កាលពីថ្ងៃចន្ទ ទី១៧ មករា ប្រធានាធិបតីចិនលោក ស៊ី ជីនភីង បានជំរុញប្រទេសនៅជុំវិញពិភពលោកឱ្យចាកចេញពី «ចិត្តគំនិតសង្គ្រាមត្រជាក់» ដោយនិយាយថា ប្រវត្តិសាស្ត្របានបង្ហាញម្ដងហើយម្ដងទៀតថា ការប្រឈមមុខដាក់គ្នាតែងតែនាំមកនូវផលអាក្រក់ទាំងសងខាង។
ក្នុងការថ្លែងសុន្ទរកថាតាមវីដេអូក្នុងកម្មវិធីរៀបចំដោយវេទិកាសេដ្ឋកិច្ចពិភពលោក លោកស៊ីបាននិយាយថា៖ «យើងត្រូវបោះបង់ចិត្តគំនិតសង្គ្រាមត្រជាក់ ហើយស្វែងរកការរួមរស់ដោយសន្តិភាព និងលទ្ធផលឈ្នះ-ឈ្នះ»។
លោកបន្តទៀតថា៖ «ប្រវត្តិសាស្ត្របានបង្ហាញម្ដងហើយម្ដងទៀតថាការប្រឈមមុខដាក់គ្នាមិនអាចដោះស្រាយបញ្ហាបានទេ។ វាគ្រាន់តែអញ្ជើញផលវិបាកមហន្តរាយ។ ការការពារនិយម និងឯកតោភាគីនិយម មិនអាចការពារនរណាម្នាក់បានទេ។ ទីបំផុត ពួកគេធ្វើឱ្យប៉ះពាល់ដល់ផលប្រយោជន៍របស់អ្នកដទៃ ក៏ដូចជាខ្លួនឯង។ អ្វីដែលអាក្រក់ជាងនេះទៅទៀតគឺការអនុវត្តអនុត្តរភាពនិងការសម្លុតដែលប្រឆាំងនឹងជំនោរនៃប្រវត្តិសាស្ត្រ»។
ការលើកឡើងរបស់លោកស៊ី ជីនភីងបានធ្វើឡើងខណៈពេលដែលភាពតានតឹងជាមួយសហរដ្ឋអាមេរិកគឺកំពុងកើនឡើងលើបញ្ហាជាច្រើន ជាពិសេសបញ្ហាកោះតៃវ៉ាន់។ នៅឆ្នាំនេះទំនាក់ទំនងដ៏តានតឹងរវាងអាមេរិក និងចិនត្រូវបានគេកំណត់ថាក្នុងចំណោមហានិភ័យខ្ពស់បំផុតសម្រាប់ទ្វីបអាស៊ី ខណៈពេលដែលក្រុមអ្នកជំនាញនិយាយថាកម្រិតភាពតានតឹងដ៏ខ្ពស់នេះគឺជាសញ្ញាដំបូងនៃសង្គ្រាមត្រជាក់ថ្មីមួយ៕