្តាញបំពង់ប្រេងជាផ្នែក បន្ថែមទៅលើរោងចក្រស្តុកសម្រាប់រថយន្តដឹកប្រេង។ រថយន្តដឹកប្រេងចំនួន៣គ្រឿង ស្ថិតនៅក្នុងរោងចក្រប្រេងដែលឆេះនោះ ខណៈអគ្គិភ័យមួយទៀត បានឆាបឆេះនៅជាយព្រលានយន្តហោះនៃទីក្រុងនេះ។
ក្រុមហ៊ូធីបានអះអាងការទទួលខុសត្រូវចំពោះការវាយប្រហារកាលពីថ្ងៃចន្ទ ប៉ុន្តែមិនបានបង្ហាញអ្វីជាក់លាក់ទេ។ នេះបើយោងតាមការឱ្យដឹងពី AP។
ទីប្រឹក្សាសន្តិសុខលោក Jake Sullivan កាលពីថ្ងៃចន្ទ បាននិយាយថា អាមេរិកថ្កោលទោសការវាយប្រហារភេរវកម្ម នៅក្នុងទីក្រុងអាប៊ូដាប៊ី ដោយបានបន្ថែមថា អាមេរិកនឹងសហការជាមួយអារ៉ាប់រួម និងក្រុមដៃគូអន្តរជាតិ ដើម្បីឱ្យក្រុមហ៊ូធីទទួលខុសត្រូវ។
លោក Sullivan បានបន្ថែមនៅក្នុងសេចក្តីថ្លែងការណ៍មួយថា៖ «ការប្តេជ្ញាចិត្តរបស់យើងចំពោះសន្តិសុខរបស់ប្រទេសអារ៉ាប់រួម មិនផ្លាស់ប្តូរទេ ហើយយើងឈរនៅកៀកស្មាជាមួយ ក្រុមដៃគូអារ៉ាប់រួមប្រឆាំងនឹងការគំរាមកំហែងទាំងអស់ចំពោះដែនដីរបស់ពួកគេ។
ចំណែកក្រសួងការបរទេសអាមេរិកបានថ្កោលទោសចំពោះការវាយប្រហារនោះ។ នេះបើយោងតាមសេចក្តីថ្លែងការណ៍មួយពីអ្នកនាំពាក្យលោក Ned Price។
សារព័ត៌មាន AP បានកត់សម្គាល់ឃើញថា ការវាយប្រហារដ្រូនបានកើតឡើង ខណៈក្រុមឧទ្ទាមហ៊ូធីស្ថិតនៅក្រោមសម្ពាធ និងត្រួតពិនិត្យមើលការខាតបង់ ស្របពេលមានការជំរុញពីរដ្ឋាភិបាលយេម៉ែន។ កងកម្លាំងយេម៉ែនដែលគាំទ្រដោយអារ៉ាប់រួម បានវាយបកទៅលើក្រុមហ៊ូធីនៅក្នុងតំបន់សំខាន់នៅភាគខាងត្បូង និងកណ្តាល ដែលបានរារាំងកិច្ចប្រឹងប្រែងរបស់ក្រុមឧទ្ទាមក្នុងការគ្រប់គ្រងភាគខាងជើងនៃប្រទេសយេម៉ែន។
អ្នកការទូតជាន់ខ្ពស់អារ៉ាប់រួម លោក Anwar Gargash បានស្តីបន្ទោសក្រុមឧទ្ទាមហ៊ូធីចំពោះការវាយប្រហារនេះ។ លោកបានសរសេរនៅលើធ្វីតធើរថា អាជ្ញាធរនៅអារ៉ាប់រួម កំពុងដោះស្រាយជាមួយក្រុមហ៊ូធីជុំវិញការវាយប្រហារទៅលើរោងចក្រស៊ីវិល នៅក្នុងទីក្រុងអាប៊ូដាប៊ី ឱ្យមានតម្លាភាព និងការទទួលខុសត្រូវ។ នេះបើយោងតាមសារព័ត៌មាន AP។ លោកបានបន្ថែមថា ការរារាំងសន្តិសុខដោយក្រុមយុទ្ធជនភេរវកម្ម ខ្សោយពេកមិនអាចធ្វើឱ្យប៉ះពាល់ដល់ស្ថិរភាព និងសុវត្ថិភាពកន្លែងដែលយើងរស់នៅនោះទេ។
ក្រសួងការបរទេសអារ៉ាប់រួម បានសរសេរនៅក្នុងសេចក្តីថ្លែងការណ៍មួយថា ការវាយប្រហារនោះនឹងមិនរងទណ្ឌកម្មអ្វីទេ។ នេះបើយោងតាមការឱ្យដឹងពីសារព័ត៌មាន Reuters។
ក្រសួងការបរទេសបានបន្ថែមទៀតថា៖ «អារ៉ាប់រក្សាសិទ្ធិក្នុងការឆ្លើយតបទៅនឹងការវាយប្រហារភេរវកម្ម និងការបង្កអំពើឧក្រិដ្ឋកម្ម»។
ប៉ូលិសនិយាយថា ពួកគេនាពេលបច្ចុប្បន្ននេះ កំពុងត្រួតពិនិត្យមើលឧប្បត្តិហេតុនោះ ដោយបានបញ្ជាក់ថា ការរកឃើញពីដំបូងបញ្ជាក់ថា បំណែកតូចៗនោះមានការពាក់ព័ន្ធនឹងដ្រូនបានធ្លាក់ទៅលើទីតាំង ២ បណ្តាលឱ្យផ្ទុះ និងឆេះ។ ទោះបីជាយ៉ាងណាក៏ដោយ ពួកគេបានកត់សម្គាល់ឃើញថា មិនមានការខូចខាតជាដុំកំភួន ត្រូវបានគេកត់ត្រានោះទេ៕
