រដ្ឋមន្ត្រីអូស្ត្រាលីទទួលបន្ទុកតំបន់ប៉ាស៊ីហ្វិក លោក Zed Seselja និយាយថា របាយការណ៍ដំបូងបង្ហាញថា មិនមានអ្នកស្លាប់ និងរបួសច្រើននៅតុងហ្គាបន្ទាប់ពីបន្ទុះភ្នំភ្លើងកាលពីថ្ងៃសៅរ៍ ដែលបង្កឱ្យមានរលកស៊ូណាមិ ប៉ុន្តែមានការខូចខាតយ៉ាងដំណំនៅតាមបណ្ដោយឆ្នេរ។
លោក Seselja និយាយក្នុងបទសម្ភាសជាមួយស្ថានីយវិទ្យុអូស្ត្រាលីថា៖ «យើងដឹងថា មានការខូចខាតដំណំៗមួយចំនួន។ យើងដឹងថា មានការខូចខាតយ៉ាងខ្លាំងចំពោះរមណីយដ្ឋាននានា»។ លោកថ្លែងបែបនេះ បន្ទាប់ពីអូស្ត្រាលី និងនូវែលសេឡង់បញ្ជូនជើងហោះហើរឃ្លាំមើលកាលពីថ្ងៃចន្ទ ដើម្បីវាយតម្លៃការខូចខាតនៅលើកោះប៉ាស៊ីហ្វិកមួយនេះ។
អនុប្រធានបេសកកម្មរបស់តុងហ្គានៅអូស្ត្រាលី លោក Curtis Tu''ihalangingie ស្នើសុំឱ្យមានការអត់ធ្មត់ ខណៈដែលរដ្ឋាភិបាលរបស់តុងហ្គាសម្រេចចិត្តអាទិភាពរបស់ខ្លួនសម្រាប់សុំជំនួយ។ តុងហ្គាមានការព្រួយបារម្ភអំពីហានិភ័យនៃការផ្តល់ជំនួយថា អាចពង្រាលការឆ្លងកូវីដ ខណៈដែលមកទល់ពេលនេះមិនមានការឆ្លងនៃវីរុសកូរ៉ូណាក្នុងប្រទេស។
លោក Tu''ihalangingie និយាយថា៖ «យើងមិនចង់នាំមកនូវរលកមួយទៀត គឺរលកយក្សស៊ូណាមិនៃជំងឺកូវីដ ១៩ នោះទេ»។ ប៉ុន្តែអ្នកការទូតនិយាយថា ជំនួយណាមួយដែលបញ្ជូនទៅតុងហ្គា នឹងត្រូវដាក់ឱ្យនៅដាច់ពីគេ ហើយវាទំនងជាមិនមានបុគ្គលិកបរទេសណាម្នាក់អនុញ្ញាតឱ្យចុះពីលើយន្តហោះនោះទេ។
ការផ្ទុះភ្នំភ្លើង Hunga-Tonga-Hunga-Ha''apai បង្កឱ្យមានរលកស៊ូណាមិនៅលើឆ្នេរកោះតុងហ្គា ហើយកាត់ផ្តាច់បណ្តាញទូរស័ព្ទ និងអ៊ីនធឺណិតលើកោះទាំងមូល។
បណ្តាញទូរស័ព្ទនៅតុងហ្គាត្រូវបានស្តារឡើងវិញហើយ ប៉ុន្តែផេះភ្នំភ្លើងកំពុងបង្កបញ្ហាសុខភាពយ៉ាងធ្ងន់ធ្ងររួមទាំងការបំពុលទឹកជាដើម។ លោក Tu''ihalangingie និយាយថា៖ «មនុស្សភាគច្រើន មិនដឹងថាផេះមានជាតិពុល និងអាក្រក់សម្រាប់ពួកគេដកដង្ហើមទេ ហើយពួកគេត្រូវពាក់ម៉ាស់»។
Hunga-Tonga-Hunga-Ha''apai ផ្ទុះឡើងជាទៀងទាត់ក្នុងរយៈពេលប៉ុន្មានទសវត្សរ៍កន្លងមកនេះ ប៉ុន្តែឥទ្ធិពលនៃការផ្ទុះកាលពីថ្ងៃសៅរ៍ រាលឆ្ងាយដល់កោះហ្វីជី នូវែលសេឡង់ សហរដ្ឋអាមេរិក និងជប៉ុន។រលកស៊ូណាមិដោយសារតែបន្ទុះភ្នំភ្លើងនេះ បានបណ្តាលឱ្យមនុស្ស ២ នាក់ស្លាប់ នៅឆ្នេរមួយនៅភាគខាងជើងប៉េរូ ដែលស្ថិតនៅចម្លាយជាង ១០ ០០០ គីឡូម៉ែត្រពីកោះតុងហ្គា៕
ហួន ឌីណា